《綠色短評》

 | | | 轉寄

中俄兩國頭人會談，ná有可能帶來烏克蘭和平！

作者 李南衡, TsoânTâijī/全台字 by Tsng Hūiphêng 2023.04.02


Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tiong Gô nn̄g kok thâulâng hōetâm, ná ū khólêng tòalâi 烏克蘭 hôpêng!

　　 Saⁿgue̍h jītsa̍p tsì jījī, Tiongkok kok ketsú 習近平 khì Bo̍hsukho kah Gôlô tsóngthóng Phûting hōetâm, lāṳông paukuat katshim siang pêng kuanhē, kingtsè lénghe̍k, koktsè kio̍ksè kah 烏克蘭 gûiki téng. Kîtiong hō͘ tsoân sèkài siōng kuansim ê sī 烏克蘭ê hôpêng. Saⁿgue̍h tshetsa̍p, toānkau tshit nî ê Ilóng kah 沙烏地阿拉伯 tī Tiongkok tshiâutshiok hia̍pgī tsi hā. Suanpò͘ tiôngkiàn gōakau kuanhē, só͘í ū lâng jīnûi, 習近平 piàⁿsì beh tshioksêng Gô O͘ tsiàntsing thêngtsiàn, tshiamtēng hôpêng tiâuiok. 習近平 ū khólêng ē tittio̍h 諾貝爾 hôpêng tsióng.

　　 Jīgue̍h jīsì, Gô O͘ tsiàntsing móa tsi̍t nî hit kang, Tiongkok ū thêtshut "kuanû tsèngtī káikuat 烏克蘭 gûiki ê Tiongkok li̍ptiûⁿ", thêtshut 12 tiám kónghuat, bô tsi̍t tiám tùi kiatsok Gô O͘ tsiàntsing ū pangtsō͘.

　　 Saⁿgue̍h tsa̍psaⁿ, Tiongkok gōakaupō͘ suanpò͘ tsi̍t lépài āu 習近平 beh khì hóngbūn Gôlô. Saⁿgue̍h tsa̍ptshit, koktsè hêngsū huatīⁿ (ICC) í huihuat kā jîtông tòa līkhui 烏克蘭 tsoh líiû, tùi Gôlô tsóngthóng Phûting huatpò͘ tsiàntsing tsōe tāipó͘ lēng, sîkan tsat kah tsiah túhó? Nátshiūⁿ sī sūnsòa kéngkò tsi̍t ji̍t kàu àm kóng bô beh hòngkhì búle̍k phah Tâioân ê 習近平, tshianbān m̄thang khì hoān tio̍h tsiàntsing tsōe!

Saⁿgue̍h jītsa̍p tsì jījī, Tiongkok kokka tsúse̍k習近平 tī Bo̍hsukho kah Gôlô tsóngthóng Phûting kìⁿbīn hōetâm, sianghong tī hōe āu liânha̍p singbêng tiong kiôngtiāu beh "thongkòe hôtâm" lâi káikuat 烏克蘭 gûiki. Tānsī sehong kokka puttsí kíntiuⁿ, khióngkiaⁿ Tiongkok ē tsháitshú gōakau ásī kingtsè ígōa ê tshiútōaⁿ, tsìn tsi̍tpō͘ tsitshî Gôlô —— thêkiong búkhì hō͘ Phûting tī tsiàntsing tiong súiōng —— jîtshiáⁿ kiankò͘ tsi̍tê hoántùi Pakiok kah Bíkok ê kiôngtōa tsi̍pthoân. Sehong kokka ê hoânló sī kegia̍h·ê," kiankò͘ tsi̍tê hoántùi Pakiok kah Bíkok ê kiôngtōa tsi̍pthoân" sī tsin·ê, tānsī "thêkiong búkhì hō͘ Phûting tī tsiàntsing tiong súiōng " sī bôkhólêng ê tāitsì. Tiongkok piáubīn siōng késian kóng kiaⁿ Pakiok kah Bíkok kā tsètshâi, sūsi̍t siōng sī Tiongkok ài Gôlô kèsio̍k tī 烏克蘭ê tsiàntsing, 習近平 tsúse̍k tsua̍ttùi bôkhólêng hiòng Phûting tsóngthóng si ap, khǹg i thêngtsí tsiàntsing tsōehêng kah pōhêng, sīmtsì khǹg i thiat tsáu kuntūi. Tsiàn jú ke̍klia̍t, tsiàn jú kú jú hó. Thi̍h phah ê sinthé mā bē khamtit saⁿ kang ê lo̍hsái, kèsio̍k tsiàn·lo̍hkhì, Gôlô ittēng ē siausán lo̍hbah, kui bóe Gôlô ē piàn tsoh Tiongkok láutōa singkhupiⁿ kiò tshùi ê "sèhàn ê". Tôngsî Pakiok kah Bíkok ê kok la̍t mā sī ē tōa sún, kàusî sèkài tsintsiàⁿ ê láutōa tio̍h sī Tiongkok.

