《各各他e5目屎--苦難得安慰》

 | | | 轉寄

自癒（jū）

作者 紀福讚 2006.07.09

現代醫治ê觀念注重「自癒」。開刀了，kan-taⁿ防止細菌ê感染，m̄免敷藥、包紮，只要傷口kā連作伙，傷痕自然癒合。Tī聖經中，耶穌對受傷ê心靈ê醫治，也是注重「自癒」。伊用ê方法就是先回復hit-ê受傷心靈ê尊嚴，hō͘伊家己產生自我肯定kap期待，然後有自我節制kap鼓勵，thang達到再創造ê目的。咱用兩個比喻來說明。

路加十五章，浪子ê比喻。浪子tī外面放蕩，kap豬相搶吃豆kho͘，為tio̍h活命，轉厝只求做一個長工，會tàng度三餐就滿足。這是一個自我殘廢ê意念，活teh ê目的，只親像野獸求生存，無koh有人ê鬥志、盼望、期待。伊講：「我得罪了天，koh得罪了你，從今以後，我不配稱做你ê kiáⁿ兒。」但老父無一點ê責備，kan-taⁿ吩咐僕人kā穿衫、穿鞋、掛手指，恢復伊做kiáⁿ ê身分kap尊嚴，向人宣稱這個kiáⁿ是死復活，失而又得tio̍h--ê。

路加十九章，稅吏撒該雖是富人，suah受眾人看輕，伊也習慣家己享受自足自閉ê生活，繼續無血無目屎teh剝削同族ê人。伊內心ê孤獨，受棄絕ê疼，只有耶穌明白。耶穌講：「今á日，我beh tuà tī你ê厝。」耶穌無任何ê教導、教訓，撒該就看見伊家己ê問題kap改進ê方式，伊轉變ê行動是「欠人還四倍，一半財產hō͘散赤人」。以前目睭中，kan-taⁿ看tio̍h錢財，今是先看tio̍h人。耶穌先恢復伊做人應該有ê尊嚴kap感情，án-ni伊就主動轉變。一個犯罪ê人，khah常是心靈受過創傷ê人。犯罪是受傷了異常ê行為反應。久長tī散赤，飢餓ê人，為tio̍h求生存，本能ê野性會hō͘伊無顧別人ê感受、利益。親像phah tio̍h痛點，人ê反擊是自然ê。所以阻止犯罪，就是恢復對方ê人性，尊重伊有人性，善tshuā伊ê人性。一個有人性尊嚴ê人，就會有人性ê反應，而且想beh歸向神性ê心思。耶穌對每一位犯罪ê人ê態度，就是恢復伊ê人性尊嚴，尊重伊是一個會家己轉變ê人，hō͘伊感覺家己是一個有價值ê人。所以伊對bat犯姦淫ê婦人人講：「婦人人，無人會定你ê罪，我也無定你ê罪，去罷，從今m̄-thang koh犯罪。」尊嚴受傷就顯出野性，尊嚴恢復就表現人性，防止犯罪就是教伊人性ê尊嚴，hō͘伊人性ê尊嚴。一個無尊重人性ê經濟社會，一旦注重經濟性khah過頭人性，人性受忽略，自然經濟愈發達、犯罪愈多。譬如工廠ê設立，只注重生產力，無注重人ê生活環境，tī廠周圍ê人無受看做人，自然引起非人性ê抗爭。今á日，台灣社會犯罪率愈來愈高ê原因，就是這種人性ê教育尊重喪失。人常常浸tī無人性ê環境，自然是無人性ê思想kap動作，所以一個環境beh得tio̍h拯救，也必須koh回轉去人性ê教育：親情、是非分辨、彼此ê尊重、道德ê提昇.... . . . 等，án-ni一個犯罪ê社會才會自愈。

Tī耶穌ê比喻中，耶穌就是用親情來代替經濟ê價值。老父教示大kiáⁿ講：「伊是你ê兄弟，比財產、牛羊等經濟價值khah重要」，耶穌也hō͘該撒看見骨肉之親（以色列同胞）比羅馬政府ê稅金khah重要。當一個社會看重人ê關係比錢財khah要緊時，才會tàng有人情味，才會tàng恢復人性ê尊嚴，án-ni受過創傷ê社會也才會tàng復原。」