《綠色短評》

 | | | 轉寄

原來烏克蘭mā ē-sái拍俄羅！

作者 李南衡, TsoânTâijī/全台字 by Tsng Hūiphêng 2022.12.25

Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》 Lí Lâmhêng

Goânlâi 烏克蘭mā ēsái phah Gôlô!

　　2022 nî jīgue̍h jīsì, Gôlô kuntūi tsèngsik tshimlio̍k 烏克蘭 kàu taⁿ 280 gōa kang, ēsái kóng sī 烏克蘭hō͘ Gôlô tshi̍h teh thô͘kha phah, mānā tsiàntshia, tōaphàu sìkè tōaⁿ, huitôaⁿ bô thêng, huattiāntshiúⁿ, tsúi khò͘, tiānle̍k tiān sìn hēthóng siū phòhoāi, liân tsin tsē pēⁿīⁿ, ha̍khāu mā hō in tsàtsàtiāu, si̍ttsāi tsin khóó͘ⁿ! hókatsài í Bíkok tshōa thâu ê Pakiok kokka tsiksî thêkiong kok tsióng sin búkhì tsioân, 烏克蘭 tsiah ētàng tòng kàu kináji̍t. Lán mā bat siūⁿ, 烏克蘭ná ē bô ài kā phah tòtńgkhì?

　　 Bô gîgō͘ tsa̍pjīgue̍h tshegō͘ thàutsá 6 tiám 4 pun, tī Gôlô Salatobu（Saratov） tsiu ê Unkosu（Ingels） khongkun kitē tsosiūtio̍h tsūsat bôlângki se̍kkik, ínhuat tsiok tōa ê po̍ktsà siaⁿ. Tsitê khongkun kitē lī 烏克蘭 piankài ū 724 konglí, tī Gôlô siúto͘ Bo̍hsukho tanglâmhong iok 875 konglí ê só͘tsāi, sī Gôlô hiòng 烏克蘭 huatsiā hóetsìⁿtôaⁿ tsiànki ê tsúiàu khíkàng tē, mā sī Gôlô khongkun ū tshionghun siatpī, ētàng ūi tsìnkong 烏克蘭ê tōa hêng hongtsàki thêkiong ûisiu póióng ê îit kitē. Kúi kang tsêng kantia̍p ūitsheⁿ ū show tshut TU90 kah TU160 hongtsàki tsūtsi̍p ê só͘tsāi. Po̍ktsà huatsing āu, bô siū hāi ê tsiànki lóngtsóng khí pue līkhui kitē.

　　 Kâng tsi̍t kang thàutsá, lī 烏克蘭 piankéng 482 konglí ê Gôlô tiongpō͘ siâⁿtshī Latsan(Ryazan) hūkīn ê Tsiagilebô(Dyagilevo) khongkun kitē mā sī tsosiūtio̍h bôlângki ê kongkik. Tsitê khongkun kitē ū thêng tsin tsē tsiah Gôlô tōa hêng tsiànlio̍k hongtsàki.

　　 烏克蘭 lāitsèng pō͘tiúⁿ kò͘būn Jielasenko (Anton Gerashtsenko) tī Twitter téngbīn piáusī, ū siausit kóng Unkosu (Ingels) khongkun kitē kah Tsiagilebô(Dyagilevo) khongkun kitē ê kunki goânpún ūtēng beh tī tsa̍pjīgue̍h tshegō͘ tsákhí tsiphêng hongtsà 烏克蘭 lênggoân kitshó͘ siatsi ê jīmbū. Bô siūⁿtio̍h 烏克蘭 sing tshuttshiú.

　　 Gôlô kokhôngpō͘ tī siausit pha̍kkng liáuāu thiàutshut lâi piáusī, tsit nn̄g piàn kongkik sūkiāⁿ ū tsōsêng 3 sí 4 siong, 2 tsiah Tu95 hongtsàki kah 1 tsiah Tu22M̀ hongtsàki húi sún

　　 Bûsam putsênglé, tsa̍pjīgue̍h tshela̍k tsákhí, lī 烏克蘭 bô lōa hn̄g ê Khusukhu(Kursk) kun ēng kitiûⁿ mā tsosiūtio̍h bôlângki se̍kkik, kitiûⁿ lāi tsi̍t tsō tûiûtsô po̍ktsà to̍h hóe, Gôlô kuaⁿhong suantshing bô jînoân siongbông.

Tēit kang po̍ktsà huatsing kúi tiámtsing āu, 烏克蘭 tsoân kéng khangse̍k kéngpò kohtsài hiángkhí. Gôlô koh hiòng 烏克蘭 huattōng sin tsi̍tpho ê huitôaⁿ kongkik. 烏克蘭 tsóngthóng kóng, goán íking tsa̍h tiāu tsin tsē lia̍p huitôaⁿ, tānsī iûgoân ínhuat tsin tsē só͘tsāi thêng tiān.

