《綠色短評》

 | | | 轉寄

中國ê制裁，啥人ē驚？

作者 李南衡, TsoânTâijī/全台字 by Tsng Hūiphêng 2022.08.28


Tsoânbîn Tâioânjī pán/全民台灣字版簡稱TsoânTâiJī

《 Le̍ksik Toánphêng 》　　 Lí Lâmhêng

　　　　 Tiongkok ê tsètshâi, siáⁿ lâng ē kiaⁿ?

　　 Pehgue̍h tsa̍pla̍k sinbûn pòtō, Tiongkok tsènghú í Bíkok Liânpang Tsiònggīīⁿ gītiúⁿ Phelosi(Nancy Pelosi) hóngbūn Tâioân tsoh tsiàkháu, tùi Tâioân huattōng tōa kuibô͘ bûnkongbúheⁿh. Tiongkok Káihòngkun tī Tâioân tsiuûi 6 ê háikhonge̍k tsìnhêng si̍t tôaⁿ siākik kunsū iánsi̍p, Tiongkok tsù Bí tāisài Tsîn Kong tī Bíkok huattōng suanthoân tsiàn, tī “Twitter” téngbīn huat bûn, pehgue̍h tshesì tī 《 Washington Iûpò 》 tâusu kóng Tâioân tsúkoân sī Tiongkok ê, tsítsik Phelosi hóngbūn Tâioân sī "ûipōe Bíkok bô beh kah Tâioân huattián kuaⁿhong kuanhē ê sênglo̍k."

Lán Tâioân ê tsù Bí tāipiáu Siau Bíkhîm tsikke̍k èngtsiàn. Pehgue̍h tshegō͘ tsì tsa̍pit, tshit kang lāi tsiapsiū paukuat CBS Sinbûn Bāng, Bíkok Kongkiōng Tiānsītâi, Microsoft Kokka Kóngpò͘ Kongsi, CNN kah Fox sinbûn téng Bíkok gō͘ king tsúiàu mûithé tsuanhóng, hiòng Bíkok kokkài jînsū suatbêng bo̍ktsêng Tâihái kio̍ksè, Tâioân tsènghú tsèngtshik kah li̍ptiûⁿ, hoánpo̍k Tiongkok tùi Tâi tsúkoân biūlūn, tsingtshú koktsè ûlūn tsitshî.

　　 Pehgue̍h tsa̍pla̍k, Τiongkiōng Tiongiong Tâipān huatgiânjîn suanpò͘ tùi tsi̍t phue "台獨頑固分子" si̍tsi tsètshâi, ū Siau Bíkhîm, Kò͘ Li̍phiông, Tshòa Kîtshiong,Kua Kiànbêng,Lîm Huiphâng, Tân Siokhôa, Ông Tēngú téng tshit ê lâng.

　　 Siūⁿkhí Bíkok Liânpang Tsiònggīīⁿ gītiúⁿ Phelosi hóngbūn Tâioân tńgkhì Bíkok liáuāu, Tiongkok tsènghú sûisî suanpò͘ tsètshâi Phelosi tsoânke. I ê suná kikiám ge Tiongkok, mn̄g amá kóng,"Tiongkok kā lán tsètshâi, sī m̄ sī beh santû TikTok tiùⁿhō? tānsī góa kinpún m̄bat ēng kòe TikTok!"

　　 Bíkok tsètshâi Hiangkáng kuaⁿoân tsiah ē hông kiaⁿ. Bíkok tsètshâi paukuat Hiangkáng Te̍ksiú LîmTēⁿ Gua̍tngô͘ tsāilāi tsa̍pit ūi kuaⁿoân, hongsó ti̍ttsiap á·sī kantsiap tī Bíkok tshîiú ê pângsán kah koânik, bētàng súiōng kah Bíkok siongkuan gînhâng ê sìniōngkhá. Kìmtsí tsiahê kuaⁿoân kah Bíkok lâng á·sī tī Bíkok kénglāi tsò singlí, bô huattō͘ tsò jīmhô kah Bíkok kikim, hòephín, ho̍kbū ê bébē, bētàng ū Bíkok ji̍pkéng tshiamtsèng.

