《綠色短評》

 | | | 轉寄

台灣、中國，亙不隸屬，馬英九講是違憲！

作者 李南衡, TsoânTâijī/全台字 by Tsng Hūiphêng 2022.10.23

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　 Lí Lâmhêng

　　　　　 Tâioân, Tiongkok, hō͘ put lēsio̍k, Má Ingkiú kóng sī ûihiàn!

　　 Tsêng tsóngthóng Má Ingkiú nā bô kóngōe, kiaⁿ hông kóng i sī ékáu, só͘í kúkúá tio̍h ē kóng tsi̍tê tshiòōe. Má Ingkiú ê tshiòōe sī kóng, kūnî kok khèng tiánlé siōng, Tshòa Ingbûn tsóngthóng thêtshut "Tionghôa Bînkok kah Tionghôa Jînbîn Kiōnghôkok" hō͘ put lēsio̍k, sībô pitiàu ê thiauhùn khíkhang, kohkhah sī ûihoán Tionghôa Bînkok hiànhuat. Káugue̍h jīpeh, Má Ingkiú tshutse̍k "nn̄g hōaⁿ kau liû 35 nî hôikò͘ kah tiánbōng tsōtâmhōe" ê sî, i ánne kóng·ê. Má Ingkiú tsitgî, Tshòa Ingbûn bô khòaⁿkòe Tionghôa Bînkok hiànhuat tsingsiu tiâubûn, kóng·ê sī khangōe, nāsī hō͘siong put lēsio̍k tsintsiàⁿ si̍thiān, tio̍h ē piànsêng nn̄gê Tiongkok.

Káugue̍h jīkáu, Lio̍kúihōe hôeèng kóng, Tionghôa Bînkok sī tsúkoân to̍kli̍p kokka, tsènghú kunkù《 Tionghôa Bînkok hiànhuat 》 tīlí kokka, kah Tionghôa Jînbîn Kiōnghôkok hō͘ put lēsio̍k, 《 Tionghôa Bînkok hiànhuat 》kah《tsingsiu tiâubûn 》 só͘ū tiâubûn hian thàuthàu, tshōe bô Tionghôa Bînkok lēsio̍k sèkài siōng jīmhô tsi̍tê kokka.

　　 Tsa̍pgue̍h tshejī, Tiongkok Kokbîntóng Tâipaktshītiúⁿ tshamsoánjîn Tsiúⁿ Bānan kípān Bûnsankhu āuoānhōe sêngli̍p tāihōe, tsêng Tâipaktshītiúⁿ Hok Liôngpin, Má Ingkiú téng tsi̍ttīn lâng lóng ū kàu tiûⁿ khiā tâi. Má Ingkiú kohtsài tsitgî Tshòa Ingbûn thêtshut nn̄g hōaⁿ hō͘siong put lēsio̍k, kinpún sībô khòaⁿkòe Tionghôa Bînkok hiànhuat tsingsiu tiâubûn, tsingsiu tiâubûn kóng Tâioân kah Tiongkok lóng sī Tionghôa Bînkok, Tāilio̍k tēkhu sī Tâi, Phêⁿ, Kim,Bé ígōa ê Tionghôa Bînkok léngthó͘, tsiahê léngthó͘ tī hiànhuat siōng iûgoân sī lán ê léngthó͘, tānsī tī Tiongkok hiànhuat tiong, Tâioân sī Tiongkok ê. Má Ingkiú kóng kui po͘, káⁿ ū kóng tàuté tó tsi̍t kok lēsio̍k tó tsi̍t kok, bô. I tsiah sī teh kóng khangōe.

　　2015 nî tsa̍pitgue̍h tshetshit, Má Ingkiú í Tionghôa Bînkok tsóngthóng sinhūn, 習近平 í Tionghôa Jînbîn Kiōnghôkok tsúse̍k sin hūn, lâng tshingho͘ tsoh "nn̄g hōaⁿ léngtōjîn hōebiān" tī Sinkapho kíhêng hōetâm. Bôkoán sī kongkhai á·sī sutéhā, tongsî ê Má Ingkiú tsóngthóng káⁿ ū kā 習近平 tsúse̍k kóng tshingtshó, kinkì goán Tionghôa Bînkok ê hiànhuat tsingsiu tiâubûn, lín Tiongkok Tāilio̍k tēkhu sī Tâi, Phêⁿ, Kim,Bé ígōa ê Tionghôa Bînkok léngthó͘? nāsī tsiàu sinbûn pòtō lâi khòaⁿ, bôlūn kongkhai á·sī sutéhā, Má Ingkiú sī lóng bô kóng. Ánne, tsi̍tê tāipiáu Tionghôa Bînkok, tsi̍tê tāipiáu Tionghôa Jînbîn Kiōnghôkok, in nn̄gê thâulâng kongkhai piáuián nn̄gê hō͘ put lēsio̍k ê kokka, káⁿ m̄ sī tsintsiàⁿ si̍thiān tio̍h nn̄gê Tiongkok leh?

