《綠色短評》

 | | | 轉寄

Tang時á郭台銘tsiah ē轉大人？

作者 李南衡, TsoânTâijī/全台字 by Tsng Hūiphêng 2023.05.28




Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tangsîá Kueh Tâibêng tsiah ē tńgtōalâng?

　　 jīgue̍h tsa̍psì ēpo͘, Hónghái tshòngpānjîn Kueh Tâibêng kah li̍phuatīⁿ tsêng īⁿtiúⁿ Ông Kimpêng hōebiān liáuāu, tsiapsiū mûithé hóngbūn ê sî piáusī, khólêng 4 nî tsêng i 年輕氣盛, tsi̍tsî ê tshiongtōng, tsiah ē khì thètshut Tiongkok Kokbîntóng. 年輕氣盛, sī kóng lâng ū khah siàuliân, hia̍tkhì khah ōng. Tsò tāitsì khah tshongpōng. Kîkoài, ná ē kà bē ē, 4 nî āu Kueh táng kāngkhoán hiahni̍h 年輕氣盛.

　　 Lán m̄ káⁿ sûipiān kóng Bîntsiòngtóng tsúse̍k Kua Bûntiat sī lāu hô͘lî, tānsī sió hô͘lî i tsua̍ttùi tamtng ē khí. Kueh táng tsoân Tâioân tsáu thàuthàu, pān kòe kúi tiûⁿ tōa hêng àmhōe, gō͘gue̍h tshetsa̍p, tī phêⁿô͘ tsōsè liáuāu, àmsî tsa̍p tiám kóaⁿ tńglâi Tāipak kiû kìⁿ Kua Bûntiat tsúse̍k, lâikàu tshù·ni̍h, Kua tsúse̍k tēit kù ōe tio̍hkóng,"lí liân Kokbîntóng ê iûhì kuitsik to m̄tsai, tio̍h khì tshamka písài! "tējī kang,Kua tsúse̍k thàulō͘, Kueh táng kā i kóng, Tiongkok Kokbîntóng tsingtiàu i ê khólêngsèng ū 80%. Kueh táng iûgoân 年輕氣盛!

Gō͘gue̍h tsheit, Kueh Tâibêng tī Kohiông kóng ētàng tī "Pòaⁿpînsuaⁿ siat hu̍ttiān tsām, antsoân huattiān pótsèng thàn tsîⁿ", hông mē kah tshàuthâu, tējī kang kín hōe sitlé, iáu m̄ goān suah·khì, i kóng,"siatsú sióhêng lênggoân thétsik kantaⁿ ū tsa̍phun tsi it, iūkoh tsin antsoân, sī m̄ sī múi tsi̍tê koāntshī lóng tio̍h khì tshōe antsoân ê hu̍t iôngha̍p ê tiāntshiúⁿ?" i tsintsiàⁿ m̄ kiaⁿ Sinpak tshītiúⁿ Hâu Iúgî mn̄g i, hu̍t hùiliāu beh khǹg tó khì?

　　 Gō͘gue̍h tsheit, Kueh táng tī Kohiông iánkáng ê sî kóng, beh tī saⁿ nî lāi kā kikhìlâng sángia̍p tsò·khílâi, phài 8 bān kikhìlâng tíkhòng Kiōngkun ê ji̍p tshim. Kueh táng ê kikhìlâng sánphín, bo̍ktsêng sī Siōnghái A kó͘ tsiūⁿtshī ê "Kanggia̍p Pùliân"tsètsō·ê. Lán sing mài kóng Hônghái kikhìlâng sī m̄ sī ū tsiàntàula̍t, lán sing mn̄g Kueh táng, Tiongkok ná ē íntsún lí kā Siōnghái tsètsō ê kikhìlâng ūn lâi Tâioân, kah Tiongkok Káihòngkun sio tsiàn? siatsú Tiongkok íntsún lí ūn 8 bān kikhìlâng lâi Tâioân, tī Tâioân ê kikhìlâng káⁿ m̄ sī lóng ē siūtio̍h Tiongkok khòngtsè? Beh ántsóaⁿ sio tsiàn? Kueh támg íking m̄ sī 年輕氣盛 ê būntê, sī káⁿ ū huatsio?

