《綠色短評》

 | | | 轉寄

中國「武統台灣」ná ē lú huah lú細聲？

作者 李南衡, TsoânTâijī/全台字 by Tsng Hūiphêng 2023.06.04

Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　　 Lí Lâmhêng

　　 Tiongkok "búthóng Tâioân" ná ē lú huah lú sèsiaⁿ?

　　 Gō͘gue̍h jīsì, Tiongkok Kokbîntóng tiàukhui kìtsiáhōe, kóng mênî tōasoán sī tsiàntsing kah hôpêng soánkí, phuephêng Tshòa Ingbûn tsóngthóng kah Lōa Tshingtik hù tsóngthóng sī "tsiàntsing hoàná" ê kiōng hoān kiatkò͘. Tshiò sílâng! "tsiàntsing hoàná" sī Tiongkok, tsi̍t ji̍t kàu àm kah "tsiàntsing hoàná" sái ba̍kbóe·ê tsiàⁿ sī Tiongkok Kokbîntóng. Tiongkok tsitê "tsiàntsing hoàná" itti̍t huah kóng beh ēng búle̍k thóngit Tâioân ("búthóng Tâioân"), kiaⁿ lán Tâioânlâng bô ài siongsìn, Tiongkok kunki kunlām làng sî bô làng ji̍t lâi lán Tâioân Hângkhong Sikpia̍t Hhu kah Háikiap Tiongsòaⁿ hūkīn jiáuloān. Tsòikīn "búthóng Tâioân" ê siaⁿim ná ē lú lâi lú sèsiaⁿ?

　　 Tiongkok ê khongkhì ná ē piàn hiah kín? Tiongkok thâulâng kúi nî lâi káⁿ m̄ sī itti̍t kiôngtiāu, Tiongkok bô beh hòngkhì ēng búle̍k phah Tâioân. Nn̄g kò͘ gue̍h tsêng, Tiongkok Káihòngkun siōngtsiong Lâu Atsiu huatpiáu tsi̍t phiⁿ 《Κimmn̂g tsiànik kiámthó 》, Κimmn̂g Ēmn̂g hiahni̍h kīn, Tiongkok to̍h phah bē iâⁿ, keh tsi̍tê Tâioân háikiap pêngkin ū 180 konglí khuah, siōng e̍h ê ūi mā iáu ū 128 konglí khuah, Tiongkok Káihòngkun sī beh ántsóaⁿ phah Tâioân leh? ánne sé bīn oântsoân sī gāi tio̍h 習近平 ê phīⁿ! lia̍h·khílâi, nátshiūⁿ iáu bōe phòaⁿ hêng. Tsiah kòe nn̄g kò͘ gue̍h, Tiongkok tio̍h ēsái mē kóng beh "búthóng Tâioân" ê lâng sī gōnglâng ásī siáⁿmi̍h pháiⁿ sim.

　　Tsit saⁿ nî Búhàn hìiām, hāi Tiongkok kingtsè huattián thêngtùn, gōakok tshiúⁿsiong tōa thiatthè, tsáu liáuliáu. Tùi Tiongkok kingtsè huattián tongjiân tōa siong. Tēhng tsènghú hū tsè lúilúi, tēhng gînhâng khiàm jînbîn tsîⁿ bôtsâitiāu hêng, jînbîn oànsiaⁿ sù khí. Tsòikīn Búhàn hìiām koh huatsio·khílâi, tsiàu Tiongkok tsuanka Tsiong Lâmsan kóng, kàu gō͘gue̍h té, pêngkin múi lépài ē ū 4,000 bān lâng khaktsín, kàu la̍kgue̍h té, pêngkin múi lépài ē ū 6,500 bān lâng khaktsín. Tsit nn̄g nî, Bíkok kakiông kasok bútsong Tâioân. Hiānhiān khòaⁿ sèkài tējī tōa kunsū kiôngkok Gôlô, phah tsi̍tê siósió ê 烏克蘭, goânpún siūⁿ kóng tsiàmniá 烏克蘭nátshiūⁿ tohténg ni kam, bô siūⁿ tioh tsiahni̍h khùnlân, ni kam ê tshiú hiámhiámá hông tok·khì. Tiongkok tongjiân ū tehkhòaⁿ, Gôlô khì 烏克蘭ê lō͘ pêⁿ tháⁿtháⁿ, to̍h phah kah tsiah kankhó͘, hôhòng Tiongkok Tâioân keh tsi̍tê Tâioân háikiap?

