《台語荒漠甘泉（全羅版）》

 | | | 轉寄

Siōng-tè beh sîng-tsuân

作者 陳清俊 翻譯 2006.09.10

listen


Káu ge̍h tsa̍p ji̍t

"Kuan-hē guá ê sū, Iâ-hô-hua beh tsiâⁿ i." (Si-phian 138:8)

Khó͘-lān, siū-khó͘ tiong ún-tsông ū sìng ê ò-pì, ū tsi̍t tsióng kî-biāu tshiau-tsū-jiân ê li̍k-liōng, sī īng lí-sìng só͘ buē thang uân-tsuân liáu-kái. Bô lâng bô siū tio̍h khó͘-lān khiok uē tit-tio̍h sio̍k-lîng, á-sī sìng-kiat siōng ta̍t-kàu ki̍k tshim ê tsân-tshù. Tng tsi̍t ê lâng siū-khó͘ koh uē sim-pîng khì-hô, bô-iu bô-lū ê kíng-kài, koh uē tshiò-tshiò bīn-tuì pún-sin ê khó͘-lān, bô koh kiû Siōng-tè hō͘ i uē thuat-lī tsit ê khùn-kíng, án-ni siū-khó͘ í-king uân-sîng i sîn-sìng ê jīm-bū. Jím-nāi, thun-lún tit-tio̍h sîng-kong lah. (Ngá-kok 1:4) Siū tìng tī si̍p-jī-kè ê thòng-khó͘ khai-sí pian-tsit tsuè îng-kng ê bián-liû.

Sìng-lîng tsiū-sī īng tsit tsióng uân-uân tsuân-tsuân ê siū-khó͘ king-li̍k, tī lán lîng-hûn ê tshim-tshù sîng-tsiū liáu tsin tsuē kî-biāu ê tāi-tsì. Tī tsit tsióng khuân-kíng ē, tsiong kui ê lâng uân-tsuân an-tsīng tī Siōng-tè ê tshiú tiong, sim-su, ì-tsì, sim-lîng só͘ ū ê li̍k-liōng lîng-li̍k lóng-tsóng kau tshut lâi tī Siōng-tè ê kha tsîng, íng-uán ê an-lîng tshiong-muá tsuân lîng-hûn, tsuè-āu, tshuì iā an-tsīng, beh kóng ê uē iā tsin tsió lah, bô koh kiò "Guá ê Siōng-tè, guá ê Siōng-tè, siáⁿ-sū pàng-lī guá?" (Si-phian 22:1)

Kàu hit sî, lâng bô koh khong-su bōng-sióng, sióng-siōng khong-tiong lô͘-koh, tui-kiû gû-tshùn ê liām-thâu, i ê thui-lí siūⁿ-huat iā pîng-tsīng, khin-sang lo̍h-lâi, bô koh kíng-tang kíng-sai, in-uī Siōng-tè ê ì-tsì sī i î-it ê suán-ti̍k. Iáu-koh i tuì lâng tuì sū bô koh tōng kám-tsîng, bô khuài siū-khì, tì-kàu bô sím-mi̍h sū-bū uē siong tio̍h i, kong-kik tio̍h i, tsó͘-tsí tio̍h i, á-sī hóng-gāi tio̍h i ê hong-hiòng. Taⁿ i thang bô tshap khuân-kíng, it-sim kè-sio̍k tui-kiû Siōng-tè kap I ê tsí-ì. Khak-sìn ú-tiū tiong só͘-ū ê sū-bu̍t, bô-lūn sī hó, sī pháiⁿ, sī kè-khì, sī hiān-tsāi, lóng beh "hō͘ thiàⁿ Siōng-tè ê lâng tit lī-ik." (Lô-má 8:25).

Ah! Tsua̍t-tuì sūn-ho̍k Ki-tok sī hô-tíng ê hok-khì ah! Bô īng ka-kī ê li̍k-liōng, tì-huī, kè-uē kap guān-bōng, hō͘ kui ê lâng, sim-sîn uân-tsuân tshin-tshiūⁿ pîng-tsīng ê Ka-lī-lī hái, hē tī Ki-tok ê kha-tsîng, Tsit ê hok-khì sī juā tsiâⁿ tuā! --- tuì "lîng-niû" Tiōng-iàu ê sī siū-khó͘ bô hue-sim, bô sit-tsì. --- Francois Fenelon

Tsi̍t-ê ho̍k-bū, thiàⁿ-thàng, khîⁿ-tiâu ê sim,
Suî-sî uē thiaⁿ tio̍h thiⁿ-sài si̍t-kó͘ tín-tāng ê siaⁿ-im.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw