《綠色短評》

 | | | 轉寄

平平是清零，台灣、中國差hiah tsē！

作者 李南衡, TsoânTâijī/全台字 by Tsng Hūiphêng 2022.11.20

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　 Lí Lâmhêng

　　 Pêⁿpêⁿ sī tshing lêng, Tâioân, Tiongkok tsha hiah tsē!

　　 Tsa̍pgue̍h tsa̍pla̍k, Τiongkiōng tsóngsukì 習近平 tī 20 Tōa tsèngtī pòkò, tsi̍t khaisí tio̍h thêkhí "tōngthài tshing lêng" tsèngtshik, tī e̍ktsêng hôngkhòng kah kingtsè huattián lóng íking tittio̍h tiōngtāi tsikke̍k sêngkó, i kiôngtiāu "kiantshî tōngthài tshing lêng bē iôtāng". Hō͘ Tiongkok jînbîn tsiâⁿ sitbōng, tsin kiaⁿhiâⁿ.

Tiongkok só͘ kóng ê "tōngthài tshing lêng" tio̍h sī lán kóng ê "tshing lêng", ìsù sī kóng, huathiān tsi̍tê thoânjiámpēⁿ khaktsín ê pēⁿlē, tio̍h tī iha̍k siutī ê tôngsî tsìnhêng liûhêng pēⁿha̍k ê tiâutsa, kehlī ittshè ū khólêng kah i tsiaptshiok ê jînoân, khòngtsè pēⁿto̍k ê khoksòaⁿ kah énghióng hoānûi, í kiámtsió thoânpò͘ kah khaktsín jînsò͘ ê tsi̍t tsióng hônge̍k tsèngtshik. Búhàn hìiām khaisí liûhêng, e̍kbiâu iáu bōe phó͘phiàn tsùsiā tsìntsêng, tī Tiongkok, Hiangkáng, Tâioân, Òtsiu, Niúselân, Sinkapho téng tsin tsē só͘tsāi lóng sī si̍tsi "tshing lêng" tsèngtshik.

　　2020 nî e̍ktsêng po̍khuat liáuāu itti̍t kàu kiⁿî káu·gue̍h, Tâioân mā sī si̍tsi giâmkeh kehlī kah "tshing lêng tsèngtshik", 2021 nî thoânjiám la̍t tsin kiông ê Sinkoàn pēⁿto̍k piànītsu Alpha kah Delta tshimji̍p Tâioân, púnthó͘ e̍ktsêng po̍khuat ê sî, lán tsènghú tsháitshú saⁿ kip hônge̍k ê "nńg hongkhòng" hongsik, liân tsi̍t kang mā bô hong siâⁿ. Tòng tiāu nn̄g pho kongkik. 2021 nî káugue̍h saⁿtsa̍p tsì 2022 nî itgue̍h tshesaⁿ ûitsí, 93 kang lóngtsóng ū 11 lâng khaktsín, tiāⁿtiāⁿ kui lépài bô lâng khaktsín tshiò kóng sī "ke lêng"; 2021 nî tsa̍pgue̍h tshetsa̍p tsì 2022 nî sìgue̍h jīla̍k ûitsí 198 kang lóngtsóng ū 11 lâng puthēng síbông, Tâioân hông oló sī "tshing lêng bô͘hoānsing".

Sī ántsóaⁿ Tiongkok lâng thiaⁿ tioh "tōngthài tshing lêng"ē hiahni̍h kiaⁿhiâⁿ? 2020 nî itgue̍h jīsaⁿ, Búhàn hìiām huatgoântē, jînkháu 1,400 bān ê Búhàn tī tn̂g sîkan tōala̍t amkhàm únmôa e̍ktsêng liáuāu, ūitio̍h khòngtsè e̍ktsêng suanpò͘ hong siâⁿ, tshòngtsō liáu sèkàisú siōng kài tōa kuibô͘ ê hong siâⁿ kìlio̍k. Khólêng hong liáu puttsí ū simtik, nn̄g nî lâi Tiongkok siongtong sîkiâⁿ hong siâⁿ. Ùi sióhêng ê tsi̍t tòng kiàntio̍kbu̍t, khaktsíntsiá hông kuaiⁿ tī tshù lāi, tōamn̂g tèngsí hō͘ i bētàng tshutlâi ê pitshám sūkiāⁿ, itti̍t kàu kui ê siākhu "hong" sí, sīmtsì kuiê siâⁿtshī lóng "hong" khílâi ê gōng tāitsì, putkoánsî tī Tiongkok kok só͘tsāi huatsing, káugue̍h tshesì sinbûn pòtō, Tiongkok e̍ktsêng singun! íking ū 33 ê siâⁿtshī "hongkhòng" tiong, tsìtsió énghióng tio̍h 6,500 bān lâng. Saⁿgue̍h jīpeh, jînkháu 2,500 bān ê Tiongkok kingtsè, kimiông, kauthong tiongsim — Siōnghái, inūi e̍ktsêng suanpò͘ hong siâⁿ, kohtsài tshòng lo̍h hong siâⁿ kuibô͘ sèkài kìlio̍k. Saⁿgue̍h jītshit àm Siōnghái tshī kuaⁿhong huatpò͘, ùi saⁿgue̍h jīpeh hong siâⁿ tsì sìgue̍h tshegō͘ ûitsí, siáⁿ lâng siūⁿ ē kàu tsi̍t hong tio̍h kàu la̍kgue̍h tsheit, tshiaukòe nn̄gê gue̍h!

