《賴永祥講書》

 | | | 轉寄

《教會史話》(1_056) 少年茂生手寫中堂

作者 賴永祥 2008.08.10

林燕臣(1859～1944)是清季ê秀才，伊bat開私塾來教學生，伊ê長子茂生(1887～1947)tuè tī伊身軀邊，讀四書五經。因為伊頭腦真好，過無幾年，作文寫字，攏真厲害，人攏叫伊「小童生」。林錦生是茂生ê堂弟，1904年入去新樓中學。hit時伯父林燕臣kap許凌雲(秀才）tī leh做中學ê漢文教員兼舍監，茂生做助教(學生叫伊「半仙ê」)，擔任漢文課程kap聖詩練習，是當時唯一會曉彈風琴ê教會青年。

林茂生寫ê字真水，伊ê字跡流傳tī民間，m̄-koh世人攏m̄知是伊ê筆跡。林錦生bat tī「70年前ê回憶」內面，透露少年茂生手寫中堂ê逸事如下:

當時聖教宣揚，iáu koh是屬於播種bú芽ê時代，慕道者必須愛有堅定ê決心，掙脫傳統禮教ê控制，更須通權達變，擊退習俗人情ê干擾，有tsiah有可能追向永生ê窄門。所以每一位棄邪歸正ê入信者，tī毀棄神像、除掉神主位牌了後，伊ê正廳必定愛掛十絛誡命ê中堂，闡明聖道ê對聯，iá是有關聖蹟聖道ê各種圖畫，藉以表白in全家ê信仰。

「當時這寡十誡、對、圖畫，攏是經由冊房(今公報社前身)一半擺á、一擺對廈門、香港、上海進口，是無tiâⁿ-tiâⁿ有ê，數量亦真有限；自然不夠來應付南北二路各教會ê需要。加在冊房著tī中學隔壁，經理孫耀雲先生知影家兄(茂生)會曉寫字，就近商請伊幫忙手寫。事關聖工傳播，更是青年服務教會ê一ê大好機會，家兄就接受伊ê拜託。

「按十誡中堂，大小大約宣紙全張。寫時要桌面濶大、墨汁豐富，更加需要有人tī邊á鬥相工。所以無論是磨墨洗筆、拉平牽直、整理拚掃，攏由筆者(錦生)擔任臨時ê書僮，一手包辦。大凡墨筆書寫，只不過如此niâ-niâ。若是金字ê十誡中堂，麻煩就大了。Tsit-má蓋寫金字，無比khah-tsá。Tsit-má只要筆醮金液，一揮就會使a。當時要先採集足量松(榕)樹乳液以代替墨汁。要輕描淡寫，buē凍點乳沾染紙面。若無，稿完成了後滿紙麻面是真歹看。既然寫完，要等乳液半乾，然後二字一劃按貼金簿。再過一段時間，等乳液乾燥，金簿粘牢，tsiah用筆掃掉多出來ê金屑，就大功告成。

「如是，不論中堂對聯，或金字或墨寫，一幅一幅次第完成。耀雲先生mā依先後ê順序，供hō͘真欠缺ê教會，以滿足會員ê需要。如是冊房、教會、信徒皆大歡喜。」

如果舊家存有書寫十誡中堂對聯，不妨請專家來鑒定!


《台灣教會公報》 1934期 主後1989年3月26日