《綠色短評》

 | | | 轉寄

大選輸了，民進黨tio̍h按怎檢討！

作者 李南衡, TsoânTâijī/全台字 by Tsng Hūiphêng 2022.12.11

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　 Lí Lâmhêng

　　Tāisoán su liáu, Bîntsìntóng tio̍h ántsóaⁿ kiámthó!

Ji̍tpún ha̍ktsiá, Tangkiaⁿ Gōakokgí Tāiha̍k Ogasawara Yoshiyuki（小笠原欣幸）kàusiū, tī 2020 nî tsóngthóng tāisoán ê sî, ītshik Tshòa Ingbûn tsóngthóng tit phiò lu̍t 57.7%, kah si̍ttsè tit phiò lu̍t 57.1% kantāⁿ tsha 0.6%, tsún kah ē hông kiaⁿ ·tio̍h. Tsi̍t ūi sǹgmiāsian sǹg kah tsiok tsún, lán ē tsuntshing i kiò tsoh"poànsian", nāsī ánne Ogasawara kàusiū ē khamtit tsuntshing tsoh"3/4 sian". Kiⁿî tsa̍pgue̍h jīla̍k, tsit ūi Ogasawara kàusiū tī bīntsheh téngbīn ītshik kiⁿî Tâioân káuha̍pit tāisoán kiatkó, 22 koān tshītiúⁿ soánkí, Bîntsìntóng 5 se̍k, Kokbîntóng 15 se̍k, Bîntsiòngtóng 1 se̍k, bô tóng tsik 1 se̍k. Sīmtsì kā múi tsi̍tê koāntshītiúⁿ tòngsoán miâtuaⁿ lóng lia̍t tshutlâi. Tongsî ū tsin tsē lâng kóng Ogasawara kàusiū tsit piàn bô tsún ah! tsin pháiⁿsè, 30 kang āu ê tsa̍pitgue̍h jīla̍k soánkí kiatkó, tûliáu Kagī tshītiúⁿ iân āu soánkí ígōa, só͘ū ê koān tshītiúⁿ tòngsoán miâtuaⁿ kah i ītshik ê oântsoân kāngkhoán, tsi̍ttiám’á tsingtsha to bô.

Tsit piàn soán su ê Bîntsìntóng tio̍h ū suiàu iōngsim tsaipôe tsit khoán ê "soánkí tsingsoànsu", tī pêngsî tio̍h bô thêng tsò múi tsi̍tê koān tshī jînbîn tùi kok tsèngtóng ê tsitshî tō͘, ētàng giánkiù tshut múi tsi̍tê koāntshītiúⁿ kîkan ê piànhòa. Tējī, suiàu tsaipôe ē hiáu tsíntoàn kok tsióng tsèngtī pēⁿtsèng ê pēⁿlísu, giánkiù tshut múi tsi̍t koāntshī ê būntê tshut tī tóūi. Tēsaⁿ, suiàu tsaipôe ē hiáu khui io̍hhong ê isu. Bián kúi nî, pótsèng Bîntsìntóng ētàng kā tsoân kok múi tsi̍tê koāntshī tīlí hó. Lán ēng tsit piàn soánkí ê kiatkó lâi tsò kiámthó.

Tsò liáu huisiông hó liân jīm ê koāntshītiúⁿ, tsit piàn bētang koh tsham soán, i só͘ thuitsiàn kòa pótsèng ê hāusoánjîn, tsiàu lí kóng ingkai ē tittio̍h koānbîn á·sī tshībîn ê tsitshî tsiah tio̍h, ná ē tshintshiūⁿ Pîntong koāntiúⁿ Phuaⁿ Bōngan só͘ thuitsiàn ê li̍phuat úigoân Tsiu Tshunbí tsiah iâⁿ bān gōa phiò niāniā, koh khah kîkoài ê sī, Kelâng tshītiúⁿ Lîm Iūtshiong thuitsiàn ê li̍phuat úigoân Tshòa Sikèng, Thôhn̂g tshītiúⁿ Tēⁿ Bûntshàn thuitsiàn ê li̍phuat úigoân Tēⁿ Ūnpêng, Sintik tshītiúⁿ Lîm Tsìkian thuitsiàn i ê hù tshītiúⁿ Sím Hūikhēng, m̄nā lóng tsóng lo̍ksoán, jîtshiáⁿ phiò tsha tsin tsē. Tse sī siáⁿmi̍h tōlí? Hō͘ lâng siūⁿ bô.