　　 Tsa̍pgue̍h tiong, Tiongkok Tēⁿtsiu ū 20 bān oânkang ê Pùsūkhong kangtshiúⁿ, thiaⁿkóng ū lâng khaktsín khólêng hong tshiúⁿ, kanglâng hoânló nā tsintsiàⁿ hong tshiúⁿ, singua̍h pithāngphín ū khólêng biānlîm khiàmkhueh. Bān puthēng hông thoânjiám tio̍h khaktsín, bô ū oânsiān ê iliâu tsiàuhō͘, ē tsin tshiⁿtshám. Thàn sinthé kiānkhong, iá ōe kiâⁿlō͘ kóaⁿkín tôtsáu līkhui kangtshiúⁿ, thiaⁿkóng Tēⁿtsiu ê kauthong íking hongkhòng, siōng hó ê pānhuat khò siang kha kiâⁿlō͘. Kúi tsa̍p ê kúi pah ê kúi tshing ê lâng, ánne tī kosokkonglō͘ téngbīn kiâⁿlō͘ tńgkhì kò͘hiong ê ōebīn, tsiâⁿ tsoh sèkài kîkuan.

Pêⁿpêⁿ sī tshing lêng, Tâioân, Tiongkok tsha hiah tsē! 　　(221104)

Tsù, 習近平 　 tshiáⁿ liām Hôagí


Pe̍h-ōe-jī-pán/白話字版


《 Le̍k-sik toán-phêng 》　　 Lí Lâm-hêng

　　 Pêⁿ-pêⁿ sī tshing lêng, Tâi-oân, Tiong-kok tsha hiah tsē!

　　 Tsa̍p-gue̍h tsa̍p-la̍k, Τiong-kiōng tsóng-su-kì 習近平 tī 20 Tōa tsèng-tī pò-kò, tsi̍t khai-sí tio̍h thê-khí "tōng-thài tshing lêng" tsèng-tshik, tī e̍k-tsêng hông-khòng kah king-tsè huat-tián lóng í-king tit-tio̍h tiōng-tāi tsik-ke̍k sêng-kó, i kiông-tiāu "kian-tshî tōng-thài tshing lêng bē iô-tāng". Hō͘ Tiong-kok jîn-bîn tsiâⁿ sit-bōng, tsin kiaⁿ-hiâⁿ.

Tiong-kok só͘ kóng ê "tōng-thài tshing lêng" tio̍h sī lán kóng ê "tshing lêng", ì-sù sī kóng, huat-hiān tsi̍t-ê thoân-jiám-pēⁿ khak-tsín ê pēⁿ-lē, tio̍h tī i-ha̍k siu-tī ê tông-sî tsìn-hêng liû-hêng pēⁿ-ha̍k ê tiâu-tsa, keh-lī it-tshè ū khó-lêng kah i tsiap-tshiok ê jîn-oân, khòng-tsè pēⁿ-to̍k ê khok-sòaⁿ kah éng-hióng hoān-ûi, í kiám-tsió thoân-pò͘ kah khak-tsín jîn-sò͘ ê tsi̍t tsióng hông-e̍k tsèng-tshik. Bú-hàn hì-iām khai-sí liû-hêng, e̍k-biâu iáu bōe phó͘-phiàn tsù-siā tsìn-tsêng, tī Tiong-kok, Hiang-káng, Tâi-oân, Ò-tsiu, Niú-se-lân, Sin-ka-pho téng tsin tsē só͘-tsāi lóng sī si̍t-si "tshing lêng" tsèng-tshik.