　　 烏克蘭ê Tselensuki tsóngthóng ū thàulō͘ kóng 烏克蘭kah Gôlô ê hôpêng tâmphòaⁿ té sòaⁿ, Gôlô tio̍h hueho̍k 烏克蘭 léngthó͘ oântséng, tsuntiōng Liânha̍pkok hiàntsiuⁿ, pôesióng ittshè tsiàntsing súnsit, tênghua̍t múi tsi̍tê tshiokhoān tsiàntsing tsōe ê hoānlâng, íki̍p pótsèng bē koh tshimhoān 烏克蘭 téng tsiântê.

Gôlô tsóngthóng Phûting lāisim tsin siūⁿ beh thêng tsiàn, tānsī i tshùi ta̍h tsin ngē, i kóng 烏克蘭tio̍h tsintsiàⁿ tsòkàu "khì Nazi hòa","khì kunsū hòa" kah oântsoân tiongli̍p ê saⁿ tōa iàukiāⁿ, siōng iàukín ê sī i kóng, Gôlô ê kuntūi bô beh ùi só͘ tsiàm·tio̍h ê jīmhô thó͘tē thiatthè.

　　 Tiongkok, Gôlô nn̄g kok thâulâng hōetâm, ná ū khólêng tòalâi 烏克蘭 hôpêng? góa khòaⁿ, nn̄gê thâulâng tsíputkò sī ōe tsi̍tê khangkhak piáⁿ, hō͘ gōnglâng tsí íāu. 　　　(230324)

Tsù, 習近平 　　 烏克蘭　　 沙烏地阿拉伯 　　諾貝爾 tshiáⁿ liām Hôagí


Pe̍h-ōe-jī-pán/白話字版


《 Le̍k-sik toán-phêng 》 Lí Lâm-hêng

Tiong Gô nn̄g kok thâu-lâng hōe-tâm, ná ū khó-lêng tòa-lâi 烏克蘭 hô-pêng!

　　 Saⁿ-gue̍h jī-tsa̍p tsì jī-jī, Tiong-kok kok ke-tsú 習近平 khì Bo̍h-su-kho kah Gô-lô tsóng-thóng Phû-ting hōe-tâm, lāi-iông pau-kuat ka-tshim siang pêng kuan-hē, king-tsè léng-he̍k, kok-tsè kio̍k-sè kah 烏克蘭 gûi-ki téng. Kî-tiong hō͘ tsoân sè-kài siōng kuan-sim ê sī 烏克蘭ê hô-pêng. Saⁿ-gue̍h tshe-tsa̍p, toān-kau tshit nî ê I-lóng kah 沙烏地阿拉伯 tī Tiong-kok tshiâu-tshiok hia̍p-gī tsi hā. Suan-pò͘ tiông-kiàn gōa-kau kuan-hē, só͘-í ū lâng jīn-ûi, 習近平 piàⁿ-sì beh tshiok-sêng Gô O͘ tsiàn-tsing thêng-tsiàn, tshiam-tēng hô-pêng tiâu-iok. 習近平 ū khó-lêng ē tit-tio̍h 諾貝爾 hô-pêng tsióng.

　　 Jī-gue̍h jī-sì, Gô O͘ tsiàn-tsing móa tsi̍t nî hit kang, Tiong-kok ū thê-tshut "kuan-û tsèng-tī kái-kuat 烏克蘭 gûi-ki ê Tiong-kok li̍p-tiûⁿ", thê-tshut 12 tiám kóng-huat, bô tsi̍t tiám tùi kiat-sok Gô O͘ tsiàn-tsing ū pang-tsō͘.

