《賴永祥講書》

 | | | 轉寄

《教會史話》(1_057)kap費師母學練風琴

作者 賴永祥 2008.08.17

費仁純(Frederick R. Johnson))擔任長老教中學校長，任教ê期間是1901年1月至1908年6月。夫人tī 1901年11月來台灣，隨tī中學教「詩調」(主要是hō͘學生會曉吟詩)，著親像tsit-má ê音樂課程。

林錦生(1894～1980)早年就是由費師母所提拔ê。師母tī 1901年uì太平境主日學學生內面選拔伊入去中學，1905年選伊學彈風琴。hit時太平境會堂已經有中型ê風琴，由費師母擔任司琴，她beh培養本地ê琴手來交接。當時已經學會曉彈風琴ê人只有林茂生。綿生tī 1907年中學畢業，得著甘為霖牧師ê賞識協助字典ê編修，亦有費師母ê推薦。

林錦生tī「七十年前之回憶」講著練琴ê體驗云:（費師母）拿出一本厚身ê詩譜，翻出kap現在聖詩175首仝款厚（按Henry Baker作曲）ê琴譜.... 睜眼一看，紙面滿佈白圈黑點。幾是嗜讀小說之筆者，疑是昔時孫臏撤豆成兵圖案ê翻版。黑點小如細粒豆鼓，白圈即形近小麥。koh有白圈帶柄者，若親像豆芽，黑點有尾者，更khah像水墘蝌蚪，面對星羅棋佈，圈圈點點ê教本….暗自神傷叫苦。tsit-ê時tsūn，費師khiā tī正pîng。tò手指頭仔指tī黑點頂面，正手ê指頭仔依照tò手指頭仔所指ê，一拍一拍按鍵子彈去，就是所謂ê指法示範。既畢，終而復始，再來一遍。第三遍，就誘導筆者正手指頭仔，仝款試彈一遍。又再來一遍。示範中，併上線譜(右手)及線內上下兩排黑白圈點之意義，扼要解說，以充初步啟蒙。.....或謂費師母之教法，是Sparta流，是進的，tsit句話確實是無烏白講。親像筆者練琴雖然已經有幾若個月ê時間a，彈ê時若有m̄著一指，伊手中細嫩ê籐條，著會隨拍落來。所以，彈琴ê時，明知影面頭前是心慈意善ê師母，m̄-koh心內猶原是真驚惶，心情真歹維持平靜。

依當時ê慣例，每當主日早起，中學男生女學女生，要各別整隊至太平境禮拜堂，kap會眾同守崇拜聽道。下晡，女學師生，著愛列隊至中學講堂，kap查埔gín仔聯合共守禮拜。根據林錦生ê回憶，1905年冬天開始，太平境早起禮拜ê司琴，著改由錦生tī費師母輔導之下做琴手。下晡ê司琴，太平境仍由費師母負責。中學講堂男女生聯合禮拜，則由錦生專任到畢業為止。費校長退職歸家回國了後，太平境早起ê禮拜，就由錦生擔任琴手，不管是寒天熱天，透風落雨，iá是身體無爽快，亦竭力以赴；至1911年3月考入醫學校，已buē凍繼續工作，tsiah離開崗位。
　　 　 《台灣教會公報》 1935期 主後1989年4月2日