《歷史上ê主耶穌》

 | | | 轉寄

第二章_1_2 以色列簡明史（含舊約對耶穌基督ê預言）

作者 杜英助, 台譯：Lîm Tsùn-io̍k 2020.01.12

a）以色列︰有10个支派，以撒瑪利亞做首都，經過19位國王；tī公元前722年被亞述王撒縵以色（Shalmaneser)）消滅，人民被掠去亞述做奴隸，m̄-koh後來tsit 10个支派受掠ê人竟然tī歷史上消失。今á日歷史家iáu teh探討伊ê遺民究竟koh再分散到啥物所在居留，tsit-má已經漸漸tshōe出來à。

b）偤大︰以耶路撒冷做首都，比以色列史加出100 gōa年，tī公元前586年被巴比倫王尼布甲尼撒滅亡；耶路撒冷kah聖殿被毀壞，國王kah大多數ê人民lóng被掠到巴比倫囚禁，做奴隸，到公元前538年為止。

以賽亞先知bat向偤大王亞哈斯預言，講：「你看，有在室女beh懷孕生kiáⁿ，koh kā祂號名叫做『以馬內利』。」（以賽亞書7：14），koh幾nā pái預言講：「因為有一个嬰á為咱來出世！有一个Kiáⁿ賞賜hō͘咱！（參閱約翰福音3：16）祂beh負擔國政，祂ê名叫做奇妙ê謀士、全能上帝、永遠存在ê天父、和平ê君王。」（以賽亞書9：6），tsit位嬰á是上帝ê奴僕：「受傷ê蘆葦，祂無at斷；beh hua ê燈火，祂無phah熄。祂照真實，kā公理傳播。」（以賽亞書42：3），當祂長大出來宣講拯救ê好消息ê時ē講：「至koân上主ê聖神臨到我；因為上主用油抹我，hō͘我傳福音hō͘ sàn-tshiah ê人，差我醫好傷心ê人，宣揚受掠ê得tio̍h tháu放，受關ê出監牢；宣揚上主歡喜ê年，kah咱ê上主報仇ê日。安慰所有悲哀ê人。」（以賽亞書61：1、2，參閱路加福音4：18、19），m̄-koh以賽亞先知koh預言上帝ê奴僕是受苦ê奴僕，講：「伊受看輕，hō͘人放sak，伊受真tsē痛苦，tiāⁿ-tiāⁿ tú-tio̍h憂悶…。M̄-koh，伊為tio̍h咱ê過失受傷，為tio̍h咱ê罪過受害…伊受壓迫tú-tio̍h艱苦，iáu-koh無開嘴…。（詳見以賽亞書第53章），tsiah-ê kah耶穌相關ê預言lóng是以賽亞先知tī偤大國亡國ê前後期講ê。

但以理書第三章記載但以理ê三个朋友m̄拜尼布甲尼撒王ê金像，被綑縛hiat入去燄火ê窯中，m̄-koh一支頭毛都無受傷。Hit當時，尼布甲尼撒王竟然看見火窯中有四个人，無綑縛，tī火中teh行，mā無受傷；hit第四个ê相貌kah-ná是「神ê kiáⁿ」。Tsit位神ê kiáⁿ，to̍h是上帝ê kiáⁿ救主耶穌。因為「祂beh救祂ê子民脫離in ê罪惡。」（馬太福音1：21）

3）波斯帝國kah偤太人
波斯帝國tī公元前538年消滅巴比倫帝國，偤太人（註︰巴比倫人kā偤大發音為偤太，所以偤大人lóng叫做偤太人）就án-ne成做波斯帝國ê次等人民。當時波斯王古列(居魯士)kah大利烏（大流士）受上帝感召，下詔偤太人回國重建耶路撒冷kah聖殿，無回國ê餘民tsit-má iáu居留tī伊朗teh生活。

以斯帖記第一章講：「波斯王居魯士án-ne講：耶和華天頂ê上帝已經kā地面萬國賜hō͘我，koh委派我tī偤大ê耶路撒冷為祂起造殿宇。」以賽亞先知講：「我照公義興起古列，koh beh修直伊一切ê路；伊beh起造我ê城，tháu放我受掠ê子民。」（以賽亞書45：13）有關偤太人回鄉ê預言，請koh再詳閱耶利米書第31章ê記載。

4）希臘帝國kah偤太人
希臘馬伊ê頓王亞歷山大大帝tī公元前332年征服波斯帝國（包括今á日ê以色列地在內），所以迦南地自然to̍h變成希臘帝國ê殖民地；希臘文化kah風俗強迫偤太人接受，禁止偤太人遵行偤太教禮儀。希臘人koh褻瀆偤太人聖殿，tī祭壇頂獻豬（偤太人看豬是無聖潔ê動物）污染聖壇。因為án-ne，tī公元前166年偤太人發動革命，建立新ê王朝，歷史上稱做哈斯摩尼王朝（公元前142～63年），前後總共約80年久，享受獨立、自治。

5）羅馬帝國kah偤太人
當羅馬人tī公元前63年，取代希臘人塞琉古王成做迦南地ê統治者ê時，偤太人哈斯摩尼王朝ê海爾卡努斯二世tī敘利亞ê大馬士革羅馬總督ê管轄下，雖然iáu有部分ê權力，m̄-koh卻成做羅馬帝國ê附庸臣。伊kah偤太人對羅馬政權充滿敵意，後來經常發起政變，lóng被羅馬壓制、剷平。到公元前46年哈斯摩尼王朝被羅馬帝國消滅，正式結束，以色列成做羅馬帝國ê一个省，被拚入羅馬帝國ê版圖。