《綠色短評》

 | | | 轉寄

中國khiā koân山看馬相that。有巧！

作者 李南衡, TsoânTâijī/全台字 by Tsng Hūiphêng 2022.04.17

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　 Lí Lâmhêng

　　　　 Tiongkok khiā koân suaⁿ khòaⁿ bé sio that. Ū khiáu!

　　 Jīgue̍h jīsì Gôlô ji̍p tshim 烏克蘭, kingkòe tsi̍t kò gue̍h liáuāu, tsoân sèkài ū nn̄g tsióng siaⁿim lóng tùi Tiongkok lâi. Tsi̍t tsióng sī hibāng thêng tsiàn ê siaⁿim, lóng kóng beh khǹg Gôlô Phû Ting tsóngthóng thêng tsiàn, kantaⁿ Tiongkok kokka tsúse̍k 習近平 ū huat nāniā, inūi Tiongkok sī Gôlô siōng hó ê pêngiú. Mā sī inūi ánne, só͘í lēnggōa tsi̍t tsióng siaⁿim iûgoân hiòng Tiongkok lâi, hoânló Tiongkok ē tshuttshiú kunsū oântsō͘ Gôlô.

　　 Bôkoán tó tsi̍t tsióng siūⁿhuat ê lâng, lóng sī bô liáukái Tiongkok kah 習近平 tsúse̍k. Nn̄g tsiah bé teh sio that, ná ū hiah gōng ê lâng tsáukhì tsoh kongtshin ê ? Bêngbêng khòaⁿ Gôlô tī 烏克蘭ê tsiànsū íking hāmji̍p tsìn bô pō͘, thè bô lō͘ ê làmtshân, nā tshutbīn tsoh kongtshin khǹg Gôlô Phû Ting tsóngthóng hó siu ping, suijiân sī tshut tī hóì beh hō͘ Phû Ting hó lo̍h lâuthui. Tānsī só͘ū ê to̍ktshâi tsiá lóng tsūsìn móamóa, ná ū khólêng thiaⁿ pa̍t lâng ê ōe?

　　 Hoânló Tiongkok ē khì kunoān Gôlô ê tongjiân mā sī gōng lâng. Saⁿgue̍h jīkáu, 烏克蘭 kokhông kongpò͘ Gôlô kun siōng kài sin ê tsiàn sún thóngkè, Ùi jīgue̍h jīsì Gôlô kun ji̍p tshim kàu saⁿgue̍h jīkáu tsásî la̍k tiám ûitsí, Gôlô kun tāiiok tīnbông 1 bān 7,200 lâng, 烏克蘭 kun tshuihúi Gôlô kun 597 tâi tsiàntshia, 1,710 tâi tsng kah tshia, 303 mn̂g hóephàu hēthóng, 96 tâi to koán hóetsìⁿtshia, 54 tso͘ hôngkhang hēthóng, 127 tâi kunki, 129 tsiah ti̍tsingki, 1,178 tâi koksik tshialióng , 7 tâi kàmthéng, 73 tâi iûkoàntshia, 71 tsiah bôlângki, 21 ê te̍ksû siatpī kah 4 ê tsiànsut puetôaⁿ tsàikū. Kàu saⁿgue̍h jīpeh ûitsí, Gôlô ji̍p tshim 烏克蘭 tsiàntsing tsìtsió sitkhì tshit miâ kokip tsiòngléng kah 16 miâ kokip tsíhuikuaⁿ. Kèsio̍k ánne koh tsiàn nn̄g kò gue̍h, saⁿ kògue̍h, sèkài tējī tōa kunsū kok, koh ū sèkài siōng tsē hu̍ttsú búkhì ê Gôlô ē piàntsoh siáⁿ khoán? Tiongkok tongjiân tsiok ài khòaⁿ.

