《台語荒漠甘泉（全羅版）》

 | | | 轉寄

"Bi̍k-tó, Tsīng-tsīng siūⁿ"

作者 陳清俊 翻譯 2006.12.24

listen






Tsa̍p-jī ge̍h jī-tsa̍p-sì ji̍t

"Ji̍t beh àm, Í-sat tshut-lâi tī tshân-nih, tsīng-tsīng teh siūⁿ;" (Tshòng-sè-kì 24:63)

Ká-sú lán īng khah tsuē ê sî-kan tan-to̍k tsi̍t-lâng, lán uē piàn koh-khah hó ê ki-tok-tô͘. Si̍t-tsāi, lán nā īng khah tsuē ê sî-kan tan-to̍k kap Siōng-tè tsīng-tsīng siūⁿ, lán ê sîng-tsiū beh ná ke-thiⁿ. Sè-kan ê sū tsiàm lán tsin-tsuē sî-kan, lán ū tsi̍t tsióng tshò-gō͘ ê kuan-liām, tsiū-sī lán nā bô tshin-tshiūⁿ kan-lok ti̍t-ti̍t pháng, tsáu-lâi tsáu-khì, bô-îng tshih-tshih, lán tsiū buē thang sîng-tsiū. Lán bô siong-sìn tī tshiū kha tsīng-tsīng siu-ióng sī tiōng-iàu ê sū. Tsuè tsi̍t ê Siōng-tè ê kiáⁿ-jî, lán piàn tsuè tsin si̍t-tsè. Lán siong-sìn "thih nā bô tī hé-lô͘, á-sī thih-tiam" tsiū-sī lōng-huì sî-kan. Tsóng-sī lán nā the̍h-tshut tsi̍t-tiap-á kú ê sî-kan lâi bi̍k-sióng, lâi kap Siōng-tè kóng-uē, lâi gióng-bōng thiⁿ-tíng, tse sī tuì lán siōng-tuā ê lī-ik. Lán bô tsin tsuē ki-huē uē puah-tshut lán ê sî-kan, hō͘ sim-lîng uân-tsuân phah-khui, thang tsiap-siū Siōng-tè só͘ beh sù sio̍k-lîng ê su-sióng kap li̍k-liōng.

Ū lâng kóng, "Bi̍k-sióng sī sim-lîng ê lé-pài-ji̍t." Khak-si̍t ū-iáⁿ, tī lán bô-îng tshih-tshih ê sing-ua̍h tiong, ing-kai hō͘ lán ê sim-lîng ū lé-pài-ji̍t, pàng hē kang-tsok, tsīng lo̍h lâi, ǹg thiⁿ. Tī Tsú ê bīn-tsîng tián-khui lán ê sim, tshin-tshiūⁿ Ki-tiân ê iûⁿ-mn̂g tsi̍t-iūⁿ, hō͘ thiⁿ-tíng ê lō͘-tsuí sip kàu tâm-tâm-tâm. Lán ing-kai ū tsit tsióng ê khong-kan, sím-mi̍h mā m̄-tsuè, sím-mi̍h mā m̄-siūⁿ, sím-mi̍h mā m̄ kè-uē, tsí-ū tó tī tuā tsū-jiân tshiⁿ-tshuì ê só͘-tsāi "hioh tsi̍t ē" (Má-khó 6:31).

Tsit tsióng ê sî-kan pīng m̄-sī lōng-huì, lia̍h-hî-lâng ài ū sî-kan lâi pó͘ hî-bāng, tsāi i, tse m̄-sī lōng-huì. Tsoh-sit-lâng ài ū sî-kan buâ i ê liâm-á, i ê kang-khū, iā m̄-sī lōng-huì. Hiān-tāi ê lâng, iû-kî sī to͘-tshī lâng, ài o̍h Í-sat ê bô͘-iūⁿ, siông-siông kàu tshân-tsng, lī-khui to͘-tshī ê tsháu-nāu, suan-hua, lâi kap tuā tsū-jiân tshin-kūn. Án-ni, Sim khui-khuah, lîng an-tsīng, sin kiān-khong. Tī tshân-iá sàm-pō͘, tī hái-piⁿ liù-ta̍h, tī suaⁿ-phiâⁿ kiâⁿ-kiâⁿ leh, uē sué tshing sim-tiong ê ut-tsut, lîng tit tshing-sin ê hí-lo̍k kap ǹg-bāng.

Huân-ló, pàng hō͘ buē kì,
Khì iá-guā kap Siōng-tè saⁿ-kìⁿ.

Sìng-tàn mî ê tsi̍t siú si:

Seh-kíng tsing-siaⁿ

Sìng-tàn, Sìng-tàn khuài-lo̍k,
Tsin tsiàⁿ koh lâi lo̍h, khok-khok-khok,
Ū huâi-liām, ū uì-būn,
Ū huaⁿ-hí, ū khó͘-būn,
Huan-lo̍k kua ê sió-tiāu, ná kng tiong tsi̍t ê iáⁿ
khuán
Tsîng-pik tshiū ki, liân-kiat piàn-tsuè sìng-tàn-
khuân,
Mî kan siok-tsīng bô hō͘ tshiò-siaⁿ phah-luān,
Tshiⁿ-kng ē, seh-tíng kiâⁿ ê lîng-á siaⁿ teh thuân.

Sìng-tàn, Sìng-tàn khuài-lo̍k,
Sui-jiân kî-kan bô kú uē kiat-sok,
Iā ū tsin tsuē tsa̍p-siaⁿ tsióng-tsióng,
Tsham tī sìng-tàn kua-siaⁿ tiong,
Tio̍h thiaⁿ, in tshiùⁿ-kua ê luē-iông,
Tio̍h khuàⁿ, in muí tsi̍t lâng ê tshiò-iông,
Bô thî-khàu, bô pi-siong,
Tshiⁿ-kng ē, seh-tíng kiâⁿ ê lîng-á siaⁿ teh suan-
iông.

Sìng-tàn, Sìng-tàn khuài-lo̍k,
Sìng-tàn tseh-kî kiat-sok,
Bô-iu bô-lū huan-lo̍k ji̍t-tsí kè-khì,
Bô koh thê-khí.
Tān-sī Sìng-tàn, Sìng-tàn ê huaⁿ-hí,
Îng-iāu kui tī Siōng-tè ê sìng-si,
Tuà hō͘ lâng sin ê nî,
Kap Siōng-tè hô-hó ê hok-khì,
Pîng-an hi-bāng jím-nāi thiàⁿ-thàng sù bān-tso̍k,
Tshiⁿ-kng ē, seh-tíng kiâⁿ ê lîng-á siaⁿ thuân
phiàn pang-kok.
--- Frances Ridley Havergal

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com.tw