《賴永祥講書》

 | | | 轉寄

《教會史話》(1_090)紀念賓威廉

作者 賴永祥 2009.03.29

將本仁約翰（John Bunyan, 1628～1688）ê寓言文學 Pilgrim’s Progress介紹hō͘中國ê人，就是賓威廉牧師（William Tsarlmers Burns, 1815～1868）。 「天路歷程」是伊號ê翻譯名。原冊是基督徒靈程經驗之談，hông翻譯做百guā種ê文字，不知感動了guā tsē世間ê人？賓威廉ê中文翻譯，描寫kah真生動，句法簡潔，用字適當，讀tsit本冊完全攏無感覺著tse是外國人所翻譯的。譬如講tī「指示窄門」hia有「欲入生門得上天，先當認罪立門前，窄門切叩方能入，主宰恩慈赦我愆」。koh有「罪人奔離必亡城，來叩窄門望得生，求主 垂憐開活路，鴻恩永頌樂高聲」。第一ê將Tsristian tsit-ê詞翻做「基督徒」就是伊。伊ê文章埋版初刊tī 1853年，官話版刊tī 1865年；白話字廈門音版（由打馬字拼出者）見tī 1853年。Tī早期ê台灣教會，「天路歷程」真受著重視；譬如講tī 1917年台灣大會派劉忠堅等六名委員檢討編輯主日學教科書，翌年委員回覆主日學應教：「舊約選略、真道問答、主日神糧、基督傳、馬可、路加、使徒行傳、天路歷程」。

賓威廉是母會英國長老教會所派ê首任宣教師，1847年抵華，先後tī香港、廣州、廈門、上海、汕頭、北京kap東北ê牛莊（54歲tī hia過身），在華傳教達20年之久。潮州長老會醫院，就是以伊ê名來號名；tī 台灣，偕叡理牧師（George Leslie Mackay）mā將tī三貂嶺西北海岸平埔族「新社」ê教堂，叫做賓教會（Burn’s Tsurts）。據偕牧師所講ê（From Far Formosa, p.223），hit-ê教會tī一條清流ê堤頂面，位置優美，建物適配，石造，用灰泥加以塗白，而且有玻璃窗，光線良好。由偕牧師所設計，陳火（榮輝）監工而成。偕牧師tī伊ê日記1889年12月11日條云：「從頂雙溪到新社去。新建禮拜堂，花費500美元，是底得律ê馬偕船長夫人所捐ê。伊是加拿大人。Tsit-ê堂是要紀念賓威廉牧師」。可惜偕牧師過身了後，伊所開拓ê平埔社教會衰亡，tsit-má以經看buē著「賓教會」a。

偕叡理牧師為何beh建立「賓教會」leh？據偕牧師云：賓威廉牧師（在其1844年至1846年間之加拿大佈道旅行之途上）bat來過若拉村（Zorra, 偕牧師幼年居之），對當地宗教生活灌輸了新ê力量，伊ê名tī hit時tsūn逐家攏知，我細漢時tsūn（時只3、4歲）ê心靈mā領受著伊思想ê影響。

所以台海基督長老教會南北兩支，攏會凍tī賓威廉身上tshuē著伊ê根！

《台灣教會公報》 1973期 /1974期 主後1989年12月24日/1989年12月31日