《賴永祥講書》

 | | | 轉寄

《教會史話》(1_058)自編詞譜合璧聖詩

作者 賴永祥 2008.08.24

早年南部教會所用ê「養心神詩」（有漢字版.白話宇版)有59首，1900年甘為霖（William Campbell）主編「聖詩歌」（白話字）有122首。這寡詩冊，有詞無調無譜。beh唱詩例由主持者，先朗誦詩詞，而後自起詩調，唱出第一句，hō͘會眾隨聲合唱。又置管風琴，選定詩調大部分攏是由琴手負責。按呢，在台灣tang時tsiah有詞譜合壁聖詩leh？

林錦生(1894 ~ 1980)tī「七十年前之回憶」云:當時所用ê琴譜，其一是Tsurts Praise, 第二是songs and soles， 攏是英文原本，各有一千多首。吟詩ê時，琴手既負責選調，自然必須愛熟悉聚會ê時所用ê詩調。又koh必須記憶清楚，熟知各詩調tī琴譜ê第幾頁第幾首。tī講道者朗誦詩句ê時間內，選定合於詩譜，適合會眾ê詩調。又koh愛眼精手快，自千首詩原文內面，隨翻出beh彈ê琴譜。萬一，若是tú著證道者念詩速度尚過緊，又koh tī無意識中，隨宣佈peh起來吟詩。iá是因為琴手家己記憶無清楚、眼鈍手慢，buē赴翻出琴譜ê時.一定是急甲若熱鼎頂面ê狗蟻，焦燥緊張，舉止失措。他回憶有一擺，宋忠堅牧師（Rev. Duncan Ferguson）應邀太平境講道ê時，聖詩念kah特別緊，念完隨宣佈kiā起來，迫kah beh buē赴選調、tshuē譜來手忙腳亂，tshíng汗直流，食過痛澈心底ê苦杯，自然應該愛想beh按怎來預防。代誌著是tsiah呢tú á好，去tú著費仁純校長(F.R.Johnson)坐船歸國ê途中，費師母對香港寄來Songs and Soles一冊相贈，錦生就以此動機，tsiah想出有必要自編詞譜合璧聖詩。

錦生云：當時聖詩，tsiah一百多首niâ。tsit-má beh家己調配，首先自然愛小心選定合詩詞，適合會眾唱吟ê詩調，每首一譜。koh來，依據原文琴譜，一一譯成四部合唱簡譜，併註明原譜ê所在，以利便司琴ê時找譜。譯稿正反兩面，各錄一首。等到全稿譯完，著kā當時出版ê聖詩(大小約9x12公分，按指Sing si kua 無誤)拆開，每一頁詩配一張譜。然後彙集整齊，kā訂做一本。此合璧聖詩，既已編成。凡以後崇拜時ê司琴，既無選調ê費神，亦省去tshuē譜ê麻煩。既合用又koh利便，實現行聖詩ê雛型，tī當時會凍講是iáu無人做過ê。

林錦生tī台南太平境教會司琴，是1905年12歲起kap費師母分擔，到1908年費師母年3月入醫學校為止，總共5年外。伊編成ê詞譜合璧聖詩，應當是tī 1909年-1910年。


《台灣教會公報》 1936期 主後1989年4月9日