　　 Tsoân sèkài bîntsú kokka ê hōegī lóng ē thêkhí, Tâioân háikiap ū tāitsì, tio̍h sī sèkài ê tāitsì. Nátshiūⁿ lóng sī kóng tsin ê. Tiongkok bēsái tèⁿ m̄tsai.

　　 Tiongkok tsit kúi nî itti̍t suanthoân, hō͘ Tiongkok jînbîn siongsìn búthóng Tâioân ê tsiàntsing ittēng ē huatsing. Búthóng Tâioân tshá liáu siuⁿkòe thâu, gō͘gue̍h tshe, Tiongkok thiaukang hō͘ Tiongkok khólêng ē hāmji̍p"sì bīn tsoktsiàn" ê bûntsiuⁿ tī bānglō͘ téngbīn ti̍tti̍t thôaⁿ. Bûntsiuⁿ kóng Tiongkok nā "búthóng Tâioân", Tiongkok sûisî tio̍h bīntùi sì tiâu tsiànsòaⁿ, tē 1 tiâu tsiànsòaⁿ tī Tâioân háikiap, kah Bíkok, Tâioân, Ji̍tpún ê bútsong le̍kliōng tsiàntàu. Tē 2 tiâu tsiànsòaⁿ tī tangpakhong, Bíkok khólêng liânha̍p Hânkok hiòng Tiongkok tangpak kongkik. Tē 3 tiâu tsiànsòaⁿ tī Lâmhái, Bíkok khólêng liânha̍p Huilu̍tpin, sīmtsì Òtsiu kah Tanglâma kokka tùi Τiongkiōng kongkik. Tē 4 tiâu tsiànsòaⁿ tī sailâmhong, Ìntō͘ khólêng ē thàn Tiongkok hāmji̍p tsiànkio̍k lâi tsìnkong TiongÌn piankéng.

　　 Lán bô kiaⁿ Tiongkok phah Tâioân. Siōng kiaⁿ Tâioân lâng bô kângsim. Tsintsiàⁿ thoânkiat khílâi, siáⁿmi̍h mā m̄ kiaⁿ! (230526)

Tsù, 習近平 烏克蘭 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》　　 Lí Lâm-hêng

　　 Tiong-kok "bú-thóng Tâi-oân" ná ē lú huah lú sè-siaⁿ?

　　 Gō͘-gue̍h jī-sì, Tiong-kok Kok-bîn-tóng tiàu-khui kì-tsiá-hōe, kóng mê-nî tōa-soán sī tsiàn-tsing kah hô-pêng soán-kí, phue-phêng Tshòa Ing-bûn tsóng-thóng kah Lōa Tshing-tik hù tsóng-thóng sī "tsiàn-tsing hoàn-á" ê kiōng hoān kiat-kò͘. Tshiò sí-lâng! "tsiàn-tsing hoàn-á" sī Tiong-kok, tsi̍t ji̍t kàu àm kah "tsiàn-tsing hoàn-á" sái ba̍k-bóe-·ê tsiàⁿ sī Tiong-kok Kok-bîn-tóng. Tiong-kok tsit-ê "tsiàn-tsing hoàn-á" it-ti̍t huah kóng beh ēng bú-le̍k thóng-it Tâi-oân ("bú-thóng Tâi-oân"), kiaⁿ lán Tâi-oân-lâng bô ài siong-sìn, Tiong-kok kun-ki kun-lām làng sî bô làng ji̍t lâi lán Tâi-oân Hâng-khong Sik-pia̍t Hhu kah Hái-kiap Tiong-sòaⁿ hū-kīn jiáu-loān. Tsòe-kīn "bú-thóng Tâi-oân" ê siaⁿ-im ná ē lú lâi lú sè-siaⁿ?