Bôkoán Tiongkok í tōa kuibô͘ kunián khiónghat Tâioân, phòhoāi Tâi hái hôpêng ê sî, mā bôkoán koklāi hoántùi siaⁿlōng, pehgue̍h tiong, Tiongkok Kokbîntóng hùtsúse̍k Hā Li̍pgiân iûgoân tshōa thoân khì Tiongkok, kah Tiongkok Koktâipān hùtsújīm Tân Kho͘hong, Háihia̍phōetiúⁿ Tiuⁿ Tsìkun kìⁿbīn. Gue̍h gōa ji̍tāu ê tsa̍pgue̍h tshesaⁿ, Hā Li̍pgiân kongkhai piáusī, i sī ûṳt tsi̍tê káⁿ kongkhai tī Tiongkok kuaⁿoân bīntsêng piáuta̍t Tiongkok tùi Tâi kunián putboán ê lâng. Hā Li̍pgiân kóng, i kā tùihōaⁿ kuaⁿoân kóng "90% Tâioân lâng putboán Tiongkok tùi tâi kunián, tùi kunián kámkak bē sóng, kámkak hoânló". Tsin sitlé, kóng tsoh lí kóng, Tiongkok oântsoân bô teh kā i sìntáu. Tsiàusiông kunián. Hā Li̍pgiân tio̍h sī siūⁿ kóng Tâioân, Tiongkok hō͘ put lēsio̍k, m̄tsiah ē ánne tata kiò.

　　 Tâioân, Tiongkok, hō͘ put lēsio̍k, Má Ingkiú kóng sī ûihiàn! tshiò phòa lâng ê tshùi. 　 (221007)

Tsù, 習近平 　　　　 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》　　　 Lí Lâm-hêng

　　　　　 Tâi-oân, Tiong-kok, hō͘ put lē-sio̍k, Má Ing-kiú kóng sī ûi-hiàn!

　　 Tsêng tsóng-thóng Má Ing-kiú nā bô kóng-ōe, kiaⁿ hông kóng i sī é-káu, só͘-í kú-kú-á tio̍h ē kóng tsi̍t-ê tshiò-ōe. Má Ing-kiú ê tshiò-ōe sī kóng, kū-nî kok khèng tián-lé siōng, Tshòa Ing-bûn tsóng-thóng thê-tshut "Tiong-hôa Bîn-kok kah Tiong-hôa Jîn-bîn Kiōng-hô-kok" hō͘ put lē-sio̍k, sī-bô pit-iàu ê thiau-hùn khí-khang, koh-khah sī ûi-hoán Tiong-hôa Bîn-kok hiàn-huat. Káu-gue̍h jī-peh, Má Ing-kiú tshut-se̍k "nn̄g hōaⁿ kau liû 35 nî hôe-kò͘ kah tián-bōng tsō-tâm-hōe" ê sî, i án-ne kóng-·ê. Má Ing-kiú tsit-gî, Tshòa Ing-bûn bô khòaⁿ-kòe Tiong-hôa Bîn-kok hiàn-huat tsing-siu tiâu-bûn, kóng-·ê sī khang-ōe, nā-sī hō͘-siong put lē-sio̍k tsin-tsiàⁿ si̍t-hiān, tio̍h ē piàn-sêng nn̄g-ê Tiong-kok.

