《台語荒漠甘泉（全羅版）》

 | | | 轉寄

"Tē it hó ê sū"

作者 陳清俊 翻譯 2008.09.21

listen


Káu ge̍h jī-it (Káu ge̍h jī-tsa̍p-it ji̍t)

"Guá tsin-tsiàⁿ khuàⁿ bān sū tsuè sún-hāi, in-uī guá lia̍h bat guá ê Tsú Ki-tok Iâ-so͘ tsuè tē it hó." (Hui-li̍p-pí 3:8)

Hiān-tsāi tsìn-ji̍p tshiu-thiⁿ, tshân-hn̂g ê tiū-á í-king si̍k, sī siu-kuah ê tseh-kî, iā sī siu-kuah ngó͘-kok ê lâng huaⁿ-hí tshiùⁿ-kua, kap tiū-á ji̍p tshng-khò͘ ê sî. Só͘-í lán lâi thiaⁿ sìng-king tiong ê tsit ê "iá-guā pó-hùn." Sìn-sit sī án-ni: "Ài tit-tio̍h ua̍h tsiū ài sing ū sí. Bô uī ka-kī ê sing-ua̍h hó-kè kap hīng-hok iu-lū. Tio̍h tìng-sí tī si̍p-jī-kè ê, m̄-nā sī lí ê pháiⁿ hîng-uî kap si̍p-kuàn, iā tio̍h tìng-sí tsi̍t kuá hiah ê khuàⁿ-khí-lâi sī bô hāi koh tsìng-tong ê mi̍h-kiāⁿ. Siūⁿ beh kiù lâng, ài sing hi-sing ka-kī. Ài kiat tsin tsuē ké-tsí, tāi-sing tsiong ka-kī khǹg tī o͘-àm kap ko͘-to̍k ê tiong-kan.”

Thiaⁿ tio̍h tsiah ê kà-sī, guá ê sim lóng líng khì. Tān-sī tsai tsiah ê uē sī tshut tī Iâ-so͘ ê tshuì, guá tsiū thê-tshíⁿ ka-kī, "lâi tn̂g-tn̂g tiàm-tī I, ... í-ki̍p ū hūn I ê siū-khó͘," (Hui-li̍p-pí 3:10) sī guá ki̍k-tuā ê ti̍k-kuân kap îng-kng. It-sing ū I tsuè phuāⁿ sī suí bô pí. Guá iā thê-tshíⁿ ka-kī guá ê siū-khó͘, sī beh tsuè I ū lō͘-īng ê khì-khū. Guá iā tsai I ê Kok-kok-thaⁿ í-king khui-hue kiat-kó, tsin hong-sīng, guá iā ǹg-bāng guá ê Kok-kok-thaⁿ uē tshin-tshiūⁿ án-ni ū kiat-kó.

Sing ū thòng-khó͘ tsiah tit hong-sīng, sing ū sí tsiah tit tio̍h ua̍h, tse sī thian-kok ê kui-lē! --- tuì "bi̍k-sióng"

Tng hue-m̂ khui tshut hue ê sî, lán sī-m̄-sī kóng hue-m̂ sí khì ah?

Tshē I, tè I, kiû I, khò I,
I uē sù hok buē?
Thiⁿ-sài, sìng-jîn, sìn-tô͘, sian-ti,
Ìn kóng, "Uē".

Ē-bīn sī tsit siú si ê kua-phó͘ (tshiâ ê sò͘-jī sī kē-im; kàng E tiāu)

3 3 3 2 | 3 5 5 3, | 3 3 2 1 | 2 - - - |

5 67 1 7 | 1 23 4 3, | 2 - 2 - | 1 - - - |


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com