　　 Gôlô tsítsik 烏克蘭 kongkik Gôlô léngthó͘. Tsin kîkoài, Gôlô khì phah 烏克蘭 léngthó͘ 280 gōa kang ná tshiūⁿ tsiâⁿ tsèngtong, 烏克蘭tī Gôlô kénglāi khian saⁿê niāniā tio̍h kaiⁿkaiⁿ kiò!

　　Oh, goânlâi 烏克蘭mā ēsái phah Gôlô!

Tsù, 烏克蘭　　 tshiáⁿ liām Hôagí


Pe̍h-ōe-jī-pán/白話字版



《 Le̍k-sik toán-phêng 》 Lí Lâm-hêng

Goân-lâi 烏克蘭mā ē-sái phah Gô-lô!

　　2022 nî jī-gue̍h jī-sì, Gô-lô kun-tūi tsèng-sik tshim-lio̍k 烏克蘭 kàu taⁿ 280 gōa kang, ē-sái kóng sī 烏克蘭hō͘ Gô-lô tshi̍h teh thô͘-kha phah, mā-nā tsiàn-tshia, tōa-phàu sì-kè tōaⁿ, hui-tôaⁿ bô thêng, huat-tiān-tshiúⁿ, tsúi khò͘, tiān-le̍k tiān sìn hē-thóng siū phò-hoāi, liân tsin tsē pēⁿ-īⁿ, ha̍k-hāu mā hō in tsà-tsà-tiāu, si̍t-tsāi tsin khó-ó͘ⁿ! hó-ka-tsài í Bí-kok tshōa thâu ê Pak-iok kok-ka tsik-sî thê-kiong kok tsióng sin bú-khì tsi-oân, 烏克蘭 tsiah ē-tàng tòng kàu kin-á-ji̍t. Lán mā bat siūⁿ, 烏克蘭ná ē bô ài kā phah tò-tńg-khì?

　　 Bô gî-gō͘ tsa̍p-jī-gue̍h tshe-gō͘ thàu-tsá 6 tiám 4 pun, tī Gô-lô Salatobu（Saratov） tsiu ê Unkosu（Ingels） khong-kun ki-tē tso-siū-tio̍h tsū-sat bô-lâng-ki se̍k-kik, ín-huat tsiok tōa ê po̍k-tsà siaⁿ. Tsit-ê khong-kun ki-tē lī 烏克蘭 pian-kài ū 724 kong-lí, tī Gô-lô siú-to͘ Bo̍h-su-kho tang-lâm-hong iok 875 kong-lí ê só͘-tsāi, sī Gô-lô hiòng 烏克蘭 huat-siā hóe-tsìⁿ-tôaⁿ tsiàn-ki ê tsú-iàu khí-kàng tē, mā sī Gô-lô khong-kun ū tshiong-hun siat-pī, ē-tàng ūi tsìn-kong 烏克蘭ê tōa hêng hong-tsà-ki thê-kiong ûi-siu pó-ióng ê î-it ki-tē. Kúi kang tsêng kan-tia̍p ūi-tsheⁿ ū show tshut TU-90 kah TU-160 hong-tsà-ki tsū-tsi̍p ê só͘-tsāi. Po̍k-tsà huat-sing āu, bô siū hāi ê tsiàn-ki lóng-tsóng khí pue lī-khui ki-tē.

　　 Kâng tsi̍t kang thàu-tsá, lī 烏克蘭 pian-kéng 482 kong-lí ê Gô-lô tiong-pō͘ siâⁿ-tshī Latsan(Ryazan) hū-kīn ê Tsiagilebô(Dyagilevo) khong-kun ki-tē mā sī tso-siū-tio̍h bô-lâng-ki ê kong-kik. Tsit-ê khong-kun ki-tē ū thêng tsin tsē tsiah Gô-lô tōa hêng tsiàn-lio̍k hong-tsà-ki.

　　 烏克蘭 lāi-tsèng pō͘-tiúⁿ kò͘-būn Jielasenko (Anton Gerashtsenko) tī Twitter téng-bīn piáu-sī, ū siau-sit kóng Unkosu (Ingels) khong-kun ki-tē kah Tsiagilebô(Dyagilevo) khong-kun ki-tē ê kun-ki goân-pún ū-tēng beh tī tsa̍p-jī-gue̍h tshe-gō͘ tsá-khí tsip-hêng hong-tsà 烏克蘭 lêng-goân ki-tshó͘ siat-si ê jīm-bū. Bô siūⁿ-tio̍h 烏克蘭 sing tshut-tshiú.

