《綠色短評》

 | | | 轉寄

美國tshōe tio̍h失散tsē-tsē年ê gín-á—中國

作者 李南衡, TsoânTâijī/全台字 by Tsng Hūiphêng 2022.08.21


Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　 Lí Lâmhêng

　 Bíkok tshōe tio̍h sit sòaⁿ tsētsē nî ê gín’á— Tiongkok

Bô jōa kú tsìntsêng, Tiongkok tsiâⁿ liûhêng ēng " Pahtō͘ tētô͘" tshiau tshōe Tâioân, paukuat í Tiongkok siâⁿtshī miâ hōmiâ ê kelō͘, tshiūⁿkóng Lâmkiaⁿ lō͘, Kńgtsiu ke, á·sī kah Tiongkok tēmiâ siongkuan ê tshanthiaⁿ, tshiūⁿkóng Hok tsiu hîoân tamī, Sòaⁿthâu hóiko, lóng hō͘ Tiongkok bāngiú kámkak tsiâⁿ tshùbī, tsiâⁿ hikî, tshiau tshōe liōng tōatōa tsēngka, sīmtsì tsē kah tìsú " Pahtō͘ tētô͘" tsi̍t sî "pang khì" bô huattō͘ súiōng.

Pehgue̍h tshetshit, hiānjīm Tiongkok gōakaupō͘ pō͘tiúⁿ tsō͘lí, gōakaupō͘ huatgiânjîn 華春瑩 lúsū tsi̍t sî tshiú giauⁿ, ēng Ingbûn tī “Twitter” téngbīn huatpiáu kolūn, i tī kolūn tiong ū tah tsi̍t tiuⁿ "Pahtō͘ tētô͘" ê tsia̍t tô͘, i kóng, tī " Pahtō͘ tētô͘" hiánsī, Tâipaktshī ū 38 king Suaⁿtang tsúikiáu koán, 67 king Suaⁿsai mī koán. Bīkak bē phiàn lâng, Tâioân itti̍t sī Tiongkok ê tsi̍tpō͘hūn. Sit sòaⁿ tsētsē nî ê gíná kuibóe tsóng·sī tio̍h tńglâi tshù·ni̍h.

I ê bûntsiuⁿ tsi̍tē tshut·lâi, tshiò tò kúi pahbān lâng. Kantāⁿ tshiò iáu bô kàu, tsin tsē lâng tsin phahpiàⁿ kā i thítshiò á·sī kā i tsiàⁿ khau tò siah, puttsí lāujia̍t, mā tsēngka ta̍kê tshiàutâm ê tsuliāu. Tâioân tsutshim kiûphêng Tsio̍h Bêngkín tī bīntsheh téngbīn piáusī, kinkì thóngkè, Tâioân ū 9,000 king Ji̍tpún liāulí tiàm, bīkak bē phiàn lâng. Tâioân tsokka Tsu Iūhun kā華春瑩ê bûn tsoán huat kàu bīntsheh, mn̄g kóng,"lí kámkáⁿ sǹg Tâioân ū kúi king Bíkok sik, Ji̍tpún sik, Hânkok sik tshanthiaⁿ? iáu ū Ìtāilī mī?" ū tsi̍t ūi Tiongkok bāngiú mā khòaⁿ bē lo̍hkhì, piáusī kóng "góa hāi ah, goán tshù hūkīn 麥當勞, 星巴克, 肯德基lóng tsóng ū, goânlâi góa sī tī Bíkok!" lēnggōa tsi̍t ūi Tiongkok bāngiú mn̄g kóng, góa ta̍k kang lim Tâioân ê 珍珠奶茶, khòaⁿ beh ántsóaⁿ?

