《各各他e5目屎--苦難得安慰》

 | | | 轉寄

耶穌來hō͘地上起刀兵mah？

作者 紀福讚 2006.07.02

耶穌：「Lín m̄-thang想講，我來是beh hō͘地上太平。我來m̄是beh hō͘地上太平，乃是hō͘地上起刀兵。」（馬太十章34節）究竟耶穌是m̄是一位惹麻煩、好爭論，甚至是主張暴力抗爭ê人？他講這句話是啥物意思？這kap一般認為耶穌是「上帝和平使者」ê形象是m̄是有衝突？耶穌是m̄是也要求伊ê跟隨者有這款ê戰鬥本質？

耶穌應該m̄是一位主張暴力抗爭ê人。Tī山頂寶訓伊講：「hō͘人和平ê人有福氣，因為in beh稱做上帝ê kiáⁿ。」（馬太五章9節）Tī客西馬尼園，伊kā彼得講：「收刀入鞘，因為動刀--ê，要死tī刀下。」（馬太廿六章52節，約翰十八章10節）保羅也講：「上帝藉tio̍h基督hō͘咱kap伊koh和，也將勸人kap伊koh和ê職份賞賜咱。」（歌林多後書五章18節）koh講：「因為伊hō͘咱和睦，.... . . 拆毀中間隔斷ê牆，koh用家己ê身軀廢掉冤仇.... . . 成就了和睦.... . . 來傳和平ê福音。」（以弗所二章14－17節）耶穌是tuì上帝hia來ê和平使者，但tī當時ê執政者kap宗教領袖ê眼中卻是一位惹麻煩ê人，是一位起爭論ê人物，因為伊m̄肯kap當時ê舊傳統、歹作風妥協。伊不斷kap當時社會ê邪惡抗爭，親像光照tī烏暗（約翰一章5節，三章19－20節），致到受當時ê人棄絕（馬可六章3節；路加四章28節；馬可七章8節，八章31節，十四章30、71節，十五章12－15節），甚至釘死tī殘酷ê十字架頂（馬可十五章27節），ná親像受上帝棄絕一樣（馬可十五章34節）。他m̄是主張暴力抗爭ê人，suah hō͘人看做是暴力造反ê人（使徒行傳五章36－38節；馬可十五章2、12節；約翰十九章12節）。

Tī馬太十章34節耶穌講：「我來是beh hō͘地上起刀兵」ê背景，是因為伊ê門徒beh受逼害，甚至受厝內至親ê人出賣（馬太十章16－18、21－23、32－34、38－39節）。In會kap伊kāng款，受掠落監，甚至受死（十章28節）。致到tī人看，這款ê爭端是耶穌所引起--ê。伊hō͘人kap親人生疏（十章35節）、相爭（路加十二章53節）；伊hō͘ kāng厝內ê人變做冤仇人（馬太十章36節）。親像hiat一把火tī地面上，hō͘人起紛爭（路加十二章49－51節）。甚至兄弟將兄弟、老父將kiáⁿ兒，送到死ê地；kiáⁿ兒kap父母做對敵，害死in。門徒beh因為耶穌ê名，hō͘眾人厭惡（馬太十章21－22節）。事實上，tī早期基督教歷史，咱會當看見基督徒受逼害ê款式，確實是tsiah-ni̍h殘酷。

Tī耶穌ê時代，伊是一位引起爭論ê人物（約翰七章12、32、43節，九章16節，十章19節）。有ê講，伊是好人；有ê講，伊是迷惑眾人ê（七章12節）。有ê講，伊是hō͘鬼附身，有ê奇怪伊是m̄是彌賽亞（十章20節，七章42節）。伊對安息日ê傳統所講ê信息（約翰五章16－17節；馬可二章27－28，三章6節），hō͘當局計謀beh除滅伊。伊對法利賽人ê攻擊，完全無客氣（馬太廿三章）。伊接納罪人hō͘人稱做是貪食好酒ê人（馬太十一章19節；路加十五章1－2節）。伊清氣聖殿，激起宗教當局除滅伊ê決心（路加十九章47節）。伊進入耶路撒冷城，眾人轟動，問講：「這是啥物人呢？」（馬太廿一章10節）因此，耶穌講：「我來hō͘地面上起刀兵」，也是指伊所引起ê爭論。眾人因為伊ê身分kap話語引起紛爭。

另外一方面，tī基督教ê歷史ni̍h，咱也會tàng看tio̍h這款「起刀兵」ê爭實。初世紀ê宗教迫害，尼祿皇帝、多米田皇帝ê殺害基督徒；中世紀ê宗教戰爭（十字軍ê東征kap教派ê紛爭），宗教改革ê迫害；異端裁判所ê霸道；tsiah-ê宗教信仰偏激ê誤用，lóng是真殘酷ê事實，hō͘人誤會耶穌「起刀兵」ê信息真義。

Tī本質上，耶穌講：「我來beh hō͘地上起刀兵」，主要是指教會kap伊本身會受迫害，但tī迫害中，m̄-thang失去戰鬥ê意志。Kap惡爭戰，犧牲是免不了ê，但真理ê堅持，疼ê強調，公義ê爭取，上帝國ê擴展，tsiah-ê lóng需要不斷去爭戰。耶穌講：「上帝ê國是努力ê人，才會當入去。」（馬太十一章12節；路加十六章16節）koh講：「若有人beh跟隨我，tio̍h揹伊ê十字架來跟隨」（馬可八章34節）。耶穌kap當代ê社會惡ê爭戰，完全無妥協ê餘地。這款ê傳統也流傳tī現代少數ê教會中。「Phah死無走」ê精神，親像殉道者ê血，一代一代傳落去。Tsiah--ê是基督koh活尚suí ê見證。