《綠色短評》

 | | | 轉寄

馬英九前總統專工去中國卸世眾！

作者 李南衡, TsoânTâijī/全台字 by Tsng Hūiphêng 2023.04.16



Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Má Ingkiú tsêng tsóngthóng tsuankang khì Tiongkok siàsìtsèng!

　　 Saⁿgue̍h jītshit tiongtàu, Má Ingkiú tsêng tsóngthóng pue khì Tiongkok, i kakī kóng sī "tsè tsó͘ hôpêng tsi lí", tse sī nn̄g hōaⁿ hun tī 74 nî lâi, thâu tsi̍tê Tionghôa Bînkok sià jīm tsóngthóng khì Tiongkok. I ê tsè tsó͘ hêngthêng ītēng 12 kang, sing pe Siōnghái, liáuāu khì Lâmkiaⁿ, Búhàn, Tn̂gsua, Tiōngkhèng kah Siōnghái téng siâⁿtshī. I iáu bōe tshuthuat sing hongtōng, Tiongkok ê bāng bîn tshut siaⁿ huangêng kóng," 馬娘娘來了!" "tshàu khittsia̍h lâi ah" "i lâi phiàn tsia̍h phiàn lim phiàn keⁿ̄g!" Tiongkok Kokbîntóng ūkàu sue, hō͘ i liânlūi hông mē tsoh "百年爛黨".

　　 Saⁿgue̍h jīpeh, Má Ingkiú thâu tsi̍tê hêngthêng sī khì Lâmkiaⁿ Tiongsanlêng, i ū thêkhí Sun Tiongsan tshòng kiàn Bînkok, huatpiáu kongkhai tì sû mā ū thêkhí Tionghôa Bînkok. Tānsī Tiongkok Tiongiong tiānsītâi huat pò͘ ê sinbûn siòngphìⁿ kah iáⁿim ōebīn, kanta lâu i ê têjī kah sèⁿmiâ, kîtha lóng tsóng tsián tiāu. Lo̍h khoán siá "pah tsa̍pjī·saⁿ·jītsa̍p peh", liân "Bînkok" nn̄gjī to m̄ káⁿ siá, mā hông tsián tsián tiāu. Tshamkuan Tiongsanlêng, Má Ingkiú ê tìsû kóng, nn̄g hōaⁿ jînbîn kāngkhoán sio̍k Tionghôa bîntso̍k, lóng sī Iāmn̂g kiáⁿsun. I tsòeāu thêtshut "hôpêng hùntàu, tsínhing Tionghôa" ê bo̍kphiau, tshimtshim ǹgbāng nn̄g hōaⁿ kiōngtông ló͘le̍k, tuikiû hôpêng, phiahbián tsiàntsing, tsīnla̍t tsínhing Tionghôa. Tse sī nn̄g hōaⁿ Tiongkok lâng bētàng siámphiah ê tsikjīm, lán ittēng tio̍h ló͘le̍k si̍thiān.

Tsin sitlé, saⁿgue̍h jīit, Tâioân bînì kikimhōe huatpiáu saⁿgue̍h Tâioân jînbîn tso̍k jīntông bîniāu pòkò, huathiān, 78% jīnûi kakī sī Tâioân lâng, 7.7% jīnûi kakī sī Tiongkok lâng. Lēnggōa 9.1% jīnûi kakī sī Tâioân lâng mā sī Tiongkok lâng. Tē saⁿ tsióng lâng lán mài kā kèsǹg. Lán ittēng ài thêtshéⁿ Má Ingkiú kah Tiongkok lâng, sūsi̍t siōng kináji̍t tī Tâioân jīnûi kakī sī Tiongkok lâng ê kanta 7.7% niāniā, 78% tsiàm tōatosò͘ ê lâng jīnûi kakī sī Tâioân lâng, ka lín Tiongkok lâng beh tshòng siáⁿ bô kuanhē, mài kā goán thua thua lo̍hkhì!

Saⁿgue̍h jīpeh ēpo͘, Má Ingkiú khì tsham hóng "Tiongkok kīntāisú ìtsí phokbu̍tkoán", he sī tsátsêng Tiongkok Kokbîntóng sîtāi Tionghôa Bînkok tsènghú tī Lâmkiaⁿ ê Tsóngthónghú. Bat tsoh kòe Tiongkok Kokbîntóng tsúse̍k, Tionghôa Bînkok tsóngthóng ê Má Ingkiú, nā iáu ū tsi̍t tiám tiám á tsūtsun sim, tsai kiànsiàu, ingkai siámkhui, phiahbián khì hitkhoán só͘tsāi, i khì tshamkuan hitkhoán só͘tsāi bêngbêng tio̍h sī phóng sái buah bīn, siàsì siàtsèng.

