《各各他e5目屎--苦難得安慰》

 | | | 轉寄

忠信ê教導者

作者 紀福讚 2006.03.19

1996年9月，88歲ê烏人阿婆西歐拉•麥khah泰，將她替人洗衫、流汗所趁ê十五萬美金，捐hō͘南密西西比大學，成立獎學金，來協助少數族裔ê就學。Tī 9月，伊tuì總統柯林頓手中，接tio̍h美國第二kuân榮譽ê公民獎章。因為伊hit雙tio̍h關節炎ê雙手，是重視教育kap疼惜弱勢族群ê記號。

箴言講：「歡喜受教督--ê，就是歡喜tsai-bat。」(箴言十二章1節)，「棄絕教督ê，beh tú-tio̍h喪鄉kap凌辱。」(十三章18節) 耶穌傳道生涯ê第一工，就開始招集門徒，訓練in，準備三年後beh接續伊家己tī地面上ê工課。保羅hō͘提摩太ê批講：「Tī濟濟干證ê人面前所對我聽見tsiah-ê事，tio̍h交託忠信ê人，將來堪得教示別人ê」(提摩太後書二章2節) Tse tú-tú親像以利亞結束做先知ê工作以前，tio̍h訓練以利沙thang來接續伊ê工課。(列王紀上十九章19節)伊將伊ê衫披tī tú teh犁田ê以利沙身上。以利沙m̄ kan-taⁿ招集門徒，也成立先知學校。(列王紀下六章1節) 訓練學生，hō͘ in一代一代將上帝ê教示、默示傳hō͘逐世代。

Tī台灣ê傳道裡，教育是一項非常要緊ê工課。馬偕tī宣道ê第一工，就開始訓練本地ê學生，hō͘ in將來會tàng接續伊ê工課。所以，tī大樹腳、tī廟埕、tī溪á邊、tī行路ê時，伊教導學生聖經kap西方先進ê知識。Án-ni，十年久，in無固定教學ê場所，受稱做「逍遙學院」，是台灣神學院ê前身。馬雅各tī新樓病院，甘為霖tī中部地區，蘭醫生tī彰化醫館ê醫療傳道，也是ná教學生，ná傳道。巴克禮tī南部開設台南神學校，是南部宣道ê重鎮。Tī北部ê淡水中學kap南部ê長榮中學，lóng是台灣上早ê西方式學堂。特別是對女子ê教育，koh khah是台灣重視女權ê開始。Tsiah-ê lóng是通過教育來iā福音ê種子，也hō͘台灣ê宣道一代一代傳落去！

詩人講：「我無偏你ê判斷，因為你有教示我。」（詩篇一一九篇102節）愈重視教育ê宣道，教會愈會增長。愈重視教育ê社會，愈會減少犯罪。保羅講：「Tio̍h交託忠信ê人，將來堪得教示別人--ê。」(提摩太後書二章2節)

【祈禱】主ah！感謝你教示阮，也hō͘阮做一個忠信、堪得教示別人--ê。