　　 Tiongkok kóng beh tsètshâi Phelosi, hiānsî kiàkha Bíkok ê1989 nî O̍hūn léngsiù Ông Tan kā Tiongkok tsng siáu, kóng thêkiong 4 hāng tsètshâi hō͘ Phelosi hō͘ Tiongkok tshamkhó, tēit "kìmtsí Phelositī Hôlâmséng tshuntìn gînhâng tsûnkhoán. "Tsòikīn Hôlâmséng tshuntìn gînhâng tósiàu, puttsún tsûnkhoánjîn khì niá tsîⁿ; tējī "kìmtsí Phelosi tī Tn̂gsuaⁿ tshī pòaⁿmê tshutmn̂g khì tsia̍h Siauiā. "La̍kgue̍h tshetsa̍p pòaⁿmê, Tn̂gsuaⁿ tshī tsi̍t king hangbah tiàm, ū tsi̍tê lâmtsú beh bíkosiûⁿ tsi̍t ūi lúsèng kò͘kheh bô tsiâⁿ, kiànsiàu tńg siūkhì tshuttshiú phah lâng. Tēsaⁿ "kìmtsí Phelosi tī Tiongkok tāikhoán bé 爛尾樓." 2020 nî Tiongkok tsènghú hāntsè kiànsiong tāi khoán, gînhâng kuattēng thiu tsáu kiànsiong gîn kin, tsin tsē pângtēsán khaihuat siong tshuthiān ûiiok. Tiongkok tsènghú kītsua̍t ūitio̍h iáu bōe oânkang ê 爛尾樓 hù khoán bé tshù ê bîntsiòng pângok tāikhoán, ū tshiaukòe 240 bān hō͘, ha̍p kè iok sin tâipè 11.09 tiāu. Tēsì "kìmtsí Phelosi khì Tshîtsiu thàmsī Thi̍hliānlú." 2022 nî itgue̍h Tshîtsiu Sóliānlú ge̍kthāi sūkiāⁿ, khansia̍p totshù jînkháu hoànūn ànkiāⁿ, ū tsi̍t miâ tsingsîn īⁿsiòng hông siûkim ê lútsú ū singio̍k peh ê gíná ê pikio̍k. Ông Tan mn̄g kóng ísiōng 4 hāng tsètshâi, Phelosiē kiaⁿ ah bē?!

　　 Tiongkok ê tsètshâi ke̍kke sī, put tsún lí khì Tiongkok, Hiangkáng kah Òmn̂g. Siáⁿ lâng ē kiaⁿ? 　(220819)

Tsù,"台獨頑固分子" 爛尾樓 　　 tshiáⁿ liām Hôagí

Pe̍h-ōe-jī-pán/白話字版

《 Le̍k-sik Toán-phêng 》　　 Lí Lâm-hêng

　　　　 Tiong-kok ê tsè-tshâi, siáⁿ lâng ē kiaⁿ?

　　 Peh-gue̍h tsa̍p-la̍k sin-bûn pò-tō, Tiong-kok tsèng-hú í Bí-kok Liân-pang Tsiòng-gī-īⁿ gī-tiúⁿ Phe-lo-si(Nancy Pelosi) hóng-būn Tâi-oân tsoh tsià-kháu, tùi Tâi-oân huat-tōng tōa kui-bô͘ bûn-kong-bú-heⁿh. Tiong-kok Kái-hòng-kun tī Tâi-oân tsiu-ûi 6 ê hái-khong-e̍k tsìn-hêng si̍t tôaⁿ siā-kik kun-sū ián-si̍p, Tiong-kok tsù Bí tāi-sài Tsîn Kong tī Bí-kok huat-tōng suan-thoân tsiàn, tī “Twitter” téng-bīn huat bûn, peh-gue̍h tshe-sì tī 《 Washington Iû-pò 》 tâu-su kóng Tâi-oân tsú-koân sī Tiong-kok ê, tsí-tsik Phe-lo-si hóng-būn Tâi-oân sī "ûi-pōe Bí-kok bô beh kah Tâi-oân huat-tián kuaⁿ-hong kuan-hē ê sêng-lo̍k."

Lán Tâi-oân ê tsù Bí tāi-piáu Siau Bí-khîm tsik-ke̍k èng-tsiàn. Peh-gue̍h tshe-gō͘ tsì tsa̍p-it, tshit kang lāi tsiap-siū pau-kuat CBS Sin-bûn Bāng, Bí-kok Kong-kiōng Tiān-sī-tâi, Microsoft Kok-ka Kóng-pò͘ Kong-si, CNN kah Fox sin-bûn téng Bí-kok gō͘ king tsú-iàu mûi-thé tsuan-hóng, hiòng Bí-kok kok-kài jîn-sū suat-bêng bo̍k-tsêng Tâi-hái kio̍k-sè, Tâi-oân tsèng-hú tsèng-tshik kah li̍p-tiûⁿ, hoán-po̍k Tiong-kok tùi Tâi tsú-koân biū-lūn, tsing-tshú kok-tsè û-lūn tsi-tshî.

