《古典台語文學e5欣賞》

 | | | 轉寄

十字架ê記號(6)偷看新娘

作者 Luā Jîn-sing 2006.01.29

送葬明白，大家就四散。Tsia且按下。
講益杉kah in母舅隔半月日khah加就兩人lóng騎馬來beh相tshuē，到位看內面打扮舉喪ê款式，in tio̍h一驚。因為益杉tsiah tò去uá一月連日，án怎忽然變án-ni。益杉就問長老娘，長老娘一一lóng講hō͘伊聽。益杉真憂悶；總是長老娘一心真僥疑講，今á日thái有一個武官tuè益杉來。就問益杉看tsit位是tsī-tsuī?益杉就kā伊講，tsit位是阮母舅，姓張名添德，現時是南京第二陸軍聯隊ê司令官。聽了長老娘kah惠美就liâm-piⁿ起位揖禮，續會失接ê罪，然後就講一場客氣ê話。這免講siuⁿ詳細。總講益杉ê母舅看惠美一面，感覺真合意，贊成伊娶；總是tsit-tia̍p是舉喪，koh是有聽道理kah無聽道理ê關係。所以知beh講tsit-tsân事，是無hiah快，所以看看leh，四界花園行行leh，心中暗暗teh稱讚秀才ê厝ê樸素幽雅不止有愛和平ê款式，所以心不止o-ló道理ê好，m̄-kú當時ê官界khah無人聽道理，所以m̄愛顯然o-ló，看了就相辭tò去。長老娘in也不解其意，因為掠準in是來行遊，也聽人講長老死beh來埋喪，所以無疑。Tsia按下。
講益杉kah母舅到路裡，益杉就問母舅看了怎樣?母舅講，有一好；m̄-kú有二項ê oh，一項是in信基督教；koh一項lin兩老母已經有替你io一個。益杉聽了心大艱苦，續哮出來。叫in母舅的確tio̍h替伊設法，無伊beh去做浪子流民，m̄-tiàm家內。母舅聽了心真艱苦，就講好，我想一法，你m̄免掛意，我的確替你周旋到好勢。益杉面就笑，目屎iáu掛tī目墘，也嘴teh應母舅想了也真同情伊ê心意。益杉也暗暗teh想，愛照青年ê戀愛熱，緊問母舅看有甚物法。母舅就kā伊講，我先來去勸lín老母，hō͘你娶；也秀春來kā伊嫁；也若苦勸m̄聽，我tsiah如此如此來設法。益杉講，m̄-kú in hit-pîng我到tsit-tia̍p tsiah想tio̍h，有一日惠美kah我去山裡挽百合花，我猶原teh kā伊講tsit-tsân事，也應我。應你怎樣伊有歡喜無?伊應我講是in老父ê主意。這是自然，tsa-bó͘-gín-á人應你án-ni是應該；猶有別句無?無leh；卻伊也講伊真疼我；m̄-kú teh講ê時手畫tī土裡，畫一字十字，到tsit-tia̍p我想tio̍h伊ê意思，決斷是teh暗指伊是基督徒，所以tsit-tsân事oh成。In母舅kā伊講戇孫leh，tsit-tsân小事，你免掛意。Ti7tsit三日內，我的確hō͘ tsit-tsân事清楚。益杉聽一個，心開了了，就緊問看，阿舅你有甚物好方法?In舅kā伊講，tsit-tia̍p慢即koh講出；不過隔三日後，tú是十月初5日，hit早起做你tī厝裡等，我自然設法好勢，來交你ê手；總是你tio̍h將內面ê tshiàⁿ工ê hō͘我。即時允伊。 無juā久就到厝，hit暗hō͘ in母舅請，睏lóng bē天光，拗指頭á teh算十月初3,4,5，暗時陷眠也夢見teh kah惠美講話。有時陷眠笑到ha̍h-ha̍h叫。天光就tò去，kā in老母講tsiah-ê事。In老母知是小弟替伊設法ê也m̄敢逆(ke̍h)；總是心無甚物歡喜。秀春真m̄願意；總是無法度。
就tī hit日放帖，tshiàⁿ廚子來辦桌。備辦真好勢，約初五hit早起就會到位，也hit下晡tsiah beh請人客。內面拚掃真清氣，點燈結彩，門聯紅phà-phà。親tsiâⁿ人客lóng總已經來lah，祝電kui疊。益杉也剃頭換衫穿禮服笑gī-gī teh等新娘。Tsia且按下。
講惠美in hit-pîng lóng無tsit號意思，老父死無幾日，心真憂悶，若beh食飯tio̍h哮。Ah！有影慘。阿兄死，阿爹死，只有tshun阿娘kah伊。哮到目睭ham-ham，無甚物thang受安慰；不過早暗kah老母讀聖經祈禱來相勉勵，佳哉家內有一個盡忠ê長工，tsit-ê自細無父母，hō͘林長老khioh來飼ê，今年二五、六歲，非常勇，四五百斤ê力。Tsit-ê叫做守仁，ta̍k日teh收田租設法家內ê事，也是真熱心gâu安慰頭家娘kah小姐。