《《一位台灣女信徒ê自述》》

| | | 轉寄

第二章_15)疏開去北海道

空襲了後ê隔tńg工,阮翁照常去上班;內科主任酒井(さかい)教授勸阮疏開。

主任講:「你ê bó͘ 有娠,bē-tàng搖來搖去。請放心,我ē安排一切,請放心疏開。我ê丈人是北海道ê夕張(ゆうばり)炭礦ê股東。我ē紹介你去做炭礦病院ê內科醫生,所以你隨時去。」

北海道到taⁿ m̄-bat有過空襲,物資mā豐富;阮翁就決定tshōa我去北海道。黃家ài仁愛留tī東京,所以,仁愛留落來。聽講郭牧師kah伊ê全家mā疏開去北海道ê八雲(やくも)ê教會,所以阮約tī八雲見面。

六月初,我kah阮翁phāiⁿ未火燒ê行李,tùi上野站前往北海道。Tsit tsōa火車lóng是疏開ê人kah行李,腳踏ê所在都無,kan-taⁿ ē-tàng tùi窗á出入ê程度。Tio̍h tùi本州siōng北ê青森換坐渡輪去函館(はこだて)。Tī tsia,阮翁ê東京醫專ê同窗—警察病院ê婦產科醫生盧國義先生早阮一腳步疏開來tsia,hit暗阮tòa黃先生ê厝裡。阮通宵交談,隔tńg工,拜託伊送阮到港口去坐渡輪。

Tùi函館到八雲大約2點鐘;阮落車to̍h隨去八雲教會,郭牧師全家是幾工前to̍h到。該教會ê牧師是郭牧師留學美國ê朋友,郭牧師ê khiā家由教會提供。Óa近大海ê八雲ê米kah魚lóng真豐富,牧師娘kah gín-á lóng真歡喜。阮mā有 kah gín-á 做伙去海邊。Hia有一台貯tīⁿ魚滿滿ê船,我講beh買魚ê時,to̍h the̍h一桶滿滿賣我五元;我看tio̍h幾尾紅鰱魚tī hia,我講beh一尾紅鰱魚ê時,掠魚人隨時kā魚hiat入去水桶,kā我講免錢。Hiah-ni̍h優質ê魚,tī東京一年都無可能配給。魚用烘kah燉煮,紅鰱魚做sa-sí-mih,食kah有夠khùi,這hō͘我真滿意。阮感謝上帝賞賜阮tsiah-ni̍h豐富。

Kah郭牧師做伙tòa三 四工了後,阮坐火車去日本siōng大ê夕張炭礦。