Saⁿgue̍h saⁿtsa̍p, Má Ingkiú tsêng tsóngthóng tshamhóng Tiongkok Búhàn tshī tòngànkoán, tōatōa oló Tiongkok hônge̍k sêngkó bô tōapak hiòng gōa khoktiong, sī "tùi jînlūi ê kònghiàn". Lán lóng tsaiiáⁿ 2000 nî itgue̍h jīsaⁿ, Búhàn khaisí hong siâⁿ tsìntsêng, tsi̍t tōatīn lâng tio̍h tsáulī Búhàn, tsáukhì tsoân Tiongkok múi tsi̍tê kaklo̍h, tsi̍t tōatīn lâng tsáukhì Kńgtsiu, Hiangkáng, tsoánpue khì tsoân sèkài kok só͘tsāi, tsin kín tsoân Tiongkok bô tsi̍tê séng tshī tsūtì khu bô tio̍htse, Búhàn hìiām tsin kín tio̍h thòaⁿ kàu tsoân sèkài kok kok. Kàu kiⁿî sìgue̍h tshesì ûitsí, tsoân sèkài ū tio̍h kòe Búhàn hìiām ê lâng tshiaukòe 6 ik 7,664 bān, síbông jînsò͘ tshiaukòe 686 bān, iáu bô sǹg kingtsè huattián kah lângbîn singua̍h só͘ siūtio̍h ê pitshám énghióng, tsiahê lóng sī Tiongkok Búhàn ê hó khankhioh. Kàu kináji̍t iáu ū tsin tsē kikò͘ teh tuitsa, Búhàn hìiām ū khólêng huatsing ê khígoân tē Búhàn si̍tgiām sik. Má Ingkiú tōatōa oló Tiongkok hônge̍k sêngkó bô tōapak hiòng gōa khoktiong, sī "tùi jînlūi ê kònghiàn". Si̍ttsāi siàsìtsèng! (230407)

Tsù , 馬娘娘來了 百年爛黨 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

Má Ing-kiú tsêng tsóng-thóng tsuan-kang khì Tiong-kok sià-sì-tsèng!

　　 Saⁿ-gue̍h jī-tshit tiong-tàu, Má Ing-kiú tsêng tsóng-thóng pue khì Tiong-kok, i ka-kī kóng sī "tsè tsó͘ hô-pêng tsi lí", tse sī nn̄g hōaⁿ hun tī 74 nî lâi, thâu tsi̍t-ê Tiong-hôa Bîn-kok sià jīm tsóng-thóng khì Tiong-kok. I ê tsè tsó͘ hêng-thêng ī-tēng 12 kang, sing pe Siōng-hái, liáu-āu khì Lâm-kiaⁿ, Bú-hàn, Tn̂g-sua, Tiōng-khèng kah Siōng-hái téng siâⁿ-tshī. I iáu bōe tshut-huat sing hong-tōng, Tiong-kok ê bāng bîn tshut siaⁿ huan-gêng kóng," 馬娘娘來了!" "tshàu khit-tsia̍h lâi ah" "i lâi phiàn tsia̍h phiàn lim phiàn ke-nn̄g!" Tiong-kok Kok-bîn-tóng ū-kàu sue, hō͘ i liân-lūi hông mē tsoh "百年爛黨".

