《古典台語文學e5欣賞》

 | | | 轉寄

十字架ê記號 (1) 救主誕Hit暝

作者 Luā Jîn-sing 2005.12.25

阿爸，阿娘，緊備辦o͘h!拜堂ê大鐘teh tân lah nē!

惠美ê心真歡喜；因為今暝是救主誕，伊kah兄哥青雲á，自幾若點鐘前，就換衫褲備辦好，beh去赴。因為兩兄妹是真活動，伊本身今年是18歲，生做suí koh乖，伶俐koh gâu讀冊。今年是南京省立ê高等女學校四年，ta̍k年頭名，也兄哥今年20歲，tī南京ê省立商科大學三年(liân)；二個lóng是koh無juā久beh卒業。也tī tsit-ê歇年，tńg來tshuē父母。是tiàm tī離南京入東十phò͘ ê山腳，一個鄉庄，叫做士隆庄。

Tsit-ê庄名真好聽，就是庄雖bóng無juā大；Iáu-kú前清時代，tī hit庄裡有出kuí-nā個舉人、秀才也buē少，所以是相當有文化ê庄社。人口2,000連。也有一條街á teh買賣：山內出入ê人真tsē，所以雖bóng是講山腳ê田庄所在；m̄-kú也是相當ê鬧熱。

惠美in老父卻是相當會得過ê人，前阿公bat中舉，老父也是老秀才，財產uì老父少年ê時嫖、睹、飲，三款全(tsn̂g)；koh愛食鴉片，所以早猶原有開kuá。現時所tshun卻是三、兩擔錢。老父tī 30 guā歲ê時，有染tio̍h重病險死，hit時有來南京hō͘基督教開ê醫館醫治，對hit時得tio̍h道理。Hit-tia̍p兄哥青雲四歲，也伊本身iá未出世。對hit-tia̍p了後老父真熱心信主，隔二年tsiah生惠美ah。中國人是重男輕女，總是老父為siàu念主ê疼，救伊出死入活koh改鴉片kah一概pháiⁿ-tāi；所以伊tsiah號伊做惠美，來siàu念上帝恩惠ê美。對hit霎了後lóng無koh生。Án-ni就對kiáⁿ疼命命。Tuì信主了後，就熱心tī教會，所以受揀做長老，連任tsē-tsē年。到今年50外歲，iáu-kú teh做長老；所以地方ê人若講林長老無一個m̄知伊是熱心ê基督徒。也伊無經營sing-lí；是將伊所有ê田hhiaN3工來作；所以極有時間thang培養兩個kiáⁿ兒。對細漢hō͘ in入基督教ê學校，直直培養到卒業，thang講是真順序，真滿足，兩老常將tsit二個kiáⁿ來歡喜。

也今年是tī庄腳ê教會，beh做祝聖誕式，兩兄妹有寄附。阿兄violin相當會挨，惠美ah piano也相當會彈koh聲真好；所以二個phut-phut跳真愛去赴開會；m̄-kú阿娘kah阿爸lóng老人，暗時行路愛踏探，所以伊tio̍h等in牽，koh無juā久就去，tuì頭到尾真心適tò來。中間一齣不止深刻tī青雲ê腦內；就是sing-lí人tshuē真珠(是耶穌ê譬如)做起真出神。Tuì這時有喚起伊一項趣味；就是想伊大學卒業後，也伊想beh來去外國做親像hit款sing-lí。看了tò去有將tsit-ê所感講hō͘ in老父聽。也老父聽了恬恬，老母直直嫌，講做hit號sing-lí tio̍h去外國奔（phun）走，伊khah無愛。婦人人ê款lóng是án-ni，伊愛伊tiàm本所在開行á是kah人tiàm。來食會社、公司ê頭路。總是小妹惠美真贊成兄哥ê說，講青年人應該tio̍h án-ni活動，所以兩兄妹就有話講。了後koh無juā久，就大家koh入學。tsia且按下。

兩老，kiáⁿ lóng去入學，內面真無伴to̍h雞鳥飼tsē，無閑就想講tio̍h來tsuē一個tú好ê新婦。兩老就參詳，大家同意ài做本教會牧師ê tsa-bó͘-kiáⁿ。牧師ê tsa-bó͘-kiáⁿ今年kah惠美同學(tâng-o̍h)，平tsē歲，siāng年級，平平明年四月會卒業，號做王雪梅，生做也是真好，kah惠美是至好ê朋友；所以兩老參詳了，就央人去對牧師講，牧師也是真歡喜，因為是本堂熱心長老ê後生。少年人也是好品行koh真有志氣，所以對嘴允伊。就hō͘兩個少年知，二比也是真歡喜。對án-ni。青雲常常寫phue hō͘雪梅。雪也常常寫phue hō͘青雲。兩個真正情投意合，saⁿ疼m̄-ài分開。時日真快過，liâm-piⁿ四月，就大家卒業。照青雲ê老父是ài liâm-piⁿ kā in娶，王牧師in hit-pîng也是真歡喜。總是青雲ê意思m̄-ài hiah緊，伊是ài將伊所趁ê錢來tshuā khah有心適。所以真深意對老父求，准伊出外來做sing-lí，uá半年後tsiah tò來娶。伊ê老父本m̄，總是為tio̍h伊迫切就准伊。伊ê所愛就是照前所講，愛去外國做寶貝貴重品ê走水sing-lí；所以就去買一隻馬也加入外國ê隊商，tsit-pang是beh去印度。hia也是平時伊至欣慕愛去ê位，所以真歡喜家己就kah朋友大家會合tī五月初beh tuì南京出發。大家beh用牽馬過山，沿路對歸化ê生番山內ê人買tsiah-ê tsing-siⁿ野獸ê皮親像鹿皮、豹皮，á是鹿茸、象牙ê類。所以tī 4月29，就tuì本所在出發。