《賴永祥講書》

 | | | 轉寄

《教會史話》(1_074)設訓瞽堂tī洪公祠

作者 賴永祥 2008.12.14

Beh設法使無法度恢復視力ê盲人得著謀生ê知識，並且建立個人ê自尊kap自信，實在是愛靠特殊教育ê實施。Tī台灣就是甘為霖牧師（Rev. William Campbell）tī府城（台南）洪公祠所設ê盲校--訓瞽堂--，為先驅。

甘為霖第二次例假回國（1887年1月31日離台，1889年11月9日返台），hō͘伊有機會整理出版「台灣佈教之成功」，籌刊盲人用浮凸版書、mā有機會籌募盲人事工ê基金。英國聖經公會（British and Foreign Bible Society） bat提供刊印浮凸版馬太福音ê費用，格拉斯格自由教會學徒傳道會（Frce tsurts Student Missionary Society）約定beh將募款ê錢hō͘台灣盲人事工來用。

所以甘牧師tńg來台灣了後，即時就開始了創設盲校ê活動。我查閱《台南教士會議事錄》，1889年11月伊已經tshiàⁿ阿炎（A-iam），主要是為盲人書刊來工作，1890年6月19日伊報告學徒傳道會已經捐了50英磅；1890年11月4日報告tshiàⁿ基仲（Ki-tiong）作為盲校ê教員,一個月5元.，1891年9月12日租用了洪公祠作為盲校之用；租用期限5年，逐年納租金60元（$60）。tī洪公祠擔任教員ê人，有塩埔人Tsiau，伊自1891年4月起開始工作，翌年9月離開學校tńg去故鄉。接任ê人是北斗人林紅，伊受派到泉州協助設盲校九個月tú tńg來台灣。伊m̄若教盲人按怎學點字，mā傳授鑿成凸字ê奇巧。

1895年台灣改隸日本，因為動亂煞使盲校暫停一段時期，總算決定tī 1897年3月底所租ê洪公祠歸還厝主來停辦。教員林紅辭任，由教士會改派到灣仔內任傳道。甘為霖牧師勸說日本政府成立官辦盲校tī tsit-má台南ê啟聰學校。如此，洪公祠ê盲校就是台南啟聰學校ê尚前身。以清國全境來講，洪公祠盲校mā是先驅之一。1874年莫萊（William H. Murray, 原本是蘇格蘭聖經公會所派）tī江京創辦者或者尚早。1888年李修善（David Hill）tī漢口設訓盲書院，洪公祠是排第三ê。1890年上海舉行第二屆在華宣教師會議，甘為霖受選為全國盲人教育委員會委員，協助推動全國性ê策劃kap事工。

我bat讀國分直一「壺を祀る村」（東京三省堂，1944年刊）一冊，有kap盲人郭主恩講話ê hit段。郭主恩是洪公ê學生之一，不過伊講伊早年tī 1889年著師事甘牧師。8歲入門，學進常受命tī民眾前按點字讀三字經，tī考場前讀五經ê幾節，眾人真感嘆。後來郭留學（東京）tī小石川盲啞學校六年。冊中郭說眾多稱洪公祠盲校為訓育院.，m̄ koh掛ê招牌是「訓瞽堂」。 　
《台灣教會公報》 1955期 主後1989年8月20日