　　 Saⁿ-gue̍h jī-peh, Má Ing-kiú thâu tsi̍t-ê hêng-thêng sī khì Lâm-kiaⁿ Tiong-san-lêng, i ū thê-khí Sun Tiong-san tshòng kiàn Bîn-kok, huat-piáu kong-khai tì sû mā ū thê-khí Tiong-hôa Bîn-kok. Tān-sī Tiong-kok Tiong-iong tiān-sī-tâi huat pò͘ ê sin-bûn siòng-phìⁿ kah iáⁿ-im ōe-bīn, kan-ta lâu i ê tê-jī kah sèⁿ-miâ, kî-tha lóng tsóng tsián tiāu. Lo̍h khoán siá "pah tsa̍p-jī·saⁿ·jī-tsa̍p peh", liân "Bîn-kok" nn̄g-jī to m̄ káⁿ siá, mā hông tsián tsián tiāu. Tsham-kuan Tiong-san-lêng, Má Ing-kiú ê tì-sû kóng, nn̄g hōaⁿ jîn-bîn kāng-khoán sio̍k Tiong-hôa bîn-tso̍k, lóng sī Iām-n̂g kiáⁿ-sun. I tsòe-āu thê-tshut "hô-pêng hùn-tàu, tsín-hing Tiong-hôa" ê bo̍k-phiau, tshim-tshim ǹg-bāng nn̄g hōaⁿ kiōng-tông ló͘-le̍k, tui-kiû hô-pêng, phiah-bián tsiàn-tsing, tsīn-la̍t tsín-hing Tiong-hôa. Tse sī nn̄g hōaⁿ Tiong-kok lâng bē-tàng siám-phiah ê tsik-jīm, lán it-tēng tio̍h ló͘-le̍k si̍t-hiān.

Tsin sit-lé, saⁿ-gue̍h jī-it, Tâi-oân bîn-ì ki-kim-hōe huat-piáu saⁿ-gue̍h Tâi-oân jîn-bîn tso̍k jīn-tông bîn-iāu pò-kò, huat-hiān, 78% jīn-ûi ka-kī sī Tâi-oân lâng, 7.7% jīn-ûi ka-kī sī Tiong-kok lâng. Lēng-gōa 9.1% jīn-ûi ka-kī sī Tâi-oân lâng mā sī Tiong-kok lâng. Tē saⁿ tsióng lâng lán mài kā kè-sǹg. Lán it-tēng ài thê-tshéⁿ Má Ing-kiú kah Tiong-kok lâng, sū-si̍t siōng kin-á-ji̍t tī Tâi-oân jīn-ûi ka-kī sī Tiong-kok lâng ê kan-ta 7.7% niā-niā, 78% tsiàm tōa-to-sò͘ ê lâng jīn-ûi ka-kī sī Tâi-oân lâng, ka lín Tiong-kok lâng beh tshòng siáⁿ bô kuan-hē, mài kā goán thua thua lo̍h-khì!

Saⁿ-gue̍h jī-peh ē-po͘, Má Ing-kiú khì tsham hóng "Tiong-kok kīn-tāi-sú ì-tsí phok-bu̍t-koán", he sī tsá-tsêng Tiong-kok Kok-bîn-tóng sî-tāi Tiong-hôa Bîn-kok tsèng-hú tī Lâm-kiaⁿ ê Tsóng-thóng-hú. Bat tsoh kòe Tiong-kok Kok-bîn-tóng tsú-se̍k, Tiong-hôa Bîn-kok tsóng-thóng ê Má Ing-kiú, nā iáu ū tsi̍t tiám tiám á tsū-tsun sim, tsai kiàn-siàu, ing-kai siám-khui, phiah-bián khì hit-khoán só͘-tsāi, i khì tsham-kuan hit-khoán só͘-tsāi bêng-bêng tio̍h sī phóng sái buah bīn, sià-sì sià-tsèng.

Saⁿ-gue̍h saⁿ-tsa̍p, Má Ing-kiú tsêng tsóng-thóng tsham-hóng Tiong-kok Bú-hàn tshī tòng-àn-koán, tōa-tōa o-ló Tiong-kok hông-e̍k sêng-kó bô tōa-pak hiòng gōa khok-tiong, sī "tùi jîn-lūi ê kòng-hiàn". Lán lóng tsai-iáⁿ 2000 nî it-gue̍h jī-saⁿ, Bú-hàn khai-sí hong siâⁿ tsìn-tsêng, tsi̍t- tōa-tīn lâng tio̍h tsáu-lī Bú-hàn, tsáu-khì tsoân Tiong-kok múi tsi̍t-ê kak-lo̍h, tsi̍t- tōa-tīn lâng tsáu-khì Kńg-tsiu, Hiang-káng, tsoán-pue khì tsoân sè-kài kok só͘-tsāi, tsin kín tsoân Tiong-kok bô tsi̍t-ê séng tshī tsū-tì khu bô tio̍h-tse, Bú-hàn hì-iām tsin kín tio̍h thòaⁿ kàu tsoân sè-kài kok kok. Kàu kin-nî sì-gue̍h tshe-sì ûi-tsí, tsoân sè-kài ū tio̍h kòe Bú-hàn hì-iām ê lâng tshiau-kòe 6 ik 7,664 bān, sí-bông jîn-sò͘ tshiau-kòe 686 bān, iáu bô sǹg king-tsè huat-tián kah lâng-bîn sing-ua̍h só͘ siū-tio̍h ê pi-tshám éng-hióng, tsiah-ê lóng sī Tiong-kok Bú-hàn ê hó khan-khioh. Kàu kin-á-ji̍t iáu ū tsin tsē ki-kò͘ teh tui-tsa, Bú-hàn hì-iām ū khó-lêng huat-sing ê khí-goân tē -- Bú-hàn si̍t-giām sik. Má Ing-kiú tōa-tōa o-ló Tiong-kok hông-e̍k sêng-kó bô tōa-pak hiòng gōa khok-tiong, sī "tùi jîn-lūi ê kòng-hiàn". Si̍t-tsāi sià-sì-tsèng! (230407)

