《台語荒漠甘泉（全羅版）》

 | | | 轉寄

"Kî-tó"

作者 陳清俊 翻譯 2008.11.02

listen


Tsa̍p-it ge̍h tshue-jī (Tsa̍p-it ge̍h jī ji̍t)

"Tuì án-ni Pí-tik lâu tī kaⁿ-nih; to̍k-to̍k kàu-huē thuè i tshiat-tshiat kiû Siōng-tè." (Sù-tô͘ Hîng-tuān 12:5)

Kî-tó sī tsiap-liân lán kap Siōng-tè ê kau-thong. Sī tsi̍t tiâu tuā-kiô, pîng-an tuà lán thong-kè guî-hiám ê tshim-ian, tuā-tsuí.

Siūⁿ tē it sè-kí tsho͘-tāi kàu-huē ê king-li̍k, sū-sū siū tsó͘-tòng, Pí-tik siū kuaiⁿ-kaⁿ, pik-hāi kàu-huē ê Iû-thài lâng khuàⁿ ná sī sìng-lī, Hi-lu̍t ông ê kuân-sè, teh tán kè-ji̍t beh kā Pí-tik tshú-sí. Kàu-huē uī i tshiat-tshiat kî-tó Siōng-tè. Kiat-kó án-tsuáⁿ? Kaⁿ-ga̍k ê mn̂g kî-tsik-sìng phah-khui, sù-tô͘ Pí-tik tsū-iû lī-khui, Iû-thài lâng buē thang liáu-kái. Hi-lu̍t ông siū Siōng-tè ê tsik-hua̍t, "hō͘ thâng kā, khuì tn̄g," kàu-huē ū sìng-lī, "nā-sī Siōng-tè ê tō-lí ná khui-khuah hing-ōng." (Sù-tô͘ Hîng-tuān 12:23-24)

Lán kiám tsin-si̍t tsai kî-tó ū tshiau tsū-jiân ê li̍k-liōng mah? Lán kiám káⁿ īng sìn-sim ê kuân-pìng lâi huat bīng-līng mah? Siōng-tè un-sù lán sìng ê tuā-táⁿ kap sîn-sìng ê sìn-sim, I só͘ tshe-iōng ê m̄-sī uí-tāi ê jîn-bu̍t, sī tshe hiah-ê káⁿ tsìng-bîng só͘ sìn ê Siōng-tè ê uí-tāi ê pîng-siông phó͘-thong lâng! "Kàu-huē tshiat-tshiat kî-tó Siōng-tè." --- A.B. Simpson

Lí kî-tó ê sî, siōng tiōng-iàu ê sī m̄-thang hān-tsè Siōng-tè, m̄-nā sī tī bô sìn ê sū, iā tī lí khak-sìn I uē tsuè ê sū. Ha̍k-si̍p kî-thāi hit ê ì-guā ê kî-biāu, hit ê bô khó-lîng ê sū, tshiau tshut lán ê só͘ siūⁿ só͘ kiû.

Só͘-í muí-pái lí uī lâng kî-tó, tāi-sing ài an-tsīng, tsông-pài îng-iāu Siōng-tè. Su-siúⁿ I ê tuā tsok-uî, I huaⁿ-hí I ê kiáⁿ Iâ-so͘, kap lí tī I sim tiong ê tiōng-iàu tē-uī, tsiū thang ǹg-bāng kî-biāu uí-tāi ê sū huat-sing. ---Andrew Murray

Lán ê kî-tó sī Siōng-tè îng-hián ê ki-huē.

Lí iu-siong mah? Kî-tó uē tsiong thòng-khó͘ piàn tsuè tiⁿ-bi̍t ê li̍k-liōng. Lí siū lāi-guā kong-kik ê guî-hiám mah? Kî-tó uē hō͘ thiⁿ-sài khiā tī lí sin-piⁿ, i tsi̍t ē mo͘ tuā tsio̍h, tsio̍h tsiū tshuì-tshuì piàn tsuè hu, pí mī-hún khah iù, tsi̍t ē khuàⁿ, tsiū tuā kun siau-bia̍t bô-khì.

Kî-tó uē uī lí tsuè sím-mi̍h? Guá ê tap-àn sī Siōng-tè uē uī lí tsuè it-tshè ê sū. "Lí ài Guá siúⁿ-sù lí sím-mi̍h, lí thang kiû lah." (Ṳ Li̍k-tāi-tsì-lio̍k 1:7) --- Frederick William Farrar
Tshiat-tshiat kî-tó, kî-tsik uē tián-khui,
Tī guî-hiám khùn-kíng tuà lâi an-uì.
Kî-tó uē tsō-tshut thong-tō, tháu-khui,
Tshng-kè thih-mn̂g tâng-tshiûⁿ ê pau-uî.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com