《台語荒漠甘泉（全羅版）》

 | | | 轉寄

"Si̍p-jī-kè"

作者 陳清俊 翻譯 2008.09.14

listen


Káu ge̍h tsa̍p-sì (Káu ge̍h tsa̍p-sì ji̍t)

"Nā ū lâng ài tè guá, tsiū tio̍h khuàⁿ-bô ka-kī, giâ i ê si̍p-jī-kè lâi tè guá." (Má-khó 8:34)

Tsú hō͘ guá pē ê si̍p-jī-kè ū tsin-tsuē khuán tsin-tsuē hîng. Bô-tiāⁿ-tio̍h sī kiò guá tī iú-hān ê ho̍k-bū huān-uî lāi tsuè pîng-huân, tan-tiāu ê khang-khè, sui-jiân guá siūⁿ guá ū lîng-li̍k tsuè khah tuā ê sū-kang. Iā khó-lîng sī iau-kiû guá muí nî king-tsok siâng tsi̍t tè thó͘-tē, sīm-tsì lóng bô tit-tio̍h siu-sîng. Mā ū-sî Siōng-tè ài guá tuì siong guá ê lâng ū hó-kám, tuì i khin-siaⁿ suè-seh, hó-hó-á tuì i kóng uē, koh tng pa̍t-lâng huán-tuì i ê sî, uē khiā tī i tsit pîng, tông-tsîng i, an-uì i. Á-sī tī huán-tuì Siōng-tè ê lâng bīn-tsîng kong-khai uī Tsú tsuè kiàn-tsìng. Iā khó-lîng sī ài guá tī siong-sim ê sî, bīn iáu uē tuà tshiò-iông lâi sing-ua̍h.

Sī, Tsin tsuē si̍p-jī-kè lóng tsin tāng, koh ū khó͘-thàng, kiò guá tsi̍t lâng ka-kī suán-ti̍k khì giâ sī bô khó-lîng ê. Tsóng-sī guá nā kam-guān giâ si̍p-jī-kè, hē tī king-kah, koh uē īng jím-nāi, bô tshut uàn-giân ê thāi-tō͘ ê sî, Iâ-so͘ tsiū tī guá sin-piⁿ, guá uē tit-tio̍h só͘ m̄-bat kám-siū-tio̍h kap I tsiah-nih tshin-kūn.

I kūn-uá guá sī ài guá tì-huī tióng-tuā sîng-si̍k, hō͘ guá kìng-ka pîng-an, koh tsing-ka guá ê ióng-khì, ke-thiⁿ guá ê li̍k-liōng. Án-ni hō͘ guá uē thong-kè siū khó͘-thàng ê king-giām, tsiâⁿ-tsuè tuì pa̍t-lâng koh-khah ū lō͘-īng ê lâng. Guá tuì tsi̍t ê in-uī sìn lâi siū kuaiⁿ-kaⁿ ê tsa̍p-tshit sè-kí So͘-kik-lân sìng-tô͘ kóng ê tsi̍t kù uē ū tông-kám, "Guá tuì pē tāng-tàⁿ lâi sîng-tióng." --- Alexander Smellie

Īng si̍p-jī-kè tòng-tsuè kuáiⁿ-á iân-tô͘ pang-tsō͘,
M̄-sī khuàⁿ tsuè puàn-kha-tsio̍h teh tòng-lō͘.

Nā-sī īng tshiò-iông lâi giâ si̍p-jī-kè,
Uē hō͘ pa̍t-lâng iu-tshiû piàn huaⁿ-hí hó-kè.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com