《台語荒漠甘泉（漢羅版）》

 | | | 轉寄

風ê鎖匙

作者 陳清俊 譯 林俊育 漢羅翻寫 2010.05.02

listen
五月初二(五月二日)

「耶和華(Iâ-hô-hua) tī 天頂(thiⁿ-téng) 設立(siat-li̍p) 伊(i) ê 寶座(pó-tsō)，伊(i) ê 國權(kok-koân) 管轄(koán-hat) 萬項(bān-hāng) 有(ū)。」(詩篇103:19)

Tī 一個(tsi̍t-ê) 早春(tsá-tshun)，我(goá) 出門(tshut-mn̂g) ê 時(sî)，有(ū) 一陣(tsi̍t-tsūn) 東風(tang-hong) 無情(bô-tsêng) teh 掃(sàu) 來(lâi)，強(kiông) koh 乾燥(ta-sò)，吹(tshe) 起來(khí-lâi) 真(tsin) tsuē 土粉(thô͘-hún)。當(tng) 我(goá) kā 鎖匙(só-sî) tuì 門(mn̂g) 裡(nih) the̍h 起來(khí-lâi) ê 時(sî)，真(tsin) 無奈(bû-nāi) teh 講(kóng)：「希望(hi-bōng) tsit 陣(tsūn) 風(hong) 會(oē)...」忽然間(hut-jiân-kan) 我(goá) ê 思想(su-sióng) 停止(thêng-tsí)，方向(hong-hiòng) 轉變(tsoán-piàn)，tsit 句(kù) 話(oē) 無(bô) koh 繼續(kè-sio̍k) 續落去(soà-lo̍h-khì) lah。

我(goá) 繼續(kè-sio̍k) 行(kiâⁿ)，tsit-ê 事(sū) 變做(pìⁿ-tsoè) 我(goá) 一個(tsi̍t-ê) 寓言(gū-giân) 故事(kò͘-sū)。我(goá) 想像(sióng-siōng) 有(ū) 一個(tsi̍t-ê) 天使(thiⁿ-sài) hō͘ 我(goá) 一支(tsi̍t-ki) 鎖匙(só-sî) 講(kóng)：「我(goá) ê 主人(tsú-lâng) 送(sàng) 你(lí) 伊(i) ê 疼(thiàⁿ)，ài 我(goá) hō͘ 你(lí) tsit-ê。」我(goá) 好奇(hó-kî) 問(mn̄g) 講(kóng)：「這(tse) 是(sī) 甚麼(sím-mi̍h)？「是(sī) 風(hong) ê 鎖匙(só-sî)。」天使(thiⁿ-sài) 回答(hoê-tap) 了(liáu)，就(tsiū) 消失去(siau-sit-khì)。

我(goá) 起初(khí-tsho͘) 想(siūⁿ)，「這(tse) 一定(it-tēng) 是(sī) 能(oē) hō͘ 我(goá) 幸福(hēng-hok)。」我(goá) beh 到(kàu) 山頂(suaⁿ-téng) 風源(hong-goân) ê 所在(só͘-tsāi) 宣布(suan-pò͘) 講(kóng)：「我(goá) beh 消滅(siau-bia̍t) tsit-ê 討厭(thó-ià) ê 東風(tang-hong)，無(bô) koh 作弄(tsok-lōng)！」將(tsiong) hit-ê 無(bô) 友善(iú-siān) ê 風(hong) 吹來(tshe-lâi)，關(kuaiⁿ) 起來(khí-lâi)，真(tsin) 得意(tik-ì) kā 伊(i) 鎖(só) 起來(khí-lâi)，kā 伊(i) 收拾(siu-si̍p) 起來(khí-lâi)。」