　　Sìgue̍h jījī, Kueh táng piáusī, tùihōaⁿ ū tsin tsē kunki jiáuloān Tâioân, sī tsiamtùi Bîntsìntóng "būsi̍t Tâito̍k kangtsoktsiá". Lán ài hôpêng, siongsìn tùihōaⁿ mā sī ài hôpêng, in ê kuntūi mā bô goānì sio tsiàn, jînbîn mā bô goānì sio tsiàn. Só͘í tsíiàu Kokbîntóng, sīmtsì i Kueh Tâibêng tòngsoán, kunki tio̍h bē koh lâi,"inūi góa put to̍k, lí put bú, goán tio̍h sī Tionghôa Bînkok", tsíiàu Tionghôa Bînkok kokkî giâ koânkoân, tshiùⁿ Tionghôa Bînkok kokkua,"góa kámkak in tio̍h bē lâi". Sió thêng leh! lán tsaiiáⁿ 1958 nî pehgue̍h jīsaⁿ ēpo͘ 6 tiám 30 pun, Tiongkok jînbîn Káihòngkun khaisí phàu phah Κimmn̂g,"Patjīsan Phàutsiàn" khaisí, itti̍t phah kàu 1979 nî tsiah tsèngsik thêng tsiàn. Lán kok siongbông kuaⁿping ū 2,661 lâng. Τiongkiōng phàu phah Κimmn̂g hit tongsî ê tsiptsèngtsiá sī Tiongkok Kokbîntóng ê Tsiúⁿ Κàitsio̍h tsóngthóng, siōng kài hoántùi Tâioân to̍kli̍p. Sī ántsóaⁿ nā ōaⁿ Tiongkok Kokbîntóng tsiptsèng á·sī Kueh táng tsoh tsóngthóng, Tiongkok káihòng kun tio̍h bē phah Tâioân? Kueh táng kóng tsiahê ōe íking pí 年輕氣盛 koh khah siàuliân, tshaputto sī gō͘ hòe gíná kóng ê ōe.

Kueh 董hông phiàn nn̄g piàn, lú phiàn lú nîkhin. M̄ tsai tang sîá Kueh Tâibêng tsiah ē tńgtōalâng? 　(230519)

Tsù, 年輕氣盛 tshiáⁿ liām Hôagí


Pe̍h-ōe-jī-pán/白話字版


《 Le̍k-sik toán-phêng 》 Lí Lâm-hêng

Tang-sî-á Kueh Tâi-bêng tsiah ē tńg-tōa-lâng?

　　 jī-gue̍h tsa̍p-sì ē-po͘, Hóng-hái tshòng-pān-jîn Kueh Tâi-bêng kah li̍p-huat-īⁿ tsêng īⁿ-tiúⁿ Ông Kim-pêng hōe-biān liáu-āu, tsiap-siū mûi-thé hóng-būn ê sî piáu-sī, khó-lêng 4 nî tsêng i 年輕氣盛, tsi̍t-sî ê tshiong-tōng, tsiah ē khì thè-tshut Tiong-kok Kok-bîn-tóng. 年輕氣盛, sī kóng lâng ū khah siàu-liân, hia̍t-khì khah ōng. Tsò tāi-tsì khah tshong-pōng. Kî-koài, ná ē kà bē ē, 4 nî āu Kueh táng kāng-khoán hiah-ni̍h 年輕氣盛.

　　 Lán m̄ káⁿ sûi-piān kóng Bîn-tsiòng-tóng tsú-se̍k Kua Bûn-tiat sī lāu hô͘-lî, tān-sī sió hô͘-lî i tsua̍t-tùi tam-tng ē khí. Kueh táng tsoân Tâi-oân tsáu thàu-thàu, pān kòe kúi tiûⁿ tōa hêng àm-hōe, gō͘-gue̍h tshe-tsa̍p, tī phêⁿ-ô͘ tsō-sè liáu-āu, àm-sî tsa̍p tiám kóaⁿ tńg-lâi Tāi-pak kiû kìⁿ Kua Bûn-tiat tsú-se̍k, lâi-kàu tshù-·ni̍h, Kua tsú-se̍k tē-it kù ōe tio̍h-kóng,"lí liân Kok-bîn-tóng ê iû-hì kui-tsik to m̄-tsai, tio̍h khì tsham-ka pí-sài! "tē-jī kang,Kua tsú-se̍k thàu-lō͘, Kueh táng kā i kóng, Tiong-kok Kok-bîn-tóng tsing-tiàu i ê khó-lêng-sèng ū 80%. Kueh táng iû-goân 年輕氣盛!