　　 Saⁿ-gue̍h tsa̍p-saⁿ, Tiong-kok gōa-kau-pō͘ suan-pò͘ tsi̍t lé-pài āu 習近平 beh khì hóng-būn Gô-lô. Saⁿ-gue̍h tsa̍p-tshit, kok-tsè hêng-sū huat-īⁿ (ICC) í hui-huat kā jî-tông tòa lī-khui 烏克蘭 tsoh lí-iû, tùi Gô-lô tsóng-thóng Phû-ting huat-pò͘ tsiàn-tsing tsōe tāi-pó͘ lēng, sî-kan tsat kah tsiah tú-hó? Ná-tshiūⁿ sī sūn-sòa kéng-kò tsi̍t ji̍t kàu àm kóng bô beh hòng-khì bú-le̍k phah Tâi-oân ê 習近平, tshian-bān m̄-thang khì hoān tio̍h tsiàn-tsing tsōe!

Saⁿ-gue̍h jī-tsa̍p tsì jī-jī, Tiong-kok kok-ka tsú-se̍k習近平 tī Bo̍h-su-kho kah Gô-lô tsóng-thóng Phû-ting kìⁿ-bīn hōe-tâm, siang-hong tī hōe āu liân-ha̍p sing-bêng tiong kiông-tiāu beh "thong-kòe hô-tâm" lâi kái-kuat 烏克蘭 gûi-ki. Tān-sī se-hong kok-ka put-tsí kín-tiuⁿ, khióng-kiaⁿ Tiong-kok ē tshái-tshú gōa-kau á-sī king-tsè í-gōa ê tshiú-tōaⁿ, tsìn tsi̍t-pō͘ tsi-tshî Gô-lô —— thê-kiong bú-khì hō͘ Phû-ting tī tsiàn-tsing tiong sú-iōng —— jî-tshiáⁿ kian-kò͘ tsi̍t-ê hoán-tùi Pak-iok kah Bí-kok ê kiông-tōa tsi̍p-thoân. Se-hong kok-ka ê hoân-ló sī ke-gia̍h-·ê," kian-kò͘ tsi̍t-ê hoán-tùi Pak-iok kah Bí-kok ê kiông-tōa tsi̍p-thoân" sī tsin-·ê, tān-sī "thê-kiong bú-khì hō͘ Phû-ting tī tsiàn-tsing tiong sú-iōng " sī bô-khó-lêng ê tāi-tsì. Tiong-kok piáu-bīn siōng ké-sian kóng kiaⁿ Pak-iok kah Bí-kok kā tsè-tshâi, sū-si̍t siōng sī Tiong-kok ài Gô-lô kè-sio̍k tī 烏克蘭ê tsiàn-tsing, 習近平 tsú-se̍k tsua̍t-tùi bô-khó-lêng hiòng Phû-ting tsóng-thóng si ap, khǹg i thêng-tsí tsiàn-tsing tsōe-hêng kah pō-hêng, sīm-tsì khǹg i thiat tsáu kun-tūi. Tsiàn jú ke̍k-lia̍t, tsiàn jú kú jú hó. Thi̍h phah ê sin-thé mā bē kham-tit saⁿ kang ê lo̍h-sái, kè-sio̍k tsiàn-·lo̍h-khì, Gô-lô it-tēng ē siau-sán lo̍h-bah, kui bóe Gô-lô ē piàn tsoh Tiong-kok láu-tōa sing-khu-piⁿ kiò tshùi ê "sè-hàn ê". Tông-sî Pak-iok kah Bí-kok ê kok la̍t mā sī ē tōa sún, kàu-sî sè-kài tsin-tsiàⁿ ê láu-tōa tio̍h sī Tiong-kok.

　　 烏克蘭ê Tselen-su-ki tsóng-thóng ū thàu-lō͘ kóng 烏克蘭kah Gô-lô ê hô-pêng tâm-phòaⁿ té sòaⁿ, Gô-lô tio̍h hue-ho̍k 烏克蘭 léng-thó͘ oân-tséng, tsun-tiōng Liân-ha̍p-kok hiàn-tsiuⁿ, pôe-sióng it-tshè tsiàn-tsing sún-sit, têng-hua̍t múi tsi̍t-ê tshiok-hoān tsiàn-tsing tsōe ê hoān-lâng, í-ki̍p pó-tsèng bē koh tshim-hoān 烏克蘭 téng tsiân-tê.