Ji̍tpún 《 Sánking sinbûn 》 Tāipak tsikio̍ktiúⁿ Yaita san（矢板明夫）tī bīntsheh huat bûn kóng, i tī Tāipak tòa nn̄g nî pòaⁿ, kámkak Tāipak ê Ji̍tpún lamī tiàm, súsih tiàm, 居酒屋 ūiáⁿ bē tsió. Tānsī i tsaiiáⁿ, tsua̍ttùi bô jīmhô tsi̍tê tsèngsiông ê Ji̍tpún lâng, ē liânsióng kàu "Tâioân ê Ji̍tpún tshankoán tsiahnī tsē, Tâioân tio̍h ingkai sio̍k tī Ji̍tpún. I koh tshâliáu, tī Tangkiaⁿ kèngjiân ū 9,000 gōa king Tionghôa liāulí. Tsitê pílē ingkai sī tsoân sèkài tsúiàu siâⁿtshī tiong siōng koân ê. Siatsú ū tsi̍t kang, Τiongkiōng gōakaupō͘ ēsái kuattēng koktsè tia̍tsū, khióngkiaⁿ Ji̍tpún ê siúto͘ tio̍h ē sûisî piàn tsoh Τiongkiōng ê o͘h.

Tâioân ū tsi̍t ūi bāngiú khòaⁿ pòtō liáuāu kóng,"tsin hótshiò, 華春瑩 sī ēng Ingbûn huat ê, tsintsiàⁿ piàn tsoh koktsè tshiòōe. "Ūiáⁿ to̍h tio̍h, inūi i ēng Ingbûn siá ê koh sī tī “Twitter” téngbīn huatpiáu ê, tsiah ē ínkhí Bíkok Kokbūīⁿ tsêng huatgiânjîn Otagusu（Morgan Ortagus） lúsū mā kāngkhoán tī “Twitter” téngbīn, sing kā華春瑩ê PO bûn tsia̍t tô͘, tsiah koh ēng 華春瑩ê khùi kháu kóng,"Tiongkok ū tshiaukòe 8,500 king Kenthaki tshanthiaⁿ, bīkak bē phiàn lâng, Tiongkok itti̍t sī Bíkok Kenthaki tsiu ê tsi̍tpō͘hūn. Sit sòaⁿ tsētsē nî ê gíná kuibóe tsóng·sī tio̍h tńglâi tshù·ni̍h."

Bôìtiong, Bíkok Kenthaki tsiu suah tshōe tio̍h sit sòaⁿ tsētsē nî ê gín’á— Tiongkok ．(220812)

Tsù,華（Húa）春瑩 麥當勞 星巴克 肯德基 珍珠奶茶 居酒屋 　 tshiáⁿ liām Hôagí

Pe̍h-ōe-jī-pán/白話字版


《 Le̍k-sik toán-phêng 》　　 Lí Lâm-hêng

　 Bí-kok tshōe tio̍h sit sòaⁿ tsē-tsē nî ê gín-á— Tiong-kok

Bô jōa kú tsìn-tsêng, Tiong-kok tsiâⁿ liû-hêng ēng " Pah-tō͘ tē-tô͘" tshiau tshōe Tâi-oân, pau-kuat í Tiong-kok siâⁿ-tshī miâ hō-miâ ê ke-lō͘, tshiūⁿ-kóng Lâm-kiaⁿ lō͘, Kńg-tsiu ke, á-·sī kah Tiong-kok tē-miâ siong-kuan ê tshan-thiaⁿ, tshiūⁿ-kóng Hok- tsiu hî-oân ta-mī, Sòaⁿ-thâu hóe-ko, lóng hō͘ Tiong-kok bāng-iú kám-kak tsiâⁿ tshù-bī, tsiâⁿ hi-kî, tshiau tshōe liōng tōa-tōa tsēng-ka, sīm-tsì tsē kah tì-sú " Pah-tō͘ tē-tô͘" tsi̍t sî "pang khì" bô huat-tō͘ sú-iōng.

Peh-gue̍h tshe-tshit, hiān-jīm Tiong-kok gōa-kau-pō͘ pō͘-tiúⁿ tsō͘-lí, gōa-kau-pō͘ huat-giân-jîn 華春瑩 lú-sū tsi̍t sî tshiú giauⁿ, ēng Ing-bûn tī “Twitter” téng-bīn huat-piáu ko-lūn, i tī ko-lūn tiong ū tah tsi̍t tiuⁿ "Pah-tō͘ tē-tô͘" ê tsia̍t tô͘, i kóng, tī " Pah-tō͘ tē-tô͘" hián-sī, Tâi-pak-tshī ū 38 king Suaⁿ-tang tsúi-kiáu koán, 67 king Suaⁿ-sai mī koán. Bī-kak bē phiàn lâng, Tâi-oân it-ti̍t sī Tiong-kok ê tsi̍t-pō͘-hūn. Sit sòaⁿ tsē-tsē nî ê gín-á kui-bóe tsóng-·sī tio̍h tńg-lâi tshù-·ni̍h.