然後(jiân-āu) 我(goá) 看(khoàⁿ) 周圍(tsiu-ûi)，問(mn̄g) 家己(ka-kī)，「我(goá) beh 用(ēng) 甚麼(sím-mi̍h) 來(lâi) 代替(tāi-thè) 伊(i) ah?」我(goá) 想(siūⁿ) 溫暖(un-loán) ê 南風(lâm-hong)。爽快(sóng-khoài) ê 南風(lâm-hong) 帶(toà) 出來(tshut-lâi) tú 出世(tshut-sì) ê 羊羔(iûⁿ-ko)，新開(sin-khui) ê 花蕊(hue-lúi) kap 各種(kok-tsióng) ê 草木(tsháu-bo̍k)。總是(tsóng-sī) 當(tng) 我(goá) 將(tsiong) 鎖匙(só-sî) 插(tshah) 入去(ji̍p-khì) 門孔(mn̂g-khang) ê 時(sî)，鎖匙(só-sî) suah 會(oē) 燙(thǹg) 我(goá) ê 手(tshiú)。我(goá) 大(toā) 叫(kiò) 講(kóng)：「我(goá) teh 做(tsoè) 甚麼(sím-mi̍h)？」Sáng 知(tsai) 我(goá) 引起(ín-khí) juā 大(toā) ê 損失(sún-sit)？我(goá) thái 會(oē) 知(tsai) 田野(tshân-iá) 是(sī) 需要(su-iàu) 甚麼(sím-mi̍h)？我(goá) tsit-ê 戇想(gōng-siūⁿ) 會(oē) 引起(ín-khí) 千千(tshing-tshing) 萬萬(bān-bān) ê 問題(būn-tê) 出來(tshut-lâi)！]

我(goá) 家己(ka-kī) 見笑(kiàn-siàu)，giâ 頭(thâu) 請求(tshéng-kiû) 主(tsú) 差(tshe) 天使(thiⁿ-sài) 將(tsiong) tsit 支(ki) 鎖匙(só-sî) the̍h tò-tńg。以後(í-āu) 我(goá) lóng 無(bô) ài koh 有(ū) 這(tse) 鎖匙(só-sî)。料想(liāu-sióng) 無(bô) 夠(kàu)，竟然(kèng-jiân) 主(tsú) 親身(tshin-sin) 到(kàu) 我(goá) 身邊(sin-piⁿ)，伊(i) 伸手(tshun-tshiú) the̍h 鎖匙(só-sî)，我(goá) khǹg tī 伊(i) ê 手(tshiú) ê 時(sî)，看(khoàⁿ) tio̍h 鎖匙(só-sî) 接觸(tsiap-tshiok) tio̍h hit-ê 神聖(sîn-sèng) ê 釘痕(ting-hûn)。

我(goá) 滿心(moá-sim) 懊惱(àu-náu)，伊(i) 帶(toà) hit-ê 神聖(sîn-sèng) koh 疼痛(thiàⁿ-thàng) ê 釘痕(ting-hûn)，我(goá) 竟然(kèng-jiân) iáu 嫌(hiâm) 伊(i) ê 手(tshiú) 所(só͘) 做(tsoè) ê 事(sū)。伊(i) 將(tsiong) 鎖匙(só-sî) hē tī 腰帶(io-toà) ê 頂面(téng-bīn)，我(goá) 問(mn̄g) 講(kóng)：「你(lí) 保管(pó-koán) 風(hong) ê 鎖匙(só-sî) mah?」「是(sī)，我(goá) ê kiáⁿ。」伊(i) 安祥(an-siông) 回答(hoê-tap)。伊(i) 講話(kóng-oē) ê 時(sî)，我(goá) 注意(tsù-ì) tio̍h 我(goá) ê 一生(it-sing) ê 鎖匙(só-sî) 也(iā) lóng 掛(koà) tī hia。伊(i) 看(khoàⁿ) 我(goá) tio̍h 一(tsi̍t) 驚(kiaⁿ) ê 款(khoán)，問(mn̄g) 講(kóng)：「Kiáⁿ ah，你(lí) kiám m̄ 知(tsai)，我(goá) ê 權柄(koân-pèng) 管理(koán-lí) 萬項(bān-hāng) 有(ū) mah?」

我(goá) 問(mn̄g)：「你(lí) 統治(thóng-tī) 萬物(bān-mi̍h)，我(goá) 嫌(hiâm) 一(tsi̍t) 兩(nn̄g) 句(kù) 話(oē)，kiám 有(ū) 要緊(iàu-kín) mah?」伊(i) 溫柔(un-jiû) 伸手(tshun-tshiú) hē tī 我(goá) 身上(sin-tsiūⁿ) 講(kóng)：「Kiáⁿ ah，tī 一切(it-tshè) ê 事(sū)，疼(thiàⁿ) 我(goá)，信(sìn) 我(goá)，o-ló 我(goá) 是(sī) siōng 安全(an-tsoân) 平安(pêng-an)。」──Mark Guy Pearse


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com