Káu-gue̍h jī-káu, Lio̍k-úi-hōe hôe-èng kóng, Tiong-hôa Bîn-kok sī tsú-koân to̍k-li̍p kok-ka, tsèng-hú kun-kù《 Tiong-hôa Bîn-kok hiàn-huat 》 tī-lí kok-ka, kah Tiong-hôa Jîn-bîn Kiōng-hô-kok hō͘ put lē-sio̍k, 《 Tiong-hôa Bîn-kok hiàn-huat 》kah《tsing-siu tiâu-bûn 》 só͘-ū tiâu-bûn hian thàu-thàu, tshōe bô Tiong-hôa Bîn-kok lē-sio̍k sè-kài siōng jīm-hô tsi̍t-ê kok-ka.

　　 Tsa̍p-gue̍h tshe-jī, Tiong-kok Kok-bîn-tóng Tâi-pak-tshī-tiúⁿ tsham-soán-jîn Tsiúⁿ Bān-an kí-pān Bûn-san-khu āu-oān-hōe sêng-li̍p tāi-hōe, tsêng Tâi-pak-tshī-tiúⁿ Hok Liông-pin, Má Ing-kiú téng tsi̍t-tīn lâng lóng ū kàu tiûⁿ khiā tâi. Má Ing-kiú koh-tsài tsit-gî Tshòa Ing-bûn thê-tshut nn̄g hōaⁿ hō͘-siong put lē-sio̍k, kin-pún sī-bô khòaⁿ-kòe Tiong-hôa Bîn-kok hiàn-huat tsing-siu tiâu-bûn, tsing-siu tiâu-bûn kóng Tâi-oân kah Tiong-kok lóng sī Tiong-hôa Bîn-kok, Tāi-lio̍k tē-khu sī Tâi, Phêⁿ, Kim,Bé í-gōa ê Tiong-hôa Bîn-kok léng-thó͘, tsiah-ê léng-thó͘ tī hiàn-huat siōng iû-goân sī lán ê léng-thó͘, tān-sī tī Tiong-kok hiàn-huat tiong, Tâi-oân sī Tiong-kok ê. Má Ing-kiú kóng kui po͘, káⁿ ū kóng tàu-té tó tsi̍t kok lē-sio̍k tó tsi̍t kok, bô. I tsiah sī teh kóng khang-ōe.

　　2015 nî tsa̍p-it-gue̍h tshe-tshit, Má Ing-kiú í Tiong-hôa Bîn-kok tsóng-thóng sin-hūn, 習近平 í Tiong-hôa Jîn-bîn Kiōng-hô-kok tsú-se̍k sin hūn, lâng tshing-ho͘ tsoh "nn̄g hōaⁿ léng-tō-jîn hōe-biān" tī Sin-ka-pho kí-hêng hōe-tâm. Bô-koán sī kong-khai á-·sī su-té-hā, tong-sî ê Má Ing-kiú tsóng-thóng káⁿ ū kā 習近平 tsú-se̍k kóng tshing-tshó, kin-kì goán Tiong-hôa Bîn-kok ê hiàn-huat tsing-siu tiâu-bûn, lín Tiong-kok Tāi-lio̍k tē-khu sī Tâi, Phêⁿ, Kim,Bé í-gōa ê Tiong-hôa Bîn-kok léng-thó͘? nā-sī tsiàu sin-bûn pò-tō lâi khòaⁿ, bô-lūn kong-khai á-·sī su-té-hā, Má Ing-kiú sī lóng bô kóng. Án-ne, tsi̍t-ê tāi-piáu Tiong-hôa Bîn-kok, tsi̍t-ê tāi-piáu Tiong-hôa Jîn-bîn Kiōng-hô-kok, in nn̄g-ê thâu-lâng kong-khai piáu-ián nn̄g-ê hō͘ put lē-sio̍k ê kok-ka, káⁿ m̄ sī tsin-tsiàⁿ si̍t-hiān tio̍h nn̄g-ê Tiong-kok leh?