　　 Gô-lô kok-hông-pō͘ tī siau-sit pha̍k-kng liáu-āu thiàu-tshut lâi piáu-sī, tsit nn̄g piàn kong-kik sū-kiāⁿ ū tsō-sêng 3 sí 4 siong, 2 tsiah Tu-95 hong-tsà-ki kah 1 tsiah Tu-22M̀ hong-tsà-ki húi sún

　　 Bû-sam put-sêng-lé, tsa̍p-jī-gue̍h tshe-la̍k tsá-khí, lī 烏克蘭 bô lōa hn̄g ê Khusukhu(Kursk) kun ēng ki-tiûⁿ mā tso-siū-tio̍h bô-lâng-ki se̍k-kik, ki-tiûⁿ lāi tsi̍t tsō tû-iû-tsô po̍k-tsà to̍h hóe, Gô-lô kuaⁿ-hong suan-tshing bô jîn-oân siong-bông.

Tē-it kang po̍k-tsà huat-sing kúi tiám-tsing āu, 烏克蘭 tsoân kéng khang-se̍k kéng-pò koh-tsài hiáng-khí. Gô-lô koh hiòng 烏克蘭 huat-tōng sin tsi̍t-pho ê hui-tôaⁿ kong-kik. 烏克蘭 tsóng-thóng kóng, goán í-king tsa̍h tiāu tsin tsē lia̍p hui-tôaⁿ, tān-sī iû-goân ín-huat tsin tsē só͘-tsāi thêng tiān.

　　 Gô-lô tsí-tsik 烏克蘭 kong-kik Gô-lô léng-thó͘. Tsin kî-koài, Gô-lô khì phah 烏克蘭 léng-thó͘ 280 gōa kang ná tshiūⁿ tsiâⁿ tsèng-tong, 烏克蘭tī Gô-lô kéng-lāi khian saⁿ-ê niā-niā tio̍h kaiⁿ-kaiⁿ kiò!

　　Oh, goân-lâi 烏克蘭mā ē-sái phah Gô-lô!

Tsù, 烏克蘭　　 tshiáⁿ liām Hôa-gí




　　2022年二月二四，俄羅軍隊正式侵略烏克蘭到taⁿ280外工，ē-sái講是烏克蘭hō͘俄羅tshih teh土腳拍，mā-nā戰車、大砲四界彈，飛彈無停，發電廠、水庫、電力電信系統受破壞，連真tsē病院、學校mā hō in炸炸掉，實在真可惡！好佳哉以美國tshōa頭ê北約國家即時提供各種新武器支援，烏克蘭才ētàng擋到今á日。咱mā bat想，烏克蘭náē無愛kā拍倒轉去？

　　無疑誤十二月初五透早6點4分，tī俄羅Salatobu（Saratov）州êUnkosu（Ingels）空軍基地遭受tio̍h自殺無人機襲擊，引發足大ê爆炸聲。Tsit-ê空軍基地離烏克蘭邊界有724公里，tī俄羅首都莫斯科東南方約875公里ê所在，是俄羅向烏克蘭發射火箭彈戰機ê主要起降地，mā是俄羅空軍有充分設備、ē-tàng為進攻烏克蘭ê大型轟炸機提供維修保養ê唯一基地。幾工前間諜衛星有show出TU-90 kah TU-160轟炸機聚集ê所在。爆炸發生後，無受害ê戰機lóng總起飛離開基地。

　　仝一工透早，離烏克蘭邊境482公里ê俄羅中部城市Latsan（Ryazan）附近êTsiagilebô（Dyagilevo）空軍基地mā是遭受tio̍h無人機ê攻擊。Tsit-ê空軍基地有停真tsē隻俄羅大型戰略轟炸機。

　　烏克蘭內政部長顧問Jielasenko（Anton Gerashtsenko）tīTwitter頂面表示，有消息講Unkosu（Ingels）空軍基地kah Tsiagilebô（Dyagilevo）空軍基地ê軍機原本預訂beh tī十二月初五早起執行轟炸烏克蘭能源基礎設施ê任務。無想tio̍h烏克蘭先出手。

　　俄羅國防部tī消息曝光了後跳出來表示，tsit兩遍攻擊事件有造成3死4傷，2隻Tu-95轟炸機kah 1隻Tu-22M̀轟炸機毀損

　　無三不成禮，十二月初六早起，離烏克蘭無lōa遠êKhusukhu（Kursk）軍用機場mā遭受tio̍h無人機襲擊，機場內一座儲油槽爆炸to̍h火，俄羅官方宣稱無人員傷亡。

第一工爆炸發生幾點鐘後，烏克蘭全境空襲警報再度響起。俄羅koh向烏克蘭發動新一波ê飛彈攻擊。烏克蘭總統講，阮已經tsa̍h掉真tsē粒飛彈，但是猶原引發真tsē所在停電。

　　俄羅指責烏克蘭攻擊俄羅領土。真奇怪，俄羅去拍烏克蘭領土280外工那像誠正當，烏克蘭tī俄羅境內khian三個niā-niā tio̍h kaiⁿ-kaiⁿ叫！

　　Oh，原來烏克蘭māē-sái拍俄羅！

註：烏克蘭　　請唸華語