　　 Tiong-kok ê khong-khì ná ē piàn hiah kín? Tiong-kok thâu-lâng kúi nî lâi káⁿ m̄ sī it-ti̍t kiông-tiāu, Tiong-kok bô beh hòng-khì ēng bú-le̍k phah Tâi-oân. Nn̄g kò͘ gue̍h tsêng, Tiong-kok Kái-hòng-kun siōng-tsiong Lâu A-tsiu huat-piáu tsi̍t phiⁿ 《Κim-mn̂g tsiàn-ik kiám-thó 》, Κim-mn̂g Ē-mn̂g hiah-ni̍h kīn, Tiong-kok to̍h phah bē iâⁿ, keh tsi̍t-ê Tâi-oân hái-kiap pêng-kin ū 180 kong-lí khuah, siōng e̍h ê ūi mā iáu ū 128 kong-lí khuah, Tiong-kok Kái-hòng-kun sī beh án-tsóaⁿ phah Tâi-oân leh? án-ne sé bīn oân-tsoân sī gāi tio̍h 習近平 ê phīⁿ! lia̍h-·khí-lâi, ná-tshiūⁿ iáu bōe phòaⁿ hêng. Tsiah kòe nn̄g kò͘ gue̍h, Tiong-kok tio̍h ē-sái mē kóng beh "bú-thóng Tâi-oân" ê lâng sī gōng-lâng á-sī siáⁿ-mi̍h pháiⁿ sim.

　　Tsit saⁿ nî Bú-hàn hì-iām, hāi Tiong-kok king-tsè huat-tián thêng-tùn, gōa-kok tshiúⁿ-siong tōa thiat-thè, tsáu liáu-liáu. Tùi Tiong-kok king-tsè huat-tián tong-jiân tōa siong. Tē-hng tsèng-hú hū tsè lúi-lúi, tē-hng gîn-hâng khiàm jîn-bîn tsîⁿ bô-tsâi-tiāu hêng, jîn-bîn oàn-siaⁿ sù khí. Tsòe-kīn Bú-hàn hì-iām koh huat-sio-·khí-lâi, tsiàu Tiong-kok tsuan-ka Tsiong Lâm-san kóng, kàu gō͘-gue̍h té, pêng-kin múi lé-pài ē ū 4,000 bān lâng khak-tsín, kàu la̍k-gue̍h té, pêng-kin múi lé-pài ē ū 6,500 bān lâng khak-tsín. Tsit nn̄g nî, Bí-kok ka-kiông ka-sok bú-tsong Tâi-oân. Hiān-hiān khòaⁿ sè-kài tē-jī tōa kun-sū kiông-kok Gô-lô, phah tsi̍t-ê sió-sió ê 烏克蘭, goân-pún siūⁿ kóng tsiàm-niá 烏克蘭ná-tshiūⁿ toh-téng ni kam, bô siūⁿ tioh tsiah-ni̍h khùn-lân, ni kam ê tshiú hiám-hiám-á hông tok-·khì. Tiong-kok tong-jiân ū teh-khòaⁿ, Gô-lô khì 烏克蘭ê lō͘ pêⁿ tháⁿ-tháⁿ, to̍h phah kah tsiah kan-khó͘, hô-hòng Tiong-kok Tâi-oân keh tsi̍t-ê Tâi-oân hái-kiap?

　　 Tsoân sè-kài bîn-tsú kok-ka ê hōe-gī lóng ē thê-khí, Tâi-oân hái-kiap ū tāi-tsì, tio̍h sī sè-kài ê tāi-tsì. Ná-tshiūⁿ lóng sī kóng tsin ê. Tiong-kok bē-sái tèⁿ m̄-tsai.

　　 Tiong-kok tsit kúi nî it-ti̍t suan-thoân, hō͘ Tiong-kok jîn-bîn siong-sìn bú-thóng Tâi-oân ê tsiàn-tsing it-tēng ē huat-sing. Bú-thóng Tâi-oân tshá liáu siuⁿ-kòe thâu, gō͘-gue̍h tshe, Tiong-kok thiau-kang hō͘ Tiong-kok khó-lêng ē hām-ji̍p"sì bīn tsok-tsiàn" ê bûn-tsiuⁿ tī bāng-lō͘ téng-bīn ti̍t-ti̍t thôaⁿ. Bûn-tsiuⁿ kóng Tiong-kok nā "bú-thóng Tâi-oân", Tiong-kok sûi-sî tio̍h bīn-tùi sì tiâu tsiàn-sòaⁿ, tē 1 tiâu tsiàn-sòaⁿ tī Tâi-oân hái-kiap, kah Bí-kok, Tâi-oân, Ji̍t-pún ê bú-tsong le̍k-liōng tsiàn-tàu. Tē 2 tiâu tsiàn-sòaⁿ tī tang-pak-hong, Bí-kok khó-lêng liân-ha̍p Hân-kok hiòng Tiong-kok tang-pak kong-kik. Tē 3 tiâu tsiàn-sòaⁿ tī Lâm-hái, Bí-kok khó-lêng liân-ha̍p Hui-lu̍t-pin, sīm-tsì Ò-tsiu kah Tang-lâm-a kok-ka tùi Τiong-kiōng kong-kik. Tē 4 tiâu tsiàn-sòaⁿ tī sai-lâm-hong, Ìn-tō͘ khó-lêng ē thàn Tiong-kok hām-ji̍p tsiàn-kio̍k lâi tsìn-kong Tiong-Ìn pian-kéng.

