《各各他e5目屎--苦難得安慰》

 | | | 轉寄

Suí ê靈魂

作者 紀福讚 2006.04.02

1994年12月，16歲ê查某gín-á艾波．佛萊明三年前受檢查，患染血癌，病毒已經侵入肝臟。1995年8月，醫生kā厝內ê人講：「伊會tàng koh活一年。」但一個月後，醫生講：「伊真困難koh看會tio̍h今年ê聖誕節。」美國ê「許願圓夢基金會」(Make-A-Wish Fondation)知影這件tāi-tsì以後，決定hō͘伊一個圓夢ê機會，hō͘伊提早得tio̍h聖誕禮物kap祝福。但伊無要求beh為家己做啥物，只向望無家可歸ê gín-á也會得tio̍h聖誕禮物。基金會買12份ê禮物，到一個遊民ê收留所，將禮物分送hō͘ gín-á，拍錄影片，放錄影hō͘伊看。伊流目屎講：「我以前kap tsiah-ê gín-á kāng款，tuà tī遊民避難所，向望得tio̍h聖誕禮物，taⁿ我ê心願達成ah，我真歡喜。」這個孤單、散赤、常常離家出走ê gín-á，卻是一個真suí ê靈魂，今尋tio̍h安息。

一對重病ê夫婦，有千萬ê財富，是一間廣播學校ê創辦人。尪婿79歲，患tio̍h風濕、氣喘ê理查．布朗，tio̍h靠輪椅行動；婦人人76歲ê海倫，患tio̍h老年癡呆症。兩人結婚53年，互相恩愛。1994年12月初六，兩人ê屍體hō͘人發現tī厝內車庫ê車內，兩人lóng死tī汽車廢氣中毒。Tī hit工，in ê朋友也收tio̍h in遺言ê批，講：「阮有夠額ê財力請上好ê醫生，tuà上好ê病院，得tio̍h上好ê醫療照顧，m̄-koh阮無ài過這種浪費社會資源ê生活，阮無親近ê親人，也無繼承人，阮將所有ê捐獻hō͘教會，會tàng協助值得栽培ê青年人，盼望in會當koh幫助khah濟人。」這是一對年老受病痛苦楚ê夫婦，但in lóng有真suí ê靈魂。

約翰福音描寫耶穌ê死景，無強調伊是受棄絕ê人子，無講 「上帝ah！為何連你也離棄我」（可十五34）。乃是強調伊完成所交託--ê，講「事明白lah！」然後將靈魂交hō͘上帝（約十九30）。這是一個suí ê靈魂ê款式，雖是苦景，也是滿足回歸上帝ê懷抱。親像保羅講，「我已經爭戰好ê爭戰，已經盡跑走ê路站，已經守所信ê道理。今了後，有義ê冕旒kā我備辦hē--teh。」（提後四7－8）。用人ê眼光來看，保羅bē堪得講這句話，因為伊ê結局是孤單掛鐵鍊tī監牢裡，但伊清楚，伊ê靈魂已經煉淨，堪得上帝ê冠冕，伊也有suí ê靈魂，thang見上帝ê面。

咱倒轉來看，有人有真堂皇ê地位、財富、學問、名聲、成就，唯一欠缺ê是一粒suí ê靈魂，到tī絕氣ê時刻，iáu有講bē了ê慾望，iáu有歪tshuah ê念頭，iáu想beh欺騙上帝，欺騙家己，欺騙人。這是一個孤單ê靈魂，m̄敢見光，見上帝。空有真好看ê告別式，真好聽ê空名，真濟ê財富hō͘子孫，tī上帝ê面前，卻是可憐、散赤ê靈魂。Tī路加十六章，耶穌ê比喻，講起富人有紫色袍，食三珍海味，有好額ê兄弟交往，有suí ê血統，卻無suí ê靈魂，伊ê結局是嘴乾喉渴ê折磨，kap安歇ê所在隔絕。

Suí ê靈魂是bē記得家己ê苦楚，想tio̍h別人ê快樂；m̄是將家己ê快樂、方便、利益，建立tī別人ê痛苦、損傷、犧牲頂面；m̄是浪費社會資源，建立家己ê財富、名聲；m̄是造成社會ê對立，家己成做救苦救難ê英雄；m̄是扮演悲劇ê苦旦，是beh負起自省ê責任；m̄是親像裝金身ê偶像，用錢買虛名，假造無靈魂ê偶像；m̄是政客ê嘴面，膨風家己，犧牲大眾。是誠實，無虛假ê美善。

詩篇十六10講，「你無將我ê靈魂放tī陰間，也無hō͘你ê聖ê，遇tio̍h朽爛。」大衛bat犯大罪，hō͘上帝大無歡喜，但伊徹底悔改家己ê過犯，伊講，「上帝ah，求你kā我造清氣ê心，hō͘我內面有換新正直ê靈」（詩五－9）。伊污穢ê過犯，因為上帝ê憐憫kap潔淨，hō͘伊猶原有suí ê靈魂，是bē朽爛ê靈魂。今á日，台灣ê社會所欠缺--ê，就是這種自省ê氣力，所暴露ê見笑，就是「包裝假ê形象，欺瞞大眾，戲弄家己」，驚了因為家己ê自省，喪失英雄ê形象，喪失既得ê利益，所以四界會當看tio̍h「死鴨á硬嘴杯」、「橫柴gia̍h入灶」ê現象。長久做司法院長kap內政部長ê人，竟然將選舉敗壞風氣ê罪名，掛tī別人ê身上，無感覺見笑；明明是製造族群ê對立來得tio̍h選舉ê利益，suah講是「疼台灣，保護中華民國」；明明是應用行政資源賄選，suah講是「造福地方建設」；用包裝ê「仁義道德」來掩護家己「功利ê行為」，合理化家己ê私心kap罪惡，這是「Made in Taiwan」ê特產，完全欠缺自省ê氣力。

Suí ê靈魂是台灣ê社會所迫切需要ê，也是咱ê教會會當見證ê榮耀。但這種suí ê靈魂，教會kiám有？Tī最近澎湖染tio̍h愛滋病ê giá-á，因為縣長ê關心，引起社會大眾ê參與。但tī這種「接納孤單，發掘真理、扶持弱勢」ê見證，教會愈來愈無份，是m̄是教會中suí ê靈魂愈來愈歹尋呢？有一工，咱親像耶穌，將家己ê靈魂交託hō͘上帝ê時，是m̄是上帝會講，「我m̄ ti̍h」呢？

主ah！請你無將我ê靈魂hiat tī陰間，也無hō͘你ê聖ê，遇tio̍h朽爛（詩十六10）。

Suí ê靈魂，你tī tah落？