《台語荒漠甘泉（全羅版）》

 | | | 轉寄

"Tsuan-sim tè Iâ-so͘"

作者 陳清俊 翻譯 2008.12.21

listen


Tsa̍p-jī ge̍h jī-it (Tsa̍p-jī ge̍h jī-tsa̍p-it ji̍t)

"Guá beh īng i só͘ ta̍h tio̍h ê tuē siúⁿ-sù i, ... in-uī i tsuan-sim tè Iâ-hô-hua." (Sin-bīng-kì 1:36)

Jîn-sing lō͘-tô͘ tiong, ū tsin tsuē tāi-tsì tsin khùn-lân, ài īng tsin tuā ê khuì-la̍t khì tsuè, koh tio̍h siū tsin tuā ê khó͘-thàng, ū-sî ài tuā ê tsing-tsiàn, tsin oh kuat-tīng, khùn-lân tîng-tîng kàu bô-ài khì tsuè. Tsit tsióng ê tāi-tsì khiok uē tuà hō͘ lí tuā ê hok-hūn. Put-kuán lí hù-tshut ê tāi-kè juā tuā, nā bô tsuè, tsiū sit-khì tsit ê hok-hūn.

Tī muí tsi̍t tuāⁿ oh-kiâⁿ ê lō͘, lí uē khuàⁿ tio̍h Tsú ê kha-ìn, I kiò lí iân tsit tiâu lō͘ kiâⁿ, tse sī siū tsiok-hok ê lō͘. Nā bô kiâⁿ tsit ê kiā-kiā koh muá-muá tshì-phè ê lō͘, tsit tsióng hok-khì sī tit buē-tio̍h.

Tī tsiàn-tsing, kap ti̍k-jîn sio-thâi, ài tsiong kiàm pui̍h tshut-lâi, tsiah ū thâi iâⁿ ê khó-lîng. Tsit ê sìng-lī uē tsuè lí it-sing hong-hù ê tsiok-hok. Muí tsi̍t pái lí giâ khí-lâi tāng-tàⁿ, lāi-bīn lóng tshàng-teh uē tit-tio̍h kî-biāu li̍k-liōng ê pì-kuat. --- J.R. Miller

Guá buē uē ka-kī tam-tng,
Hái-íng kín koh kuâiⁿ koh hn̄g,
Bông-bū tà sì-tsiu-uî kú-tn̂g,
Tán lóng buē thiⁿ-kng,
Put-kò, guá tsai guán nn̄g ê, uē sìng-lī tshiùⁿ-kua,
Iâ-so͘ kap guá.

Kiaⁿ-hiâⁿ, sái-sìng-tē, buē-ióng,
Siū thiⁿ-khì kái-piàn íng-hióng,
Kin-ji̍t jia̍t-tshiat, khai-lóng, ū-liōng,
Bîng-ji̍t buē tín-tāng, bô sìn-gióng,
Put-kò, I bô hòng-khì, guán nn̄g ê uē tik-sìng tshiùⁿ-kua,
Iâ-so͘ kap guá.

Guá ê tsûn tī tuā-hái,
M̄-tsai án-tsuáⁿ sái,
Tsóng-sī ū tsi̍t-uī kap guá tông-tsāi,
Tsuè-hé kò, sái, siám hong-thai,
Guá tsai guán nn̄g-ê, beh pîng-an kàu káng-huāⁿ,
Iâ-so͘ kap guá.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com