　　 Ūitio̍h pangtsān 烏克蘭, Bíkok tshōathâu ê "pak iok" kokka tōala̍t kunoān 烏克蘭, Bíkok tsóngthóng Pài Ting siosòa suanpò͘ thêkiong 烏克蘭 kèta̍t 10 ik bíkim ê kunoān, koh suanpò͘ tùi 烏克蘭 tsēngka 100 tsiah" tôaⁿ hông to"（Kamikaze sîn hong ） sióhêng bôlângki . Autsiu Lísūhōe thêkiong gia̍h gōa ê 3 ik Auphiò ūsoàn, koh beh thêkiong 烏克蘭 só͘ suiàu ê hôngōe kunpī. Tikkok tsingsàng 1,500 lia̍p "tsìⁿ sik" hôngkhong puetôaⁿ kah 100 ki MG3 ktshèng. Czets tsingsàng kèta̍t 760 bān Auphiò ê búkhì, Sulo̍kba̍k tsingsàng kèta̍t 260 bān Auphiò ê búkhì kah 640 bān Auphiò ê kîtha bu̍ttsu, Huatkok kuantsēng 3.5 ik Auphiò ê hônggūsèng búkhì, Hôlân tsingsàng 200 lia̍p tòa leh kiâⁿ ê "tshì tsiam" hôngkhong puetôaⁿ, lûita̍t hēthóng, sàulûi kikhìlâng; 愛沙尼亞 tsingsàng piotshiuⁿ sik hoántsiàntshia puetôaⁿ kah iliâu siat pī. Pakiok kokka itti̍t tsioân, Gôlô kah 烏克蘭 Pakiok kokka jú tsiàn jú jia̍t, nn̄g pêng só͘ siotiāu ê tsîⁿ tongjiân jú lâi jú tsē, siōng hó sī nn̄g pêng lóng phah kah tshitshám lo̍kphik. Tsiàntiûⁿ lī Tiongkok hn̄ghn̄g, oântsoân bē siū sionghāi súnsit. Tshùitûn phôe jîntsêng Tiongkok ē tshut tit, kunsū oântsō͘ Gôlô? Biánkóng. Bíkok Pài Ting tsóngthóng kah Tiongkok 習近平 tsúse̍k sīsìn hōegī, Pài Ting te̍kpia̍t huanhù Tiongkok tsua̍ttùi bē sái kunoān Gôlô, nā ûihoán ē siūtio̍h giâmle̍k ê tsètshâi. Ná siōngthian sù tsiah hó ê tsiàkháu, hāi 習近平 huaⁿhí kah bē khùn tit, liân bînbāng mā ē bîbîá tshiò.

Tiongkok khiā koânsuaⁿ khòaⁿ bé sio that, ū khiáu! (220401)


Tsù, 烏克蘭　愛沙尼亞　 習近平 　tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》　　　 Lí Lâm-hêng

　　　　 Tiong-kok khiā koân suaⁿ khòaⁿ bé sio that. Ū khiáu!

　　 Jī-gue̍h jī-sì Gô-lô ji̍p tshim 烏克蘭, king-kòe tsi̍t kò gue̍h liáu-āu, tsoân sè-kài ū nn̄g tsióng siaⁿ-im lóng tùi Tiong-kok lâi. Tsi̍t tsióng sī hi-bāng thêng tsiàn ê siaⁿ-im, lóng kóng beh khǹg Gô-lô Phû Ting tsóng-thóng thêng tsiàn, kan-taⁿ Tiong-kok kok-ka tsú-se̍k 習近平 ū huat nā-niā, in-ūi Tiong-kok sī Gô-lô siōng hó ê pêng-iú. Mā sī in-ūi án-ne, só͘-í lēng-gōa tsi̍t tsióng siaⁿ-im iû-goân hiòng Tiong-kok lâi, hoân-ló Tiong-kok ē tshut-tshiú kun-sū oân-tsō͘ Gô-lô.

　　 Bô-koán tó tsi̍t tsióng siūⁿ-huat ê lâng, lóng sī bô liáu-kái Tiong-kok kah 習近平 tsú-se̍k. Nn̄g tsiah bé teh sio that, ná ū hiah gōng ê lâng tsáu-khì tsoh kong-tshin ê ? Bêng-bêng khòaⁿ Gô-lô tī 烏克蘭ê tsiàn-sū í-king hām-ji̍p tsìn bô pō͘, thè bô lō͘ ê làm-tshân, nā tshut-bīn tsoh kong-tshin khǹg Gô-lô Phû Ting tsóng-thóng hó siu ping, sui-jiân sī tshut tī hó-ì beh hō͘ Phû Ting hó lo̍h lâu-thui. Tān-sī só͘-ū ê to̍k-tshâi tsiá lóng tsū-sìn móa-móa, ná ū khó-lêng thiaⁿ pa̍t lâng ê ōe?