Gō͘-gue̍h tshe-it, Kueh Tâi-bêng tī Ko-hiông kóng ē-tàng tī "Pòaⁿ-pîn-suaⁿ siat hu̍t-tiān tsām, an-tsoân huat-tiān pó-tsèng thàn tsîⁿ", hông mē kah tshàu-thâu, tē-jī kang kín hōe sit-lé, iáu m̄ goān suah-·khì, i kóng,"siat-sú sió-hêng lêng-goân thé-tsik kan-taⁿ ū tsa̍p-hun tsi it, iū-koh tsin an-tsoân, sī m̄ sī múi tsi̍t-ê koān-tshī lóng tio̍h khì tshōe an-tsoân ê hu̍t iông-ha̍p ê tiān-tshiúⁿ?" i tsin-tsiàⁿ m̄ kiaⁿ Sin-pak tshī-tiúⁿ Hâu Iú-gî mn̄g i, hu̍t hùi-liāu beh khǹg tó khì?

　　 Gō͘-gue̍h tshe-it, Kueh táng tī Ko-hiông ián-káng ê sî kóng, beh tī saⁿ nî lāi kā ki-khì-lâng sán-gia̍p tsò-·khí-lâi, phài 8 bān ki-khì-lâng tí-khòng Kiōng-kun ê ji̍p tshim. Kueh táng ê ki-khì-lâng sán-phín, bo̍k-tsêng sī Siōng-hái A kó͘ tsiūⁿ-tshī ê "Kang-gia̍p Pù-liân"tsè-tsō-·ê. Lán sing mài kóng Hông-hái ki-khì-lâng sī m̄ sī ū tsiàn-tàu-la̍t, lán sing mn̄g Kueh táng, Tiong-kok ná ē ín-tsún lí kā Siōng-hái tsè-tsō ê ki-khì-lâng ūn lâi Tâi-oân, kah Tiong-kok Kái-hòng-kun sio tsiàn? siat-sú Tiong-kok ín-tsún lí ūn 8 bān ki-khì-lâng lâi Tâi-oân, tī Tâi-oân ê ki-khì-lâng káⁿ m̄ sī lóng ē siū-tio̍h Tiong-kok khòng-tsè? Beh án-tsóaⁿ sio tsiàn? Kueh támg í-king m̄ sī 年輕氣盛 ê būn-tê, sī káⁿ ū huat-sio?

　　Sì-gue̍h jī-jī, Kueh táng piáu-sī, tùi-hōaⁿ ū tsin tsē kun-ki jiáu-loān Tâi-oân, sī tsiam-tùi Bîn-tsìn-tóng "bū-si̍t Tâi-to̍k kang-tsok-tsiá". Lán ài hô-pêng, siong-sìn tùi-hōaⁿ mā sī ài hô-pêng, in ê kun-tūi mā bô goān-ì sio tsiàn, jîn-bîn mā bô goān-ì sio tsiàn. Só͘-í tsí-iàu Kok-bîn-tóng, sīm-tsì i Kueh Tâi-bêng tòng-soán, kun-ki tio̍h bē koh lâi,"in-ūi góa put to̍k, lí put bú, goán tio̍h sī Tiong-hôa Bîn-kok", tsí-iàu Tiong-hôa Bîn-kok kok kî giâ koân-koân, tshiùⁿ Tiong-hôa Bîn-kok kok-kua,"góa kám-kak in tio̍h bē lâi". Sió thêng leh! lán tsai-iáⁿ 1958 nî peh-gue̍h jī-saⁿ ē-po͘ 6 tiám 30 pun, Tiong-kok jîn-bîn Kái-hòng-kun khai-sí phàu phah Κim-mn̂g,"Pat-jī-san Phàu-tsiàn" khai-sí, it-ti̍t phah kàu 1979 nî tsiah tsèng-sik thêng tsiàn. Lán kok siong-bông kuaⁿ-ping ū 2,661 lâng. Τiong-kiōng phàu phah Κim-mn̂g hit tong-sî ê tsip-tsèng-tsiá sī Tiong-kok Kok-bîn-tóng ê Tsiúⁿ Κài-tsio̍h tsóng-thóng, siōng kài hoán-tùi Tâi-oân to̍k-li̍p. Sī án-tsóaⁿ nā ōaⁿ Tiong-kok Kok-bîn-tóng tsip-tsèng á-·sī Kueh táng tsoh tsóng-thóng, Tiong-kok kái-hòng -kun tio̍h bē phah Tâi-oân? Kueh táng kóng tsiah-ê ōe í-king pí 年輕氣盛 koh khah siàu-liân, tsha-put-to sī gō͘ hòe gín-á kóng ê ōe.

