《賴永祥講書》

 | | | 轉寄

《教會史話》(1_068)馬偕ê教區

作者 賴永祥 2008.11.02

1872年3月7日，加拿大長老教會所派ê宣教師偕叡理(Rev. George Leslie Mackay)，由李庥牧師(Rev. Hugh Rittsie)陪同，坐輪船「海龍號」向北。德馬太醫生(Dr. Matthew Dickson)uì台灣府kap in作伙行。輪船駛兩天了後，駛入淡水河口。偕牧師，通稱馬偕，觀看南北，koh再遙望內陸青翠ê山嶺，伊感覺真滿意，kan-ná是聽著一種平靜koh清楚ê聲音teh講:「你會使tuà tī tsia，tse是你傅教ê所在」。uì甲板頂kuân看台灣北部，伊ê印象實在美麗，靜立凝視，悠然神往。傍晚下船散步。有真多高大茂盛ê樅樹特別引起李庥ê注意，使他想起故鄉蘇格蘭。伊tī打狗無看過樅樹。伊觀察地勢，淡水(時滬尾街)kap一座孤立大約有700呎高ê山(指觀音山)遙遙相對，tī東方kap南方後面山嶺重疊，高至3、4千呎，伊感覺真感動，用手環指地平線講:「馬偕，這就是你ê教區」。德醫生mā講:「tsia比打狗koh khah suí呢。」(From Far Formosa, p.32-33)hit工是3月9日，北部教會就選用這日作為設教ê紀念日。

隔tńg工李庥牧師kap德馬太醫生就起程，uì陸路去考察南部教區ê尚北站，偕牧師mā tuè去考察伊beh傳教ê路站。in tī中壢過暝，第2天到大甲，koh到大社住了差不多一禮拜，tsit ê所在以前從來m̄ bat有宣教師來過，但是已經有教堂kap會友，是ê英國長老教會區。mā來到內社(今鯉魚潭)，過安息日了後tsiah koh tńg大社。隨即住埔社，住了一禮拜外，tsit寡平埔社，攏由tī南部聽過道ê族人tńg來宣傳服音者。tńg來到大社了後偕牧師kap李庥、德馬太道別偕一漢人返來淡水，tī 4月6日到位，總共出去了23天。從此以後偕牧師就以淡水為根據地，加速學習語言，收學生，漸漸phah開傳道ê路。

由偕牧師ê日記kap著作From Far Formosa(1895年刊)，吾人可以-讀 到他如何拓展教務kap巡迴考察ê體驗kap見聞。伊出去旅行，常常tshuā學生tàu陣 去，主要是步行，有時tsūn經過山嶺、沙磧、叢林iá是奔流。有時mā坐轎，m̄ koh甲意自然風景ê偕牧師無甲意tsit種方式。tī急流中坐船是真危檢ê代誌。劉銘傳任巡撫了後，台北府城漸漸整頓，tī城內、艋舺、大稻埕有人力車ê便利，tī雞籠(基隆)kap竹塹(新竹)之間mā設一絛大約50哩ê鐵支路。伊ê腳跡，行遍北部各地，噶瑪蘭平原，koh沿東海岸南丁，mā到附近島嶼。伊bat畫一幅地圖，標明所建設教堂ê所在，總共有60所，北部已經變成一ê教區。

《台灣教會公報》 1948期 主後1989年7月2日