　　 Hoân-ló Tiong-kok ē khì kun-oān Gô-lô ê tong-jiân mā sī gōng lâng. Saⁿ-gue̍h jī-káu, 烏克蘭 kok-hông kong-pò͘ Gô-lô kun siōng kài sin ê tsiàn sún thóng-kè, Ùi jī-gue̍h jī-sì Gô-lô kun ji̍p tshim kàu saⁿ-gue̍h jī-káu tsá-sî la̍k tiám ûi-tsí, Gô-lô kun tāi-iok tīn-bông 1 bān 7,200 lâng, 烏克蘭 kun tshui-húi Gô-lô kun 597 tâi tsiàn-tshia, 1,710 tâi tsng kah tshia, 303 mn̂g hóe-phàu hē-thóng, 96 tâi to koán hóe-tsìⁿ-tshia, 54 tso͘ hông-khang hē-thóng, 127 tâi kun-ki, 129 tsiah ti̍t-sing-ki, 1,178 tâi kok-sik tshia-lióng , 7 tâi kàm-théng, 73 tâi iû-koàn-tshia, 71 tsiah bô-lâng-ki, 21 ê te̍k-sû siat-pī kah 4 ê tsiàn-sut pue-tôaⁿ tsài-kū. Kàu saⁿ-gue̍h jī-peh ûi-tsí, Gô-lô ji̍p tshim 烏克蘭 tsiàn-tsing tsì-tsió sit-khì tshit miâ ko-kip tsiòng-léng kah 16 miâ ko-kip tsí-hui-kuaⁿ. Kè-sio̍k án-ne koh tsiàn nn̄g kò gue̍h, saⁿ kò-gue̍h, sè-kài tē-jī tōa kun-sū kok, koh ū sè-kài siōng tsē hu̍t-tsú bú-khì ê Gô-lô ē piàn-tsoh siáⁿ khoán? Tiong-kok tong-jiân tsiok ài khòaⁿ.

　　 Ūi-tio̍h pang-tsān 烏克蘭, Bí-kok tshōa-thâu ê "pak iok" kok-ka tōa-la̍t kun-oān 烏克蘭, Bí-kok tsóng-thóng Pài Ting sio-sòa suan-pò͘ thê-kiong 烏克蘭 kè-ta̍t 10 ik bí-kim ê kun-oān, koh suan-pò͘ tùi 烏克蘭 tsēng-ka 100 tsiah" tôaⁿ hông to"（Kamikaze sîn hong ） sió-hêng bô-lâng-ki . Au-tsiu Lí-sū-hōe thê-kiong gia̍h gōa ê 3 ik Au-phiò ū-soàn, koh beh thê-kiong 烏克蘭 só͘ su-iàu ê hông-ōe kun-pī. Tik-kok tsing-sàng 1,500 lia̍p "tsìⁿ sik" hông-khong pue-tôaⁿ kah 100 ki MG3 k-tshèng. Czets tsing-sàng kè-ta̍t 760 bān Au-phiò ê bú-khì, Su-lo̍k-ba̍k tsing-sàng kè-ta̍t 260 bān Au-phiò ê bú-khì kah 640 bān Au-phiò ê kî-tha bu̍t-tsu, Huat-kok kuan-tsēng 3.5 ik Au-phiò ê hông-gū-sèng bú-khì, Hô-lân tsing-sàng 200 lia̍p tòa leh kiâⁿ ê "tshì tsiam" hông-khong pue-tôaⁿ, lûi-ta̍t hē-thóng, sàu-lûi ki-khì-lâng; 愛沙尼亞 tsing-sàng pio-tshiuⁿ sik hoán-tsiàn-tshia pue-tôaⁿ kah i-liâu siat pī. Pak-iok kok-ka it-ti̍t tsi-oân, Gô-lô kah 烏克蘭 Pak-iok kok-ka jú tsiàn jú jia̍t, nn̄g pêng só͘ sio-tiāu ê tsîⁿ tong-jiân jú lâi jú tsē, siōng hó sī nn̄g pêng lóng phah kah tshi-tshám lo̍k-phik. Tsiàn-tiûⁿ lī Tiong-kok hn̄g-hn̄g, oân-tsoân bē siū siong-hāi sún-sit. Tshùi-tûn phôe jîn-tsêng Tiong-kok ē tshut tit, kun-sū oân-tsō͘ Gô-lô? Bián-kóng. Bí-kok Pài Ting tsóng-thóng kah Tiong-kok 習近平 tsú-se̍k sī-sìn hōe-gī, Pài Ting te̍k-pia̍t huan-hù Tiong-kok tsua̍t-tùi bē sái kun-oān Gô-lô, nā ûi-hoán ē siū-tio̍h giâm-le̍k ê tsè-tshâi. Ná siōng-thian sù tsiah hó ê tsià-kháu, hāi 習近平 huaⁿ-hí kah bē khùn tit, liân bîn-bāng mā ē bî-bî-á tshiò.