Kueh 董hông phiàn nn̄g piàn, lú phiàn lú nî-khin. M̄ tsai tang sî-á Kueh Tâi-bêng tsiah ē tńg-tōa-lâng? 　(230519)

Tsù, 年輕氣盛 tshiáⁿ liām Hôa-gí




　　二月十四下晡，鴻海創辦人郭台銘kah立法院前院長王金平會面了後，接受媒體訪問ê時表示，可能四年前伊年輕氣盛，一時ê衝動，tsiah ē去退出中國國民黨。年輕氣盛，是講人有khah少年，血氣khah旺。做代誌khah倉皇（tshong-pōng）。奇怪，ná ē教bēē，四年後郭董仝款hiah-ni̍h年輕氣盛。

　　咱m̄敢隨便講民眾黨主席柯文哲是老狐狸，但是小狐狸伊絕對擔當ē起。郭董全台灣走透透，辦過幾場大型暗會，五月初十，tī澎湖造勢了後，暗時十點趕轉來台北求見柯文哲主席，來到厝裡，柯主席第一句話tio̍h講：「你連國民黨ê遊戲規則都m̄知，tio̍h去參加比賽！」第二工，柯主席透露，郭董kā伊講，中國國民黨徵召伊ê可能性有80%。郭董猶原年輕氣盛！

五月初一，郭台銘tī高雄講ētàngtī「半屏山設核電站，安全發電保證賺錢」，hông罵kah臭頭，第二工緊會失禮，猶m̄願煞去，伊講：「設使小型能源體積kan-taⁿ有十分之一，又koh真安全，是m̄是每一個縣市lóng tio̍h去tshōe安全ê核融合ê電廠？」伊真正m̄驚新北市長侯友宜問伊：核廢料beh khǹg tó去？

　　五月初一，郭董tī高雄演講ê時講，beh tī 三年內kā機器人產業做起來，派8萬機器人抵抗共軍ê入侵。郭董ê機器人產品，目前是上海A股上市ê「工業富聯」製造ê。咱先mài講鴻海機器人是m̄是有戰鬥力，咱先問郭董，中國ná ē允准你kā上海製造ê機器人運來台灣，kah中國解放軍sio戰？設使中國允准你運8萬機器人來台灣，tī台灣ê機器人敢m̄是lóngē受tio̍h中國控制？Beh按怎sio戰？郭董已經m̄是年輕氣盛ê問題，是káⁿ有發燒？

　　四月二二，郭董表示，對岸有真tsē軍機擾亂台灣，是針對民進黨「務實台獨工作者」。咱愛和平，相信對岸mā是愛和平，inê軍隊mā無願意sio戰，人民mā無願意sio戰。所以只要國民黨、甚至伊郭台銘當選，軍機tio̍h bē koh來，「因為我不獨、你不武，阮tio̍h是中華民國」，只要中華民國國旗夯koân-koân，唱中華民國國歌，「我感覺in tio̍h bē來」。小停leh！咱知影1958年八月二三下晡6點30分，中國人民解放軍開始砲拍金門，「八二三砲戰」開始，一直拍到1979年才正式停戰。咱國傷亡官兵有2,661人。中共砲拍金門hit當時ê執政者是中國國民黨ê蔣介石總統，上kài反對台灣獨立。是按怎若換中國國民黨執政抑是郭董作總統，中國解放軍tio̍h bē 拍台灣？郭董講tsiah-ê話已經比年輕氣盛koh khah少年，差不多是五歲gín-á講ê話。

郭董hông騙兩遍，lú騙lú年輕。M̄知tang時á郭台銘tsiahē轉大人？　(230519)

註：年輕氣盛　　請唸華語