Tsit piàn soánkí, ū tsin tsē ūi koāntshītiúⁿ kah koāntshī gīoân hāusoánjîn, iânsio̍k 2018 nî ê siûhūn giânlūn, o͘pe̍h mē lâng·ê lóng tsóng koân phiò tòngsoán. Ánne, ē hō͘ tsit tsióng lâng tikì kah gō͘hōe kóng sòaⁿpò siûhūn giânlūn, o͘pe̍h mē lâng si̍ttsāi tsin hó ēng. Bîntsìntóng tiongiong tio̍h hóhó giánkiù kái to̍k ê io̍hhng, tī siānliông ê Tâioân thó͘tē téngbīn si̍ttsāi m̄ hó koh sòaⁿpò siûhūn giânlūn. Tse sī tsin giâmtiōng ê ùjiám!

　　 Tsit piàn soánkí, Tâitiong tshītiúⁿ Lô͘ Siùiàn, Hûnlîm koāntiúⁿ Tiuⁿ Lēsiān, Gîlân koāntiúⁿ Lîm Tsumiāu, Hualian Koāntiúⁿ Tshî Tsinùi, Tâitang koāntiúⁿ Jiâu Khènglêng gō͘ ūi lúsèng ê Tiongkok Kokbîntóng koāntshītiúⁿ lóng piàⁿ liân jīm, kîtiong ū tsò liáu tsiâⁿ hó·ê, ū tsò liáu phó͘thong·ê, ū tsò liáu tsin tsha·ê, tānsī múi tsi̍t ūi lóng tsóng koân phiò tòngsoán, tōa iâⁿ Bîntsìntóng tùitshiú iâⁿ kah ū thang hóbē. Tàuté sī siáⁿmi̍h goânin?

　　 Tsit piàn káuha̍pit tāisoán su liáu, Bîntsìntóng tiongiong tio̍h kah Ogasawara kàusiū o̍h, siatkè tshut kui thò sin ê soánkí tshiklio̍k, āupiàn soánkí tsiah ū khólêng iâⁿ tò tńglâi. (221126)


Pe̍h-ōe-jī-pán/白話字版


《 Le̍k-sik toán-phêng 》　 Lí Lâm-hêng

　　Tāi-soán su liáu, Bîn-tsìn-tóng tio̍h án-tsóaⁿ kiám-thó!

Ji̍t-pún ha̍k-tsiá, Tang-kiaⁿ Gōa-kok-gí Tāi-ha̍k Ogasa-wara Yoshi-yuki（小笠原欣幸）kàu-siū, tī 2020 nî tsóng-thóng tāi-soán ê sî, ī-tshik Tshòa Ing-bûn tsóng-thóng tit phiò lu̍t 57.7%, kah si̍t-tsè tit phiò lu̍t 57.1% kan-tāⁿ tsha 0.6%, tsún kah ē hông kiaⁿ -·tio̍h. Tsi̍t ūi sǹg-miā-sian sǹg kah tsiok tsún, lán ē tsun-tshing i kiò tsoh"pòaⁿ-sian", nā-sī án-ne Ogasa-wara kàu-siū ē kham-tit tsun-tshing tsoh"3/4 sian". Kin-nî tsa̍p-gue̍h jī-la̍k, tsit ūi Ogasa-wara kàu-siū tī bīn-tsheh téng-bīn ī-tshik kin-nî Tâi-oân káu-ha̍p-it tāi-soán kiat-kó, 22 koān tshī-tiúⁿ soán-kí, Bîn-tsìn-tóng 5 se̍k, Kok-bîn-tóng 15 se̍k, Bîn-tsiòng-tóng 1 se̍k, bô tóng tsik 1 se̍k. Sīm-tsì kā múi tsi̍t-ê koān-tshī-tiúⁿ tòng-soán miâ-tuaⁿ lóng lia̍t tshut-lâi. Tong-sî ū tsin tsē lâng kóng Ogasa-wara kàu-siū tsit piàn bô tsún ah! tsin pháiⁿ-sè, 30 kang āu ê tsa̍p-it-gue̍h jī-la̍k soán-kí kiat-kó, tû-liáu Ka-gī tshī-tiúⁿ iân āu soán-kí í-gōa, só͘-ū ê koān tshī-tiúⁿ tòng-soán miâ-tuaⁿ kah i ī-tshik ê oân-tsoân kāng-khoán, tsi̍t-tiám-á tsing-tsha to bô.