Tiong-kok khiā koân-suaⁿ khòaⁿ bé sio that, ū khiáu! (220401)


Tsù, 烏克蘭　愛沙尼亞　 習近平 　tshiáⁿ liām Hôa-gí



　　二月二四俄羅入侵烏克蘭，經過一個月了後，全世界有兩種聲音lóng對中國來。一種是希望停戰ê聲音，lóng講beh勸俄羅浮丁總統停戰，kan-taⁿ中國國家主席習近平有法nā-niā，因為中國是俄羅上好ê朋友。Mā是因為án-ne，所以另外一種聲音猶原向中國來，煩惱中國ē出手軍事援助俄羅。

　　無管tó一種想法ê人，lóng是無瞭解中國kah習近平主席。兩隻馬teh相that，ná有hiah戇ê人走去作公親ê？明明看俄羅tī烏克蘭ê戰事已經陷入進無步、退無路ê湳田，若出面作公親勸俄羅浮丁總統好收兵，雖然是出tī好意beh hō͘浮丁好落樓梯。但是所有ê獨裁者lóng自信滿滿，ná有可能聽別人ê話？

　　煩惱中國ē去軍援俄羅ê當然mā是戇人。三月二九，烏克蘭國防公布俄羅軍上kài新ê戰損統計：Ùi二月二四俄羅軍入侵到三月二九早時六點為止，俄羅軍大約陣亡1萬7,200人，烏克蘭軍摧毀俄羅軍597台戰車、1,710台裝甲車、303門火砲系統、96台多管火箭車、54組防空系統、127台軍機、129隻直升機、1,178台各式車輛、7台艦艇、73台油罐車、71隻無人機、21個特殊設備kah 4個戰術飛彈載具。到三月二八為止，俄羅入侵烏克蘭戰爭至少失去七名高級將領kah 16名高級指揮官。繼續án-ne koh戰兩個月、三個月，世界第二大軍事國、koh有世界上tsē核子武器ê俄羅ē變作啥款？中國當然足愛看。

　　為tio̍h幫贊烏克蘭，美國tshōa頭ê「北約」國家大力軍援烏克蘭：美國總統拜登相續宣布提供烏克蘭價值10億美金ê軍援，koh宣布對烏克蘭增加100隻「彈簧刀」（Kamikaze神風）小型無人機。歐洲理事會提供額外ê3億歐元預算，koh beh提供烏克蘭所需要ê防衛軍備。德國贈送1,500粒「箭式」防空飛彈kah 100枝MG3機銃。捷克贈送價值760萬歐元ê武器，斯洛瓦克贈送價值260萬歐元ê武器kah 640萬歐元ê其他物資，法國捐贈3.5億歐元ê防禦性武器，荷蘭贈送200粒帶leh行ê「刺針」防空飛彈、雷達系統、掃雷機器人；愛沙尼亞贈送標鎗式反坦克飛彈kah醫療設備。北約國家一直支援，俄羅kah烏克蘭北約國家愈戰愈熱，兩旁所燒掉ê錢當然愈來愈tsē，上好是兩旁lóng拍kah淒慘落魄。戰場離中國遠遠，完全bē受傷害損失。嘴唇皮人情中國ē出得，軍事援助俄羅？免講。美國拜登總統kah中國習近平主席視訊會議，拜登特別吩咐中國絕對bē使軍援俄羅，若違反ē受tio̍h嚴勵ê制裁。ná像天賜tsiah好ê藉口，害習近平歡喜kah bē睏得，連眠夢māē微微á笑。

中國khiākoân山看馬相that，有巧！ (220401)


註：烏克蘭　愛沙尼亞　習近平　　請唸華語