Gô-lô tsóng-thóng Phû-ting lāi-sim tsin siūⁿ beh thêng tsiàn, tān-sī i tshùi ta̍h tsin ngē, i kóng 烏克蘭tio̍h tsin-tsiàⁿ tsò-kàu "khì Nazi hòa","khì kun-sū hòa" kah oân-tsoân tiong-li̍p ê saⁿ tōa iàu-kiāⁿ, siōng iàu-kín ê sī i kóng, Gô-lô ê kun-tūi bô beh ùi só͘ tsiàm-·tio̍h ê jīm-hô thó͘-tē thiat-thè.

　　 Tiong-kok, Gô-lô nn̄g kok thâu-lâng hōe-tâm, ná ū khó-lêng tòa-lâi 烏克蘭 hô-pêng? góa khòaⁿ, nn̄g-ê thâu-lâng tsí-put-kò sī ōe tsi̍t-ê khang-khak piáⁿ, hō͘ gōng-lâng tsí í-āu. 　　　(230324)

Tsù, 習近平 　　 烏克蘭　　 沙烏地阿拉伯 　　諾貝爾 tshiáⁿ liām Hôa-gí



　　三月二十至二二，中國國家主席習近平去莫斯科kah俄羅總統浮丁會談，內容包括加深雙旁關係，經濟領域，國際局勢kah烏克蘭危機等。其中hō͘全世界上關心ê是烏克蘭ê和平。三月初十，斷交七年ê伊朗kah沙烏地阿拉伯tī中國tshiâu促協議之下。宣布重建外交關係，所以有人認為，習近平拼勢beh促成俄烏戰爭停戰、簽訂和平條約。習近平有可能ē得tio̍h諾貝爾和平獎。

　　二月二四，俄烏戰爭滿一年hit工，中國有提出「關於政治解決烏克蘭危機ê中國立場」，提出12點講法，無一點對結束俄烏戰爭有幫助。

　　三月十三，中國外交部宣布一禮拜後習近平beh去訪問俄羅。三月十七，國際刑事法院（ICC）以非法kā兒童帶離開烏克蘭作理由，對俄羅總統浮丁發布戰爭罪逮捕令，時間tsat kah tsiah tú好？ná像是順續警告一日到暗講無beh放棄武力拍台灣ê習近平，千萬m̄-thang去犯tio̍h戰爭罪！

三月二十至二二，中國國家主席習近平tī莫斯科kah俄羅總統浮丁見面會談，雙方tī會後聯合聲明中強調beh「通過和談」來解決烏克蘭危機。但是西方國家不止緊張，恐驚中國ē採取外交抑是經濟以外ê手段，進一步支持俄羅——提供武器hō͘浮丁tī戰爭中使用——而且堅固一个反對北約kah美國ê強大集團。西方國家ê煩惱是加額ê，「堅固一个反對北約kah美國ê強大集團」是真ê，但是「提供武器hō͘浮丁tī戰爭中使用」是無可能ê代誌。中國表面上假仙講驚北約kah美國kā制裁，事實上是中國愛俄羅繼續tī烏克蘭ê戰爭，習近平主席絕對無可能向浮丁總統施壓，勸伊停止戰爭罪行kah暴行，甚至勸伊撤走軍隊。戰愈激烈、戰愈久愈好。鐵拍ê身體mā bē堪得三工ê落屎，繼續戰落去，俄羅一定ē消瘦落肉，歸尾俄羅ē變作中國老大身軀邊叫嘴ê「細漢ê」。同時北約kah美國ê國力mā是ē大損，到時世界真正ê老大tio̍h是中國。

　　烏克蘭ê Tselen-su-ki總統有透露講烏克蘭kah俄羅ê和平談判底線：俄羅tio̍h恢復烏克蘭領土完整、尊重聯合國憲章、賠償一切戰爭損失、懲罰每一个觸犯戰爭罪ê犯人，以及保證bē koh侵犯烏克蘭等前提。

俄羅總統浮丁內心真想beh停戰，但是伊嘴踏真硬，伊講烏克蘭tio̍h真正做到「去納粹化」、「去軍事化」kah完全中立ê三大要件，上要緊ê是伊講，俄羅ê軍隊無beh ùi所佔tio̍hê任何土地撤退。

　　中國、俄羅兩國頭人會談，ná有可能帶來烏克蘭和平？我看，兩个頭人只不過是畫一个空殼餅，hō͘戇人止枵。　　　(230324)

註：習近平　　烏克蘭　　沙烏地阿拉伯　　諾貝爾 請唸華語