Tsit piàn soán su ê Bîn-tsìn-tóng tio̍h ū su-iàu iōng-sim tsai-pôe tsit khoán ê "soán-kí tsing-soàn-su", tī pêng-sî tio̍h bô thêng tsò múi tsi̍t-ê koān tshī jîn-bîn tùi kok tsèng-tóng ê tsi-tshî tō͘, ē-tàng gián-kiù tshut múi tsi̍t-ê koān-tshī-tiúⁿ kî-kan ê piàn-hòa. Tē-jī, su-iàu tsai-pôe ē hiáu tsín-toàn kok tsióng tsèng-tī pēⁿ-tsèng ê pēⁿ-lí-su, gián-kiù tshut múi tsi̍t koān-tshī ê būn-tê tshut tī tó-ūi. Tē-saⁿ, su-iàu tsai-pôe ē hiáu khui io̍h-hng ê i-su. Bián kúi nî, pó-tsèng Bîn-tsìn-tóng ē-tàng kā tsoân kok múi tsi̍t-ê koān-tshī tī-lí hó. Lán ēng tsit piàn soán-kí ê kiat-kó lâi tsò kiám-thó.

Tsò liáu hui-siông hó liân jīm ê koān-tshī-tiúⁿ, tsit piàn bē-tang koh tsham soán, i só͘ thui-tsiàn kòa pó-tsèng ê hāu-soán-jîn, tsiàu lí kóng ing-kai ē tit-tio̍h koān-bîn á-sī tshī-bîn ê tsi-tshî tsiah tio̍h, ná ē tshin-tshiūⁿ Pîn-tong koān-tiúⁿ Phuaⁿ Bōng-an só͘ thui-tsiàn ê li̍p-huat úi-goân Tsiu Tshun-bí tsiah iâⁿ bān gōa phiò niā-niā, koh khah kî-koài ê sī, Ke-lâng tshī-tiúⁿ Lîm Iū-tshiong thui-tsiàn ê li̍p-huat úi-goân Tshòa Sik-èng, Thô-hn̂g tshī-tiúⁿ Tēⁿ Bûn-tshàn thui-tsiàn ê li̍p-huat úi-goân Tēⁿ Ūn-pêng, Sin-tik tshī-tiúⁿ Lîm Tsì-kian thui-tsiàn i ê hù tshī-tiúⁿ Sím Hūi-khēng, m̄-nā lóng tsóng lo̍k-soán, jî-tshiáⁿ phiò tsha tsin tsē. Tse sī siáⁿ-mi̍h tō-lí? Hō͘ lâng siūⁿ bô.

Tsit piàn soán-kí, ū tsin tsē ūi koān-tshī-tiúⁿ kah koān-tshī gī-oân hāu-soán-jîn, iân-sio̍k 2018 nî ê siû-hūn giân-lūn, o͘-pe̍h mē lâng-·ê lóng tsóng koân phiò tòng-soán. Án-ne, ē hō͘ tsit tsióng lâng tik-ì kah gō͘-hōe kóng sòaⁿ-pò siû-hūn giân-lūn, o͘-pe̍h mē lâng si̍t-tsāi tsin hó ēng. Bîn-tsìn-tóng tiong-iong tio̍h hó-hó gián-kiù kái to̍k ê io̍h-hong, tī siān-liông ê Tâi-oân thó͘-tē téng-bīn si̍t-tsāi m̄ hó koh sòaⁿ-pò siû-hūn giân-lūn. Tse sī tsin giâm-tiōng ê ù-jiám!