I ê bûn-tsiuⁿ tsi̍t-ē tshut-·lâi, tshiò tò kúi pah-bān lâng. Kan-tāⁿ tshiò iáu bô kàu, tsin tsē lâng tsin phah-piàⁿ kā i thí-tshiò á-·sī kā i tsiàⁿ khau tò siah, put-tsí lāu-jia̍t, mā tsēng-ka ta̍k-ê tshiàu-tâm ê tsu-liāu. Tâi-oân tsu-tshim kiû-phêng Tsio̍h Bêng-kín tī bīn-tsheh téng-bīn piáu-sī, kin-kì thóng-kè, Tâi-oân ū 9,000 king Ji̍t-pún liāu-lí tiàm, bī-kak bē phiàn lâng. Tâi-oân tsok-ka Tsu Iū-hun kā華春瑩ê bûn tsoán huat kàu bīn-tsheh, mn̄g kóng,"lí kám-káⁿ sǹg Tâi-oân ū kúi king Bí-kok sik, Ji̍t-pún sik, Hân-kok sik tshan-thiaⁿ? iáu ū Ì-tāi-lī mī?" ū tsi̍t ūi Tiong-kok bāng-iú mā khòaⁿ bē lo̍h-khì, piáu-sī kóng "góa hāi ah, goán tshù hū-kīn 麥當勞, 星巴克, 肯德基lóng tsóng ū, goân-lâi góa sī tī Bí-kok!" lēng-gōa tsi̍t ūi Tiong-kok bāng-iú mn̄g kóng, góa ta̍k kang lim Tâi-oân ê 珍珠奶茶, khòaⁿ beh án-tsóaⁿ?

Ji̍t-pún 《 Sán-king sin-bûn 》 Tāi-pak tsi-kio̍k-tiúⁿ Ya-ita san（矢板明夫）tī bīn-tsheh huat bûn kóng, i tī Tāi-pak tòa nn̄g nî pòaⁿ, kám-kak Tāi-pak ê Ji̍t-pún la-mī tiàm, sú-sih tiàm, 居酒屋 ū-iáⁿ bē tsió. Tān-sī i tsai-iáⁿ, tsua̍t-tùi bô jīm-hô tsi̍t-ê tsèng-siông ê Ji̍t-pún lâng, ē liân-sióng kàu "Tâi-oân ê Ji̍t-pún tshan-koán tsiah-nī tsē, Tâi-oân tio̍h ing-kai sio̍k tī Ji̍t-pún. I koh tshâ-liáu, tī Tang-kiaⁿ kèng-jiân ū 9,000 gōa king Tiong-hôa liāu-lí. Tsit-ê pí-lē ing-kai sī tsoân sè-kài tsú-iàu siâⁿ-tshī tiong siōng koân ê. Siat-sú ū tsi̍t kang, Τiong-kiōng gōa-kau-pō͘ ē-sái kuat-tēng kok-tsè tia̍t-sū, khióng-kiaⁿ Ji̍t-pún ê siú-to͘ tio̍h ē sûi-sî piàn tsoh Τiong-kiōng ê o͘h.

Tâi-oân ū tsi̍t ūi bāng-iú khòaⁿ pò-tō liáu-āu kóng,"tsin hó-tshiò, 華春瑩 sī ēng Ing-bûn huat ê, tsin-tsiàⁿ piàn tsoh kok-tsè tshiò-ōe. "Ū-iáⁿ to̍h tio̍h, in-ūi i ēng Ing-bûn siá ê koh sī tī “Twitter” téng-bīn huat-piáu ê, tsiah ē ín-khí Bí-kok Kok-bū-īⁿ tsêng huat-giân-jîn Otagusu（Morgan Ortagus） lú-sū mā kāng-khoán tī “Twitter” téng-bīn, sing kā華春瑩ê PO bûn tsia̍t tô͘, tsiah koh ēng 華春瑩ê khùi kháu kóng,"Tiong-kok ū tshiau-kòe 8,500 king Ken-thaki tshan-thiaⁿ, bī-kak bē phiàn lâng, Tiong-kok it-ti̍t sī Bí-kok Ken-thaki tsiu ê tsi̍t-pō͘-hūn. Sit sòaⁿ tsē-tsē nî ê gín-á kui-bóe tsóng-·sī tio̍h tńg-lâi tshù-·ni̍h."

