《賴永祥講書》

 | | | 轉寄

冊房經理、質疑俗語字

作者 賴永祥 2005.08.21

賴永祥講書 (004)

孫耀雲是橋á頭後衛庄ê人，1883年由黃月德引tshuā信主，tī 1886年由巴克禮牧師洗禮，仝hit年到冊房做印刷工，服務33年久，hit中間有升做經理，koh做公報社主任。1896~1903年擔任太平境教會執事，1903~1911年擔任長老，退休了後轉籍去東門教會。早時通稱冊房，就是今教會公報社ê前身，負責推銷宗教書刊，及出版白話字教會報。

林錦生kap冊房經理孫耀雲有真好ê交情，伊講孫先生，邊幅不修，穿衫tshìn-tshái ，出入短衫布褲， 足拖木屐，從外表看，是粗夫俗子之類，其實並m̄是無一點á學問。伊平時喜愛讀裨官小說， 收藏奇書古本，對俗語偏字ê收集研究，koh khah有奇特ê興趣。一工伊問錦生講：「你是甘牧師ê字典編修員，字典 tioh雅俗齊備。雅者正字音義，有康熙字典，有夠依據，自然做起來khah簡單；俗者俗語，散散參錯，亂雜無據。雖然有「十五音」字彙，會當做參考；但mā有bē當hō͘人滿意ê所在，beh按怎tō好?」伊koh繼續問講：「譬如餡(āⁿ)餅ê「餡」，水餃ê「餃」，恁ê字典甘有tsia-ê字? koh譬如淘井ê「淘」，汰米ê「汰」，你m̄知bat無? 頂面四字雖然m̄是常用ê字，卻是淺顯ê俗語字。等錦生teh beh回答ê時，耀雲接煞koh問講：「Koh譬如俗語“Kāu sua-sap” ê “sua-sap”，其正字是啥物?」錦生頭àⁿ-kē-kē ，一tia̍p-á-kú了後，才回答講「瑣屑」。耀雲拍phok-á koh笑笑á講：「人講後生可畏，這句話無m̄-tio̍h!聽你ê回答，會當知影你確實m̄是泛泛之流；甘字典實在是真幸哉！」 (甘字典說明 sua-sap 就是人辦事有tsē-tsē tíⁿ-puàⁿ ê 意思，「講話 kāu sua-sap」是用例之一，但無寫出「瑣屑」二字)

甘為霖編ê《廈門音新字典》，有收正字、仝音異形字、俗字，mä有收所謂ê高級字(有字形但khha少實用)、罕用字、偏字kap怪字，個別占一tsuā,列記讀音kap解義。注音用羅馬字，正字kap字首用大寫；俗語音一律用小寫。抬頭單字先記字頭大寫ê羅馬字讀音，續落去是漢字，最後是字義解說。抬頭俗語先列語音，續落去是記正字kap讀音，用括號圍起來，譬如：La̍k(六Lio̍k)，才koh再列解說。

正字ê音義以《康熙字典》為準，問題無tsē;但俗語字是編者倚靠當時tī閩南kap台灣通用ê「十五音」ê字彙以外，無冊好參考，無字典好根據，只有是道聽途說。俗語所該屬ê正字，有ê口傳失真，真tsē是有語無字。雖然不辭辛勞探訪查問，往往為tio̍h斟酌一字半語，消磨真tsë時間，猶koh be-tàng定案。

錦生得tio̍h耀雲ê鼓勵，甚至tī伊辭退編修工作了後，猶koh繼續走尋(tshuē)探討俗語字，總共得tio̍h參考書所無ê 53字，tī 1911年ê春天交hō͘甘為霖。(根據《七十年前ê回憶》)