　　 Lán bô kiaⁿ Tiong-kok phah Tâi-oân. Siōng kiaⁿ Tâi-oân lâng bô kâng-sim. Tsin-tsiàⁿ thoân-kiat khí-lâi, siáⁿ-mi̍h mā m̄ kiaⁿ! (230526)

Tsù, 習近平 烏克蘭 tshiáⁿ liām Hôa-gí




　　五月二四，中國國民黨召開記者會，講明年大選是戰爭kah和平選舉，批評蔡英文總統kah賴清德副總統是「戰爭販á」ê共犯結構。笑死人！「戰爭販á」是中國，一日到暗kah「戰爭販á」sái目尾ê正是中國國民黨。中國tsit-ê「戰爭販á」一直huah講beh用武力統一台灣（「武統台灣」），驚咱台灣人無ài相信，中國軍機軍艦làng時無làng日來咱台灣航空識別區kah海峽中線附近擾亂。最近「武統台灣」ê聲音ná ē lú來lú細聲？

　　中國ê空氣ná ē變hiah緊？中國頭人幾年來敢m̄是一直強調，中國無beh放棄用武力拍台灣。兩個月前，中國解放軍上將劉亞洲發表一篇《金門戰役檢討》，金門廈門hiah-ni̍h近，中國to̍h拍bē贏，隔一個台灣海峽平均有180公里闊，上狹ê位mā猶有128公里闊，中國解放軍是beh按怎拍台灣leh？按呢洗面完全是礙tio̍h習近平ê鼻！掠起來，ná-tshiūⁿ猶未判刑。才過兩個月，中國tio̍hē-sái罵講beh「武統台灣」ê人是戇人抑是啥物pháiⁿ心。

　　Tsit三年武漢肺炎，害中國經濟發展停頓，外國廠商大撤退、走了了。對中國經濟發展當然大傷。地方政府負債累累，地方銀行欠人民錢無才調還，人民怨聲四起。最近武漢肺炎koh發燒起來，照中國專家鍾南山講：到五月底，平均每禮拜ē有4,000萬人確診、到六月底，平均每禮拜ē有6,500萬人確診。Tsit兩年，美國加強加速武裝台灣。現現看世界第二大軍事強國俄羅，拍一個小小ê烏克蘭，原本想講佔領烏克蘭ná-tshiūⁿ桌頂ni柑，無想tioh tsiah-ni̍h困難、ni柑ê手險險á hông剁去。中國當然有teh看，俄羅去烏克蘭ê路平坦坦，to̍h拍kah tsiah艱苦，何況中國台灣隔一个台灣海峽？

　　全世界民主國家ê會議lóng -ē提起，台灣海峽有代誌，tio̍h是世界ê代誌。Ná-tshiūⁿ lóng是講真ê。中國bē-sái tèⁿ m̄知。

　　中國tsit幾年一直宣傳，hō͘中國人民相信武統台灣ê戰爭一定-ē發生。武統台灣炒了siuⁿ過頭，五月初，中國thiau工hō͘中國可能ē陷入「四面作戰」ê文章tī網路頂面直直傳。文章講中國若「武統台灣」，中國隨時tio̍h面對四條戰線：第1條戰線tī台灣海峽，kah美國、台灣、日本ê武裝力量戰鬥。第2條戰線tī東北方，美國可能聯合韓國向中國東北攻擊。第3條戰線tī南海，美國可能聯合菲律賓，甚至澳洲kah東南亞國家對中共攻擊。第4條戰線tī西南方，印度可能ē趁中國陷入戰局來進攻中印邊境。

　　咱無驚中國拍台灣。上驚台灣人無仝心。真正團結起來，啥物mā m̄驚！ (230526)

註：習近平　　烏克蘭　　　請唸華語