　　 Tsit piàn soán-kí, Tâi-tiong tshī-tiúⁿ Lô͘ Siù-iàn, Hûn-lîm koān-tiúⁿ Tiuⁿ Lē-siān, Gî-lân koān-tiúⁿ Lîm Tsu-miāu, Hua-lian Koān-tiúⁿ Tshî Tsin-ùi, Tâi-tang koān-tiúⁿ Jiâu Khèng-lêng gō͘ ūi lú-sèng ê Tiong-kok Kok-bîn-tóng koān-tshī-tiúⁿ lóng piàⁿ liân jīm, kî-tiong ū tsò liáu tsiâⁿ hó-·ê, ū tsò liáu phó͘-thong-·ê, ū tsò liáu tsin tsha-·ê, tān-sī múi tsi̍t ūi lóng tsóng koân phiò tòng-soán, tōa iâⁿ Bîn-tsìn-tóng tùi-tshiú iâⁿ kah ū thang hó-bē. Tàu-té sī siáⁿ-mi̍h goân-in?

　　 Tsit piàn káu-ha̍p-it tāi-soán su liáu, Bîn-tsìn-tóng tiong-iong tio̍h kah Ogasa-wara kàu-siū o̍h, siat-kè tshut kui thò sin ê soán-kí tshik-lio̍k, āu-piàn soán-kí tsiah ū khó-lêng iâⁿ tò tńg-lâi. (221126)




日本學者、東京外國語大學Ogasa-wara Yoshi-yuki（小笠原欣幸）教授， tī 2020年總統大選ê時，預測蔡英文總統得票率57.7%，kah實際得票率57.1% kan-tāⁿ差0.6%，準kah ē hông驚tio̍h。一位算命先算kah足準，咱ē尊稱伊叫作「半仙」，若是án-ne Ogasa-wara教授ē堪得尊稱作「3/4仙」。今年十月二六，tsit位Ogasa-wara教授tī面冊頂面預測今年台灣九合一大選結果，22縣市長選舉：民進黨5席、國民黨15席、民眾黨1席、無黨籍1席。甚至kā每一个縣市長當選名單lóng列出來。當時有真tsē人講Ogasa-wara教授tsit遍無準ah！真pháiⁿ-sè，30工後ê十一月二六選舉結果，除了嘉義市長延後選舉以外，所有ê縣市長當選名單kah伊預測ê完全仝款，一點仔精差to無。

Tsit遍選輸ê民進黨tio̍h有需要用心栽培tsit款ê「選舉精算師」，tī平時tio̍h無停做每一个縣市人民對各政黨ê支持度，ē-tàng研究出每一个縣市長期間ê變化。第二，需要栽培ē曉診斷各種政治病症ê病理師，研究出每一縣市ê問題出tītó位。第三，需要栽培ē曉開藥方ê醫師。免幾年，保證民進黨ē-tàng kā全國每一个縣市治理好。咱用tsit遍選舉ê結果來做檢討。

做了非常好連任ê縣市長，tsit遍bē-tang koh參選，伊所推薦掛保證ê候選人，照理講應該ē得tio̍h縣民抑是市民ê支持才tio̍h，náē親像屏東縣長潘孟安所推薦ê立法委員周春米才贏萬外票niā-niā，koh khah奇怪ê是，基隡市長林右昌推薦ê立法委員蔡適應、桃園市長鄭文燦推薦ê立法委員鄭運鵬、新竹市長林志堅推薦伊ê副市長沈慧虹，m̄-nā lóng總落選，而且票差真tsē。Tse是啥物道理？Hō͘人想無。

Tsit遍選舉，有真tsē位縣市長kah縣市議員候選人，延續2018年ê仇恨言論、烏白罵人-·ê lóng總高票當選。Án-ne，ēhō͘ tsit種人得意kah誤會講散播仇恨言論、烏白罵人實在真好用。民進黨中央tio̍h好好研究解毒ê藥方，tī善良ê台灣土地頂面實在m̄好koh散播仇恨言論。Tse是真嚴重ê污染！

　　Tsit遍選舉，台中市長盧秀燕、雲林縣長張麗善、宜蘭縣長林姿妙、花運縣長徐榛蔚、台東縣長饒慶鈴五位女性ê中國國民黨縣市長lóng拼連任，其中有做了tsiâⁿ好-·ê，有做了普通-·ê，有做了真差-·ê，但是每一位lóng總高票當選，大贏民進黨對手贏kah有thang好賣。到底是啥物原因？

　　Tsit遍九合一大選輸了，民進黨中央tio̍h kah Ogasa-wara教授學，設計出kui套新ê選舉策略，後遍選舉才有可能贏倒轉來。 (221126)