《台語荒漠甘泉（全羅版）》

 | | | 轉寄

Khuà-lū á an-tsīng

作者 Tân Tshing-tsùn 2006.10.08

listen

Tsa̍p ge̍h pueh ji̍t

"It-khài bo̍h-tit khuà-lū." (Hui-li̍p-pí 4:6)

Buē tsió ki-tok-tô͘ tī ut-tsut, khuà-lū ê tsōng-thāi, uī-tio̍h sing-ua̍h huân-ló tang huân-ló sai. Tī sing-ua̍h bô-îng tiong jû-hô ū sûn-tsuân pîng-an ê pì-kuat sī tsin iàu-kín ê sū. Iu-lū tuì lán ū sím-mi̍h lō͘-īng? Tsiông-lâi m̄-bat ū lâng in-uī iu-lū hō͘ i khah kiān-khong, á-sī pang-tsān lâng uân-sîng Siōng-tè ê tsí-ì, á-sī pò lâng thuat-lī ut-tsut, iu-lū ê hong-huat. Huân-ló tsí-ū uē hō͘ lâng sing-ua̍h hāu-lu̍t kàng-kē, phò-huāi pún ū bí-buán ê jîn-sing. Lán ê Tsú tsua̍t-tuì kìm-tsí lán ê ut-tsut, iu-lū, huân-tsa̍p, put-an, I kóng, "só͘-í bo̍h-tit khuà-lū kóng beh tsia̍h sím-mi̍h? beh lim sím-mi̍h? á-sī beh tshīng sím-mi̍h?" (Má-thài 6:31) I ê ì-sù kóng m̄-sī ài lán bô uī-tio̍h tsiong-lâi kè-uē, phah-sǹg, sī kóng m̄-thang uī-tio̍h tsiah ê sū huân-ló.

Lâng nā khuàⁿ lí bīn jiâu-jiâu iu-kat-kat, kóng-uē ê siaⁿ-tiāu nńg-sô-sô, siau-ki̍k ê thāi-tō͘, sim-lāi khuat-hua̍t hí-lo̍k, tsiū tsai lí siông-siông tī iu-lū huân-ló tiong. Só͘-í tio̍h tsiong sìⁿ-miā kau-thok Siōng-tè, ló͘-li̍k hiòng kuâiⁿ peh, kàu ū tsi̍t ê kuâiⁿ-tō͘, lí beh khuàⁿ-kìⁿ hûn lóng tī lí ê ē-bīn. --- Darlow Sargeant
Siông-siông huân-ló, kiaⁿ-hiâⁿ, sū-sū huâi-gî, lâng-lâng lóng buē siong-sìn, tsiū sī jio̍k-tsiá ê piáu-hiān. Án-ni, kiám uē hō͘ lí sím-mi̍h hó-tshù? Kiám m̄-sī uē tsó͘-tòng tio̍h lí ê hîng-tōng? Hóng-gāi tio̍h tsuè-tshut tì-huī ê kuat-tīng? Lán pún thang khò sìn-sim phû khí-lâi, khiok in-uī tī huân-ló tsing-tsat tiong teh tîm lo̍h-khì.

Ah! An-tsīng sī juā-tuā ê un-tián! "Lín tio̍h tiāⁿ-tiāⁿ, tio̍h tsai Guá sī Siōng-tè;" (Si-phian 46:10) "Í-sik-lia̍t ê Sìng ê" (Si-phian 89:18) uē pó-hō͘ tsín-kiù i ê tsú-bîn. Lán thang khíng-tīng kuâiⁿ-suaⁿ uē suá-khui, I ê uē íng buē huè-khì. I ta̍t-tit lán uân-tsuân ê sìn-nāi. Só͘-í, lâi ah, guá ê lîng huê kàu I ê pîng-an, tī Tsú Iâ-so͘ ê tiⁿ-bi̍t huâi-phō tiong an-hioh.

Tng lí an-tsīng,
Lāi-sim ê lîng beh tshiong-muá hô-pîng.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw