《台語荒漠甘泉（全羅版）》

 | | | 轉寄

"Tan-to̍k ê sî-kan"

作者 陳清俊 翻譯 2008.10.26

listen


Tsa̍p ge̍h jī-la̍k (Tsa̍p ge̍h jī-tsa̍p-la̍k ji̍t)

"tsiū ka-kī tsiūⁿ suaⁿ kî-tó; í-king àm, tsí ū I ka-kī tī hia." (Má-thài 14:23)

Iâ-so͘ Ki-tok tī sè-kan ê sî, kám-kak I su-iàu tsit tsióng uân-tsuân ê an-tsīng, tsiū-sī I tan-to̍k, ka-kī tsi̍t-lâng ê sî-tsūn. Lán lóng tsai, sè-tsiūⁿ ê ìng-siû, lâng ê lâi-óng sī juā-tsiâⁿ huì-sîn lōng-huì sî-kan, juā-tsiâⁿ hō͘ lâng phî-lô, ià-siān. Iâ-so͘ sing-ua̍h tī lâng ê tiong-kan, tsai tsit ê tō-lí, i su-iàu tan-to̍k ê sî-kan, lâi hue-hok tsing-sîn, li̍k-liōng. Uī-tio̍h si̍t-hiān I tuì thiⁿ lâi ê tiàu-bīng, I ū lâng ê jio̍k-tiám, I tuì Thiⁿ-pē ê uân-tsuân uá-khò, tan-to̍k tsi̍t-lâng an-tsīng sī tsin tiōng-iàu ê sū.

Lán tsuè Siōng-tè ê kiáⁿ-jî, kiám bô koh-khah su-iàu tan-to̍k ê sî-kan mah? Ū sî-kan thang tit-tio̍h sìⁿ-miā tiong sio̍k-lîng ê su-iàu, tan-to̍k kap Pē Siōng-tè ê kau-óng. Nā-sī kóng sè-tsiūⁿ ū lâng bô su-iàu ti̍k-pia̍t tan-to̍k kap Siōng-tè kau-óng ê sî-kan, he tsí-ū sī lán ê Tsú nā-tiāⁿ. Tān-sī Tsú nā bô I an-tsīng ê sî-kan, iā buē thang tshiong-hun î-tshî I ê thé-la̍t kap lîng-li̍k khì tsuè kang, pīng kap Thiⁿ-pē ê kau-thong. Siōng-tè ǹg-bāng I muí tsi̍t ê lô͘-po̍k lóng bîng-liâu koh si̍t-hîng tsit ê siū tsiok-hok ê si̍p-kuàn. Siōng-tè iā ǹg-bāng I ê kàu-huē uē kà-sī sìn-tô͘ bîng-pi̍k tan-to̍k ê sî sī in ko-ko sîn-sìng ê kuân-lī. I ài muí tsi̍t ê sìn-tô͘ lóng uē tsin-tsiàⁿ lí-kái, the̍h-tshut sî-kan lâi tan-to̍k tshin-kūn Siōng-tè ê tiōng-iàu.

Ah, nā siūⁿ tio̍h guá kap Siōng-tè tan-to̍k tī-teh, Siōng-tè sī tan-tan sio̍k guá ê, tsai Siōng-tè tsí tan-to̍k kap guá tsuè-hé, sī juā-tsiâⁿ suí ê kíng-tì! --- Andrew Murray

Tī tsa̍p-káu sè-kí Huat-kok tshut-miâ si-jîn La-má-tin (Lamartine) tī i ê tsi̍t-pún tsu ū siá i ê lāu-bú tī hue-hn̂g tiong ū tsi̍t-uī kap guā-kài keh-lī ê só͘-tsāi, i lāu-bú muí kang ū tsi̍t tiám-tsing tan-to̍k tī hit lāi-bīn. Tī hit-tuāⁿ sî-kan, sím-mi̍h lâng lóng buē khì siūⁿ beh kiáu-jiáu i. Tuì i lâi kóng, tse sī Tsú ê sîn-sìng hue-hn̂g.

Bô "Iâ-hô-hua só͘ huaⁿ-hí ê tē" ê lâng sī juā-tsiâⁿ khó-lîn ah! (tsham-khó Í-sài-a 62:4) Iâ-so͘ kóng, "To̍k-to̍k lí kî-tó ê sî, tio̍h ji̍p lí ê ba̍t-pâng, kuaiⁿ mn̂g, kiû lí ê Pē, tiàm-tī ún-ba̍t ê" (Má-thài 6:6) in-uī tsí-ū tī siok-tsīng tan-to̍k ê uī lán tsiah uē bîng-pi̍k hit ê tshim-khik ò-pì ê tsin-lí, sī Siōng-tè ún-tsún tuì bān-mi̍h ê tiong-sim lâu-ji̍p tī lán ê sìⁿ-miā ê.

Tsi̍t ê tsīng-su, bi̍k-sióng

Guá ê lîng ah, tio̍h tshau-liān kap Ki-tok tan-to̍k tsuè-hé. Sìng-king kóng, "tuaⁿ-tuaⁿ ha̍k-sing kap I (Iâ-so͘) tī-teh ê sî, tsiū lóng-tsóng kā in kué-bîng." (Má-khó 4:34) M̄-thang tshai-gî tsit tuāⁿ king-bûn ê tsin-si̍t-sìng, in-uī tuì lí ê sìⁿ-miā lâi kóng iā uē án-ni. Nā-sī lí beh bîng-pi̍k tsit ê tō, tsiū tio̍h tsiong tsìng-lâng tshiáⁿ in lī-khui, tshin-tshiūⁿ Ki-tok só͘ tsuè tsi̍t-iūⁿ (tsham-khó Má-thài 14:22). Hō͘ in "tsi̍t-ê tsi̍t-ê lóng tshut-khì; tsí-ū Iâ-so͘ ka-kī" (Iok-hān 8:9) kap lí tông-tsāi. Lí ū siūⁿ kè sè-kài nā-sī tsí tshun lí tsi̍t-lâng, á-sī tsuân ú-tiū tshun lí tsi̍t-lâng bô?

Ká-sú tsuân-ú-tiū tshun lí tsi̍t-lâng, lí só͘ siūⁿ ê iā tsí-ū "Siōng-tè kap guá ... ! Siōng-tè kap guá ... !" Kim-ji̍t I í-king kap lí tsin tsiap-kūn, kūn kàu tshin-tshiūⁿ tsí-ū lí ê sim kap I ê sim tī kóng-khuah ê khong-kan teh thiàu-tōng tsi̍t-iūⁿ.

Ah, guá ê lîng, tshau-liān hit-tsióng ê tan-to̍k! Tshau-liān tsiong tsìng-lâng kuáⁿ-khui! Tshau-liān lí sim ê an-tsīng! Liān-si̍p hit-siú tsong-giâm ê si-kua, "Siōng-tè kap guá! Siōng-tè kap guá!" Bô hō͘ jīm-hô lâng giap tī lí kap lí teh sio-ián ê thiⁿ-sài ê tiong-kan! I uē tsik-pī lí, I iā uē sià-bián lí, tng lí tan-to̍k tú-tio̍h Iâ-so͘ ê sî! --- George Matheson


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com