《歷史上ê主耶穌》

 | | | 轉寄

第二章_1_1 以色列簡明史（含舊約對耶穌基督ê預言）

作者 杜英助, 台譯：Lîm Tsùn-io̍k 2020.01.05

1）以色列ê列祖先民kah埃及王國
a）公元前18～17世紀︰亞伯拉罕tùi美索不達米亞北部ê巴旦亞蘭（今á日土耳其東部）ê吾珥、哈蘭遷徙到上帝應允之地迦南（今á日以色列）顧羊，tú-tio̍h饑荒koh再遷徙到埃及暫居避難，了後koh tńg來迦南地顧羊。

耶穌向偤太人講：「Lín ê祖先亞伯拉罕歡喜teh thèng候我來臨ê日子，伊有看tio̍h，koh看了真歡喜。」....耶穌應講：「我實在kā lín講，亞伯拉罕iáu未出世，我to̍h存在。」（《全民台語聖經》約翰福音8：56&58）

其實，照約翰福音開卷to̍h講：「上帝創造以前to̍h有道，道kah上帝同在，道to̍h是上帝。Tùi源起頭，tsit-ê道to̍h kah上帝同在。上帝通過道來創造萬物，一切受創造ê lóng是通過道來創造。」（約翰福音1：1～3），tsit段經文m̄-nā證實耶穌tī亞伯拉罕tsìn前to̍h已經存在ā，而且證實創世記上帝ê話，講：「咱tio̍h造人親像咱ê像，照咱ê款，hō͘ in管理海裡ê魚、天頂ê鳥、tsing-seⁿ，以及全地kah地上teh 趖（sô）ê蟲thōa。」 上帝就創造人親像祂家己ê像，照上帝家己ê像創造人類，創造in男ê女ê。」（創世記1：26～27），所以咱人類tsiah有上帝ê靈、性命、尊榮kah自由意志。

b）雅各所疼ê kiá約瑟受眾兄哥出賣hō͘ 以實瑪利人ê商旅，hông tshōa去埃及koh再賣hō͘ 埃及法老ê官員波提法做奴隸；了後約瑟被誣告落監獄，顛倒被高升做埃及宰相，迦南地koh tú-tio̍h 炕旱，約瑟就迎接老父kah兄哥全家遷居到埃及ê歌珊（尼羅河三角洲）。後來以色列人被埃及法老奴役做苦工，前後總共400/430年，約公元前1650/1680到1250年tsiah出埃及。

c）摩西帶領以色列人民出埃及，上帝tī西奈山頂頒賜十條誡命hō͘ 伊，吩咐伊tio̍h叫以色列人切實遵守。當摩西年老120歲ê時，伊帶領以色列人民到約旦ê尼波山ê時，完成以色列人ê基本信仰經典，史稱「摩西五經」á是講「妥拉」，了後安息，被天使接tńg去天頂。

有一个律法師來試探耶穌，問伊講：「老師ah，律法中tó一條誡命siōng重要？」耶穌應講：「你tio̍h盡心、盡性、盡意疼主—你ê上帝。Tsit-ê siōng要緊，mā是頭一个誡命。第二條mā仝款，tio̍h疼厝邊親像家己。Tsit兩條誡命是全部律法kah先知教示ê總根頭。」（摘自馬太福音22：34～40）

d）公元前1020年撒母耳先知膏立掃羅做第一位國王，領導12支派ê以色列人建立君王統治ê國家。

e）撒母耳先知繼續膏立Ta-bi̍t tī公元前1004～965年做第二任國王，藉tio̍h軍事力量堅固完整ê統一王國。Tī耶路撒冷定都，而且準備建材為耶和華上帝起造聖殿。

Τa-bi̍t王bat講：「因為祢無kā我ê靈魂放sak tī陰間，mā無hō͘ 祢ê聖徒（指耶穌）tú-tio̍h朽爛。」（詩篇16：10）Tsit句經文是teh預言耶穌被釘十字架，hit工斷氣後to̍h是被天父接tńg去樂園，祂ê遺體經過三工二暝後koh活，無朽爛。

f）公元前965～930年，Ta-bi̍t王ê kiáⁿ所羅門繼位做王，耶和華上帝賜伊智慧kah財富，起造耶路撒冷聖殿，成做偤太人國家、政治、宗教kah生活ê中心。M̄-koh，因為伊藉tio̍h kah厝邊隔壁ê邦國異族政治聯婚ê 和親政策背離上帝，suah致使tī伊往生了後，統一ê王國分裂做南北二國，北國叫以色列，南國叫偤大。

彌迦先知tī希西家王在位ê時to̍h預言，有一位掌權者必出tī伯利恆，上主講：「伯利恆以法他，你tī偤大tsiah-ê庄頭中做微細ê，ē有一个tùi你hia出來，tī以色列中間kā我做掌權ê；伊ê根源tùi古早，tùi極起頭to̍h有。」（彌迦書5：2；參閱馬太福音2：6、約翰福音1：1）