Tsù , 馬娘娘來了 百年爛黨 tshiáⁿ liām Hôa-gí





　　三月二七中晝，馬英九前總統飛去中國，伊家己講是「祭祖和平之旅」，tse是兩岸分治74年來，頭一個中華民國卸任總統去中國。伊ê祭祖行程預定12工，先飛上海，了後去南京、武漢、長沙、重慶kah上海等城市。伊猶未出發先轟動，中國ê網民出聲歡迎講：「馬娘娘來了！」「臭乞食來ah」「伊來騙食騙飲騙雞卵！」中國國民黨有夠衰，hō͘伊連累hông罵作「百年爛黨」。

　　三月二八，馬英九頭一個行程是去南京中山陵，伊有提起國父孫中山創建民國，發表公開致詞mā有提起中華民國。但是中國中央電視台發布ê新聞相片kah影音畫面，kan-ta留伊ê題字kah姓名，其他lóng總剪掉。落款寫「百十二．三．廿八」，連「民國」兩字都m̄敢寫，mā hông剪剪掉。參觀中山陵，馬英九ê致詞講：兩岸人民仝款屬中華民族，lóng是炎黃子孫。伊最後提出「和平奮鬥、振興中華」ê目標，深深向望兩岸共同努力，追求和平、避免戰爭，盡力振興中華。tse是兩岸中國人bē-tàng閃避ê責任，咱一定tio̍h努力實現。

真失禮，三月二一，台灣民意基金會發表三月台灣人民族認同民調報告，發現：78%認為家己是台灣人，7.7%認為家己是中國人。另外9.1%認為家己是台灣人mā是中國人。第三種人咱mài kā計算。咱一定愛提醒馬英九kah中國人，事實上今á日tī台灣認為家己是中國人ê kan-ta 7.7% niā-niā，78%佔大多數ê人認為家己是台灣人，ka恁中國人beh創啥無關係，mài kā阮拖拖落去！

三月二八下晡，馬英九去參訪「中國近代史遺址博物館」，he是早前中國國民黨時代中華民國政府tī南京ê總統府。Bat作過中國國民黨主席、中華民國總統ê馬英九，若猶有一點點á自尊心、知見笑，應該閃開、避免去hit款所在，伊去參觀hit款所在明明tio̍h是捧屎抹面，卸世卸眾。

三月三十，馬英九前總統參訪中國武漢市檔案館，大大o-ló中國防疫成果無大幅向外擴張，是「對人類ê貢獻」。咱lóng知影2000年一月二三，武漢開始封城進前，一大陣人tio̍h走離武漢，走去全中國每一個角落，一大陣人走去廣州、香港，轉飛去全世界各所在，真緊全中國無一個省市自治區無tio̍h災，武漢肺炎真緊tio̍h湠到全世界各國。到今年四月初四為止，全世界有tio̍h過武漢肺炎ê人超過6億7,664萬，死亡人數超過686萬，猶無算經濟發展kah人民生活所受tio̍hê悲慘影響，tsiah-êlóng是中國武漢ê好牽拾。到今á日猶有真tsē機構teh追查，武漢肺炎有可能發生ê起源地—武漢實驗室。馬英九大大o-ló中國防疫成果無大幅向外擴張，是「對人類ê貢獻」。實在卸世眾！ (230407)
註1：卸世眾（sìa-sì-tsèng） 註2：馬娘娘來了　百年爛黨 請唸華語