　　 Peh-gue̍h tsa̍p-la̍k, Τiong-kiōng Tiong-iong Tâi-pān huat-giân-jîn suan-pò͘ tùi tsi̍t phue "台獨頑固分子" si̍t-si tsè-tshâi, ū Siau Bí-khîm, Kò͘ Li̍p-hiông, Tshòa Kî-tshiong,Kua Kiàn-bêng,Lîm Hui-phâng, Tân Siok-hôa, Ông Tēng-ú téng tshit ê lâng.

　　 Siūⁿ-khí Bí-kok Liân-pang Tsiòng-gī-īⁿ gī-tiúⁿ Phe-lo-si hóng-būn Tâi-oân tńg-khì Bí-kok liáu-āu, Tiong-kok tsèng-hú sûi-sî suan-pò͘ tsè-tshâi Phe-lo-si tsoân-ke. I ê sun-á ke-kiám ge Tiong-kok, mn̄g a-má kóng,"Tiong-kok kā lán tsè-tshâi, sī m̄ sī beh san-tû TikTok tiùⁿ-hō? tān-sī góa kin-pún m̄-bat ēng kòe TikTok!"

　　 Bí-kok tsè-tshâi Hiang-káng kuaⁿ-oân tsiah ē hông kiaⁿ. Bí-kok tsè-tshâi pau-kuat Hiang-káng Te̍k-siú Lîm-Tēⁿ Gua̍t-ngô͘ tsāi-lāi tsa̍p-it ūi kuaⁿ-oân, hong-só ti̍t-tsiap á-·sī kan-tsiap tī Bí-kok tshî-iú ê pâng-sán kah koân-ik, bē-tàng sú-iōng kah Bí-kok siong-kuan gîn-hâng ê sìn-iōng-khá. Kìm-tsí tsiah-ê kuaⁿ-oân kah Bí-kok lâng á-·sī tī Bí-kok kéng-lāi tsò sing-lí, bô huat-tō͘ tsò jīm-hô kah Bí-kok ki-kim, hòe-phín, ho̍k-bū ê bé-bē, bē-tàng ū Bí-kok ji̍p-kéng tshiam-tsèng.

　　 Tiong-kok kóng beh tsè-tshâi Phe-lo-si, hiān-sî kià-kha Bí-kok ê1989 nî O̍h-ūn léng-siù Ông Tan kā Tiong-kok tsng siáu, kóng thê-kiong 4 hāng tsè-tshâi hō͘ Phe-lo-si hō͘ Tiong-kok tsham-khó, tē-it "kìm-tsí Phe-lo-sitī Hô-lâm-séng tshun-tìn gîn-hâng tsûn-khoán. "Tsòe-kīn Hô-lâm-séng tshun-tìn gîn-hâng tó-siàu, put-tsún tsûn-khoán-jîn khì niá tsîⁿ; tē-jī "kìm-tsí Phe-lo-si tī Tn̂g-suaⁿ tshī pòaⁿ-mê tshut-mn̂g khì tsia̍h Siau-iā. "La̍k-gue̍h tshe-tsa̍p pòaⁿ-mê, Tn̂g-suaⁿ tshī tsi̍t king hang-bah tiàm, ū tsi̍t-ê lâm-tsú beh bí-ko-siûⁿ tsi̍t ūi lú-sèng kò͘-kheh bô tsiâⁿ, kiàn-siàu tńg siū-khì tshut-tshiú phah lâng. Tē-saⁿ "kìm-tsí Phe-lo-si tī Tiong-kok tāi-khoán bé 爛尾樓." 2020 nî Tiong-kok tsèng-hú hān-tsè kiàn-siong tāi- khoán, gîn-hâng kuat-tēng thiu tsáu kiàn-siong gîn kin, tsin tsē pâng-tē-sán khai-huat siong tshut-hiān ûi-iok. Tiong-kok tsèng-hú kī-tsua̍t ūi-tio̍h iáu bōe oân-kang ê 爛尾樓 hù khoán bé tshù ê bîn-tsiòng pâng-ok tāi-khoán, ū tshiau-kòe 240 bān hō͘, ha̍p kè iok sin tâi-pè 11.09 tiāu. Tē-sì "kìm-tsí Phe-lo-si khì Tshî-tsiu thàm-sī Thi̍h-liān-lú." 2022 nî it-gue̍h Tshî-tsiu Só-liān-lú ge̍k-thāi sū-kiāⁿ, khan-sia̍p to-tshù jîn-kháu hoàn-ūn àn-kiāⁿ, ū tsi̍t miâ tsing-sîn īⁿ-siòng hông siû-kim ê lú-tsú ū sing-io̍k peh ê gín-á ê pi-kio̍k. Ông Tan mn̄g kóng í-siōng 4 hāng tsè-tshâi, Phe-lo-siē kiaⁿ ah bē?!