Bô-koán Tiong-kok í tōa kui-bô͘ kun-ián khióng-hat Tâi-oân, phò-hoāi Tâi hái hô-pêng ê sî, mā bô-koán kok-lāi hoán-tùi siaⁿ-lōng, peh-gue̍h tiong, Tiong-kok Kok-bîn-tóng hù-tsú-se̍k Hā Li̍p-giân iû-goân tshōa thoân khì Tiong-kok, kah Tiong-kok Kok-tâi-pān hù-tsú-jīm Tân Kho͘-hong, Hái-hia̍p-hōe-tiúⁿ Tiuⁿ Tsì-kun kìⁿ-bīn. Gue̍h gōa ji̍t-āu ê tsa̍p-gue̍h tshe-saⁿ, Hā Li̍p-giân kong-khai piáu-sī, i sī ûi-it tsi̍t-ê káⁿ kong-khai tī Tiong-kok kuaⁿ-oân bīn-tsêng piáu-ta̍t Tiong-kok tùi Tâi kun-ián put-boán ê lâng. Hā Li̍p-giân kóng, i kā tùi-hōaⁿ kuaⁿ-oân kóng "90% Tâi-oân lâng put-boán Tiong-kok tùi tâi kun-ián, tùi kun-ián kám-kak bē sóng, kám-kak hoân-ló". Tsin sit-lé, kóng tsoh lí kóng, Tiong-kok oân-tsoân bô teh kā i sìn-táu. Tsiàu-siông kun-ián. Hā Li̍p-giân tio̍h sī siūⁿ kóng Tâi-oân, Tiong-kok hō͘ put lē-sio̍k, m̄-tsiah ē án-ne ta-ta kiò.

　　 Tâi-oân, Tiong-kok, hō͘ put lē-sio̍k, Má Ing-kiú kóng sī ûi-hiàn! tshiò phòa lâng ê tshùi. 　 (221007)

Tsù, 習近平 　　　　 tshiáⁿ liām Hôa-gí



　　前總統馬英九若無講話，驚hông講伊是啞口，所以久久á tio̍hē講一個笑話。馬英九ê笑話是講：舊年國慶典禮上，蔡英文總統提出「中華民國kah中華人民共和國」互不隸屬，是無必要ê挑釁（hùn）起空，koh-khah是違反中華民國憲法。九月二八，馬英九出席「兩岸交流35年回顧kah展望座談會」ê時，伊án-ne講-·ê。馬英九質疑，蔡英文無看過中華民國憲法增修條文、講-·ê是空話，若是互相不隸屬真正實現，tio̍hē變成兩個中國。

九月二九，陸委會回應講，中華民國是主權獨立國家，政府依據《中華民國憲法》治理國家，kah中華人民共和國互不隸屬，《中華民國憲法》kah《增修條文》所有條文hian透透，tshōe無中華民國隸屬世界上任何一個國家。

　　十月初二，中國國民黨台北市長參選人蔣萬安舉辦文山區後援會成立大會，前台北市長郝龍斌、馬英九等一陣人lóng有到場khiā台。馬英九koh再質疑蔡英文提出兩岸互相不隸屬，根本是無看過中華民國憲法增修條文，增修條文講台灣kah中國lóng是中華民國，大陸地區是台、澎、金馬以外ê中華民國領土，tsiah-ê領土tī憲法上猶原是咱ê領土，但是tī中國憲法中，台灣是中國ê。馬英九講歸晡，敢有講到底tó一國隷屬tó一國，無。伊tsiah是teh講空話。

　　2015年十一月初七，馬英九以中華民國總統身份、習近平以中華人民共和國主席身份，人稱呼作「兩岸領導人會面」tī新加坡舉行會談。無管是公開抑是私底下，當時ê馬英九總統敢有kā習近平主席講清楚：根據阮中華民國ê憲法增修條文，lín中國大陸地區是台、澎、金馬以外ê中華民國領土？若是照新聞報導來看，無論公開抑是私底下，馬英九是lóng無講。án-ne，一個代表中華民國，一個代表中華人民共和國，in兩個頭人公開表演兩個亙不隸屬ê國家，敢m̄是真正實現tio̍h兩個中國咧？

無管中國以大規模軍演恫嚇台灣、破壞台海和平ê時，mā無管國內反對聲浪，八月中，中國國民黨副主席夏立言猶原tshōa團去中國，kah中國國台辦副主任陳元豐、海協會長張志軍見面。月外日後ê十月初三，夏立言公開表示，伊是唯一一個敢公開tī中國官員面前表達中國對台軍演不滿ê人。夏立言講，伊kā對岸官員講「90%台灣人不滿中國對台軍演，對軍演感覺bē爽，感覺煩惱」。真失禮，講作你講，中國完全無teh kā伊sìn-táu。照常軍演。夏立言tio̍h是想講台灣、中國亙不隸屬，m̄tsiahēán-ne ta-ta叫。

　　台灣、中國，亙不隸屬，馬英九講是違憲！笑破人ê嘴。　 (221007)

註：習近平　　　　請唸華語