　　2020 nî e̍k-tsêng po̍k-huat liáu-āu it-ti̍t kàu kin-nî káu-·gue̍h, Tâi-oân mā sī si̍t-si giâm-keh keh-lī kah "tshing lêng tsèng-tshik", 2021 nî thoân-jiám la̍t tsin kiông ê Sin-koàn pēⁿ-to̍k piàn-ī-tsu Alpha kah Delta tshim-ji̍p Tâi-oân, pún-thó͘ e̍k-tsêng po̍k-huat ê sî, lán tsèng-hú tshái-tshú saⁿ kip hông-e̍k ê "nńg hong-khòng" hong-sik, liân tsi̍t kang mā bô hong siâⁿ. Tòng tiāu nn̄g pho kong-kik. 2021 nî káu-gue̍h saⁿ-tsa̍p tsì 2022 nî it-gue̍h tshe-saⁿ ûi-tsí, 93 kang lóng-tsóng ū 11 lâng khak-tsín, tiāⁿ-tiāⁿ kui lé-pài bô lâng khak-tsín tshiò kóng sī "ke lêng"; 2021 nî tsa̍p-gue̍h tshe-tsa̍p tsì 2022 nî sì-gue̍h jī-la̍k ûi-tsí 198 kang lóng-tsóng ū 11 lâng put-hēng sí-bông, Tâi-oân hông o-ló sī "tshing lêng bô͘-hoān-sing".

Sī án-tsóaⁿ Tiong-kok lâng thiaⁿ tioh "tōng-thài tshing lêng"ē hiah-ni̍h kiaⁿ-hiâⁿ? 2020 nî it-gue̍h jī-saⁿ, Bú-hàn hì-iām huat-goân-tē, jîn-kháu 1,400 bān ê Bú-hàn tī tn̂g sî-kan tōa-la̍t am-khàm ún-môa e̍k-tsêng liáu-āu, ūi-tio̍h khòng-tsè e̍k-tsêng suan-pò͘ hong siâⁿ, tshòng-tsō liáu sè-kài-sú siōng kài tōa kui-bô͘ ê hong siâⁿ kì-lio̍k. Khó-lêng hong liáu put-tsí ū sim-tik, nn̄g nî lâi Tiong-kok siong-tong sî-kiâⁿ hong siâⁿ. Ùi sió-hêng ê tsi̍t tòng kiàn-tio̍k-bu̍t, khak-tsín-tsiá hông kuaiⁿ tī tshù lāi, tōa-mn̂g tèng-sí hō͘ i bē-tàng tshut-lâi ê pi-tshám sū-kiāⁿ, it-ti̍t kàu kui ê siā-khu "hong" sí, sīm-tsì kui-ê siâⁿ-tshī lóng "hong" khí-lâi ê gōng tāi-tsì, put-koán-sî tī Tiong-kok kok só͘-tsāi huat-sing, káu-gue̍h tshe-sì sin-bûn pò-tō, Tiong-kok e̍k-tsêng sing-un! í-king ū 33 ê siâⁿ-tshī "hong-khòng" tiong, tsì-tsió éng-hióng tio̍h 6,500 bān lâng. Saⁿ-gue̍h jī-peh, jîn-kháu 2,500 bān ê Tiong-kok king-tsè, kim-iông, kau-thong tiong-sim — Siōng-hái, in-ūi e̍k-tsêng suan-pò͘ hong siâⁿ, koh-tsài tshòng lo̍h hong siâⁿ kui-bô͘ sè-kài kì-lio̍k. Saⁿ-gue̍h jī-tshit àm Siōng-hái tshī kuaⁿ-hong huat-pò͘, ùi saⁿ-gue̍h jī-peh hong siâⁿ tsì sì-gue̍h tshe-gō͘ ûi-tsí, siáⁿ lâng siūⁿ ē kàu tsi̍t hong tio̍h kàu la̍k-gue̍h tshe-it, tshiau-kòe nn̄g-ê gue̍h!