　　 Tiong-kok ê tsè-tshâi ke̍k-ke sī, put tsún lí khì Tiong-kok, Hiang-káng kah Ò-mn̂g. Siáⁿ lâng ē kiaⁿ? 　(220819)

Tsù,"台獨頑固分子" 爛尾樓 　　 tshiáⁿ liām Hôa-gí

《綠色短評》　　李南衡

　　　　　　　　中國ê制裁，啥人ē驚？

　　八月十六新聞報導，中國政府以美國聯邦眾議院議長Phe-lo-si（Nancy Pelosi）訪問台灣作藉口，對台灣發動大規模文攻武嚇。中國解放軍tī 台灣周圍6个海空域進行實彈射擊軍事演習，中國駐美大使秦剛tī 美國發動宣傳戰，tī “Twitter”頂面發文，八月初四tī 《華盛頓郵報》投書講台灣主權是中國ê，指責Phe-lo-si訪問台灣是「違背美國無beh kah台灣發展官方關係ê承諾。」

咱台灣ê駐美代表蕭美琴積極應戰。八月初五至十一，七工內接受包括CBS新聞網、美國公共電視台、微軟國家廣播公司、CNN kah Fox新聞等美國五間主要媒體專訪，向美國各界人士說明目前台海局勢，台灣政府政策kah立場，反駁中國對台主權謬論，爭取國際輿論支持。

　　八月十六，中共中央台辦發言人宣佈對一批「台獨頑固分子」實施制裁，有蕭美琴、顧立雄、蔡其昌、柯建銘、林飛帆、陳椒華、王定宇等七个人。

　　想起美國聯邦眾議院議長Phe-lo-si訪問台灣轉去美國了後，中國政府隨時宣布制裁Phe-lo-si全家。伊ê孫仔加減ge中國、問A媽講，「中國kā咱制裁，是m̄是beh刪除TikTok帳號？但是我根本m̄-bat用過TikTok！」

　　美國制裁香港官員才ēhông驚。美國制裁包括香港特首林鄭月娥在內十一位官員，封鎖直接抑是間接tī 美國持有ê房產kah權益，bē-tàng使用kah美國相關銀行ê信用卡。禁止tsiah-ê官員kah美國人抑是tī 美國境內做生理，無法度做任何kah美國基金、貨品、服務ê買賣，bē-tàng有美國入境簽證。

　　中國講beh制裁Phe-lo-si，現時旅居美國ê1989年學運領袖王丹kā中國裝siáu，講提供4項制裁hō͘ Phe-lo-si hō͘中國參考：第一「禁止Phe-lo-sitī 河南省村鎮銀行存款。」最近河南省村鎮銀行倒數，不准存款人去領錢；第二「禁止Phe-lo-sitī 唐山市半暝出門去食宵夜。」六月初十半暝，唐山市一間烘肉店，有一个男子beh 米糕siûⁿ一位女性顧客無成，見笑轉受氣出手拍人。第三「禁止Phe-lo-sitī 中國貸款買爛尾樓。」2020年中國政府限制建商貸款，銀行決定抽走建商銀根，真tsē房地產開發商出現違約。中國政府拒絕為tio̍h猶未完工ê爛尾樓付款買厝ê民眾房屋貸款，有超過240萬戶，合計約新台幣11.09兆。第四「禁止Phe-lo-si去徐州探視鐵鍊女。」2022年一月徐州鎖鏈女虐待事件，牽涉多次人口販運案件，有一名精神異常hông囚禁ê女子有生育八个gín-á ê悲劇。王丹問講以上4項制裁，Phe-lo-siē驚抑bē？！

　　中國ê制裁極加是，不准你去中國、香港kah奧門。啥人ē驚？　(220819)

註：「台獨頑固分子」 爛尾樓　　請唸華語