《生活e5台語，台語e5生活》

 | | | 轉寄

林俊義教授，阮感謝你！

作者 《綠色短評》李南衡 2011.09.25

　　　　　 　　美國留學tńg來台灣了後四十外年來，林俊義教授一方面佇東海大學教冊、裁培一批一批ê學生佇台灣環保工作頂面用心盡力；一方面伊本人tshuā頭為台灣環保拍拚。受tio̍h今年三月十一日本大地動所引起ê核能發電廠災難，kah民進黨總統候選人蔡英文提出「2025非核家園計劃」ê刺激，已經退休ê林俊義教授決定beh koh徛出來作志工，為台灣tsit塊土地來貢獻心力。

　　林教授足清楚，若是干單講「非核家園」，有可能會變作一句口號；照蔡英文所提出有時間性ê「2025非核家園計劃」，才會變作一個理想。理想beh按怎達成？除了the̍h tio̍h政權用行政力推動以外，伊認為上重要是教育，按怎hō͘全台灣ê人瞭解啥物是核能發電廠，對台灣tsit塊土地會有啥影響？kah生活佇台灣兩千三百萬人有啥關係？伊採取上傳統、上有效ê教育方法：培養種子教師。

　　八月三十一，林俊義教授接受「主婦聯盟」ê邀請，舉行「打破核安神話」系列講座，向環保志工說明「你m̄知影ê恐怖核電真相」。伊問環保志工：「你敢知影事後處理核災ê費用，至少是起一座核電廠費用ê七倍，甚至懸到七百倍！」核電是無kā人準作人ê科技，核廢料內底ê鈽，半衰期是兩萬四千七百年，完全無害tio̍h愛二十五萬年！伊講，伊m̄是thiau故意講hō͘人驚。林教授用日本福島核災作例，目前福島核電廠半徑六十公里範圍內ê土地差不多攏受污染，人類beh食uì污染土地生長出來ê動物植物，一定mā攏會受tio̍h污染。根據日本公布ê數據，福島ê銫137 ê量是當年廣島原子彈釋放ê一百六十八倍。馬政府kah台電一再向人民宣導核電真安全。伊講「根據外國經驗，一旦有人為操作無拄好，足容易發生核災，特別是反應爐出問題，tio̍h有爐仔心熔毀ê危險。」伊講核四廠一旦正式運轉，就是萬年bē死ê怪獸。萬一台灣若發生親像福島ê核災，m̄-nā股市房屋攏會毀無去，人ê死傷koh-khah無法度估計，siáng都無地走。林教授一再提醒逐個：「人類一定愛khah謙卑一絲仔！」

　　台灣基督長老教會總會舉辦「非核家園」種籽講師人才訓練會，八月二二、二三，佇台東新港教會開始，邀請林俊義教授去上課，uì生態理論、核能發電真相、再生能源等，來探討「非核家園」ê迫切性。續落去九月初五、初六，佇台南富強教會。預定beh佇全台灣巡迴培訓反核講師，伊希望學員會tàng運用伊所講ê課程內容kah所發ê資料講義，佇教會、團契、社區來宣傳非核家園理念。

　　林教授所做美好ê工，一定會佇全台灣湠開，「流目屎掖種ê，beh出歡喜聲收割！」相信台灣會佇2025年進前變成「非核家園」。林俊義教授，阮感謝你！