　　 Tsa̍p-gue̍h tiong, Tiong-kok Tēⁿ-tsiu ū 20 bān oân-kang ê Pù-sū-khong kang-tshiúⁿ, thiaⁿ-kóng ū lâng khak-tsín khó-lêng hong tshiúⁿ, kang-lâng hoân-ló nā tsin-tsiàⁿ hong tshiúⁿ, sing-ua̍h pit-hāng-phín ū khó-lêng biān-lîm khiàm-khueh. Bān put-hēng hông thoân-jiám tio̍h khak-tsín, bô ū oân-siān ê i-liâu tsiàu-hō͘, ē tsin tshiⁿ-tshám. Thàn sin-thé kiān-khong, iá ōe kiâⁿ-lō͘ kóaⁿ-kín tô-tsáu lī-khui kang-tshiúⁿ, thiaⁿ-kóng Tēⁿ-tsiu ê kau-thong í-king hong-khòng, siōng hó ê pān-huat khò siang kha kiâⁿ-lō͘. Kúi tsa̍p ê kúi pah ê kúi tshing ê lâng, án-ne tī ko-sok-kong-lō͘ téng-bīn kiâⁿ-lō͘ tńg-khì kò͘-hiong ê ōe-bīn, tsiâⁿ tsoh sè-kài kî-kuan.

Pêⁿ-pêⁿ sī tshing lêng, Tâi-oân, Tiong-kok tsha hiah tsē! 　　(221104)

Tsù, 習近平 　 tshiáⁿ liām Hôa-gí



　　十月十六，中共總書記習近平tī 20大政治報告，一開始tio̍h提起「動態清零」政策，tī疫情防控kah經濟發展lóng已經得tio̍h重大積極成果，伊強調「堅持動態清零bē搖動」。Hō͘中國人民tsiâⁿ失望、真驚惶。

中國所講ê「動態清零」tio̍h是咱講ê「清零」，意思是講，發現一個傳染病確診ê病例，tio̍h tī醫學收治ê同時進行流行病學ê調查、隔離一切有可能kah伊接觸ê人員、控制病毒ê擴散kah影響範圍，以減少傳播kah確診人數ê一種防疫抗疫政策。武漢肺炎開始流行、疫苗猶未普遍注射進前，tī中國、香港、台灣、澳洲、紐西蘭、新加坡等真tsē所在lóng是實施「清零」政策。

　　2020年疫情爆發了後一直到今年九月，台灣mā是實施嚴格隔離kah「清零政策」，2021年傳染力真強ê新冠病毒變異株Alpha kah Delta侵入台灣，本土疫情爆發ê時，咱政府採取三級防疫ê「軟封控」方式，連一工mā無封城。擋掉兩波攻擊。2021年九月三十至2022年一月初三為止，93工lóng總有11人確診，tiāⁿ-tiāⁿ kui禮拜無人確診笑講是「加零」；2021年十月初十至2022年四月二六為止198工lóng總有11人不幸死亡，台灣hông o-ló是「清零模範生」。

是按怎中國人聽tioh「動態清零」ēhiah-ni̍h驚惶？2020年一月二三，武漢肺炎發源地、人口1,400萬ê武漢tī長時間大力掩蓋隱瞞疫情了後，為tio̍h控制疫情宣布封城，創造了世界史上kài大規模ê封城記錄。可能封了不止有心得，兩年來中國相當時行封城。Ùi小型ê一棟建築物，確診者hông關tī厝內，大門釘死hō͘伊bē-tàng出來ê悲慘事件，一直到歸个社區「封」死，甚至kui-ê城市lóng「封」起來ê戇代誌，不管時tī中國各所在發生，九月初四新聞報導，中國疫情升溫！已經有33個城市「封控」中，至少影響tio̍h 6,500萬人。三月二八，人口2,500萬ê中國經濟、金融、交通中心—上海，因為疫情宣布封城，koh再創落封城規模世界記錄。三月二七暗上海市官方發布，ùi三月二八封城至四月初五為止，啥人想ē到一封tio̍h到六月初一，超過兩個月！

　　十月中，中國鄭州有20萬員工ê富士康工廠，聽講有人碓診可能封廠，工人煩惱若真正封廠，生活必項品有可能面臨欠缺。萬不幸hông傳染tio̍h確診，無有完善ê醫療照護，ē真悽慘。趁身體健康、iáu ē行路趕緊逃走離開工廠，聽講鄭州ê交通已經封控，上好ê辦法靠雙腳行路。幾十个幾百个幾千个人，án-ne tī高速公路頂面行路轉去故鄉ê畫面，成作世界奇觀。

平平是清零，台灣、中國差hiah tsē！　　(221104)

註：習近平　請唸華語