Bô-ì-tiong, Bí-kok Ken-thaki tsiu suah tshōe tio̍h sit sòaⁿ tsē-tsē nî ê gín-á— Tiong-kok ．(220812)

Tsù, 華（Húa）春瑩 麥當勞 星巴克 肯德基 珍珠奶茶 　居 酒屋 　 tshiáⁿ liām Hôa-gí


無jōa久進前，中國tsiâⁿ流行用「百度地圖」搜tshōe台灣，包括以中國城市名號名ê街路，像講南京路、廣州街，抑是kah中國地名相關ê餐廳，像講福州魚丸乾麵、汕頭火鍋，lóng hō͘中國網友感覺tsiâⁿ趣味、tsiâⁿ稀奇，搜tshōe量大大增加，甚至tsē kah致使「百度地圖」一時「崩去」無法度使用。

八月初七，現任中國外交部部長助理、外交部發言人華春瑩女士一時手癢（giauⁿ），用英文tī“Twitter”頂面發表高論，伊tī高論中有貼一張「百度地圖」ê截圖，伊講，tī「百度地圖」顯示，台北市有38間山東水餃館、67家山西麵館。味覺bē騙人，台灣一直是中國ê一部分。失散（sit-sòaⁿ）tsētsē年ê gín-ákui尾總是tio̍h轉來厝裡。

伊ê文章一下出來，笑倒幾百萬人。干單笑猶無夠，真tsē人真拍拼kā伊恥笑抑是 kā伊正刨（khau）倒削，不止鬧熱，mā增加逐个笑談ê資料。台灣資深球評石明謹tī面冊頂面表示，根據統計，台灣有9,000家日本料理店，味覺bē騙人。台灣作家朱宥（iū）勳kā華春瑩ê文轉發到面冊，問講：「你kám-káⁿ算台灣有幾間美國式、日本式、韓國式餐廳？猶有義大利麵？」有一位中國網友mā看bē落去，表示講「我害ah，阮厝附近麥當勞、星巴克、肯德基lóng總有，原來我是tī美國！」另外一位中國網友問講，我逐工lim台灣ê珍珠奶茶，看beh按怎？

日本《產經新聞》台北支局長Ya-ita san（矢板明夫）tī面冊發文講，伊tī台北tòa兩年半，感覺台北ê日本拉麵店、壽司店、居酒屋有影bē少。但是伊知影，絕對無任何一個正常ê日本人，會聯想到「台灣ê日本餐館tsiah-nītsē，台灣tio̍h應該屬tī日本。伊koh查了，tī東京竟然有9,000外間中華料理。這個比例應該是全世界主要城市中上koânê。設使有一工，中共外交部會使決定國際秩序，恐驚日本ê首都tio̍h會隨時變作中共ê o͘h。

台灣有一位網友看報導了後講：「真好笑，華春瑩是用英文發ê，真正變作國際笑話。」有影to̍h tio̍h，因為伊用英文寫êkoh是tī“Twitter”頂面發表ê，tsiahē引起美國國務院前發言人Otagusu（Morgan Ortagus）女士mā仝款tī“Twitter”頂面，先kā華春瑩êPO文截圖，才koh用華春瑩ê氣口講：「中國有超過8,500間Ken-thaki餐廳，味覺bē騙人，中國一直是美國Ken-thaki州ê一部分。失散tsētsē年ê gín-ákui尾總是tio̍h轉來厝裡。」

無意中，美國Ken-thaki州suah tshōe tio̍h失散tsētsē年ê gín-á—中國．(220812)

註：華（Húa）春瑩 麥當勞 星巴克 肯德基 珍珠奶茶　居酒屋　請唸華語