《生活e5台語，台語e5生活》

 | | | 轉寄

入聯合國路途真Khâm-Khiat

作者 《綠色短評》李南衡 2011.10.02

　八月二三，巴勒斯坦(Palestine)總統阿巴斯(Abbas) 向聯合國秘書長潘基文遞交成作聯合國第194個會員國ê申請書，而且佇聯合國大會發表演講。伊講，以前佇國際和平ê努力，「因為以色列無beh讓步」才攏失敗，巴勒斯坦人希望聯合國會tàng佇解決巴以衝突中發揮koh khah大ê作用。

　　八月二八，聯合國安理會將巴勒斯坦ê申請書交hō͘一個特別委員會，tsit-ê委員會審議巴勒斯坦ê入聯申請了後，會決定巴勒斯坦是m̄是有達到作為一個正式國家ê條件，內底有一項是，有明確ê邊界線kah有得tio̍h各方承認ê政府。根據聯合國憲章，新ê成員國mā一定tio̍h愛好和平。審查結果會先向安理會成員報告，安理會才決定是m̄是beh將巴勒斯坦入聯申請交聯合國全體代表大會來投票表決。tse有可能會拖一站時間攏無結果。

　　巴勒斯坦分作：加薩走廊、約旦河西岸kah東耶路撒冷三塊土地，面積鬥起來有6,031平方公里，差不多台灣ê六分之一，人口有380萬人，mā差不多是台灣ê六分之一。雖然土地細人口少，但是因為伊佇歐亞非三大陸交插ê所在，地理位置特殊，自古以來一直是兵家必爭之地。目前全世界有131國、超過三分之一ê國家承認巴勒斯坦tsit-ê國家。英國國家廣播公司(BBC)佇全球進行一項調查顯示，支持巴勒斯坦以獨立國家加入聯合國ê人數比反對ê khah濟，tsit項佇十九個國家進行ê調查，有49% ê民眾支持巴勒斯坦ê立國主張，21% ê人表示反對。

　　美國早早就放調講會佇巴勒斯坦申請入聯投否決票。咱知中國、英國、美國、法國、俄羅tsit五個安理會常任理事國任何一個若投否決票，啥物案都無法度通過。巴勒斯坦入聯合國路途真khâm-khiat，mā應該會真遙遠才tio̍h。

　　斡頭看咱家己，無論土地人口台灣攏是巴勒斯坦ê六倍，咱佇經濟、科技ê發展，抑是自由、民主、人權ê表現，攏擺佇世界ê頭前名。Mài講承認咱是一個國家才23個國家，顚倒是巴勒斯坦ê六分之一niā-niā，上重要是聯合國安理會常任理事國有tó一國會支持咱？上有可能ê是美國。但是咱一定愛會記得，2004年十月二五，當時美國國務卿鮑威爾(Colin Powell)講：「台灣m̄是獨立ê，mā無享有國家ê主權。」2007年八月三十，美國國安會專管亞洲事務主任韋德寧(Dennis Wilder)講：「第一，台灣m̄是中華人民共和國ê一部分；第二，中華民國抑是講台灣，並m̄是有主權ê國家。」
雖然前無偌久，美國眾議員提出一項決議案，支持台灣成作聯合國ê完全會員。總是咱若看巴勒斯坦ê遭遇，咱tio̍h覺悟：入聯合國路途是真khâm-khiat。