《台語荒漠甘泉（全羅版）》

 | | | 轉寄

"Kî-tó ê tshù-sū"

作者 陳清俊 翻譯 2008.12.14

listen


Tsa̍p-jī ge̍h tsa̍p-sì (Tsa̍p-jī ge̍h tsa̍p-sì ji̍t)

"I ê ha̍k-sing tsi̍t lâng tuì I kóng, Tsú ah, kà-sī guán kî-tó. ... I tsiū kā in kóng, Lín kî-tó ê sî tio̍h kóng, ... lí ê kok lîm-kàu;" (Lō͘-ka 11:1-2)

Tsú Iâ-so͘ ê tsi̍t ê ha̍k-sing kóng, "Kà-sī guán kî-tó," Tsú ê ba̍k-tsiu ǹg Thiⁿ-pē só͘ tsō hn̄g-hn̄g ê sè-kài. I tsiong íng-uán-ua̍h ê tsuè-āu bo̍k-piau kap Siōng-tè ài lâng tsuè ê it-tshè, saⁿ kiat-ha̍p tsuè tsi̍t-ê, tsiâⁿ tsuè ū-la̍t ê kî-tó sû kóng, " Só͘-í lín tio̍h án-ni kî-tó," (Má-thài 6:9) I só͘ kà-sī ê kî-tó kap lán hiān-tsāi só͘ thiaⁿ ê kî-tó ū juā-tuā ê bô-siâng.

Lán tsiàu lán ê sim-guān kî-tó sī án-tsuáⁿ kî-tó? Lán kóng, Tsú ah, tshiáⁿ sù-hok hō͘ guá, jiân-āu sù-hok hō͘ guá ê ke, guá ê kàu-huē, guá ê siâⁿ-tshī, guá ê kok-ka. Lán tuì lán siōng tshin-kūn ê lâng khai-sí, tsiah tsiām-tsiām ǹg guā-kho͘ khòng-khuah, tsuè-āu tsiah uī Siōng-tè ê kok-tō͘ kap tsuân sè-kài kî-tó.

Tsóng-sī Tsú ê kî-tó sī tuì lâng ê kî-tó kiat-sok ê só͘-tsāi khai-sí, I kà-sī lán sing uī sè-kài kî-tó, tsiah uī lán kò-jîn ê su-iàu kiû, I kà-sī lán tī lán ê kî-tó í-king pau-khuah sè-kài muí tsi̍t tsiu, muí-tsi̍t ê hái-sū, siōng phian-uán ê pō͘-lo̍h muí tsi̍t ê lâng, koh Siōng-tè tuì sè-kài ê hi-bāng, kap tsí-ì lóng kî-tó suah, tsiah uī ka-kī ê lim-tsia̍h kî-tó.

Iâ-so͘ uī lán lâi hi-sing, tī si̍p-jī-kè hù-tshut sîn-sìng koh pó-kuì ê tāi-kè. I án-ni tsuè liáu-āu, kiò lán iā tsiàu án-ni tsuè, kiám ū kè-hūn mah? Tī Siōng-tè ê kok-tō͘ nih ū sió-khuá sîng-tsiū, ū sió-khuá tshin-tshiūⁿ I ê lîng-li̍k ê lâm-lú, lóng it-tīng o̍h tio̍h I kî-tó ê kà-sī. Tsiong Ki-tok ê sū-kang, kuan-sim pa̍t-lâng khǹg tē-it, só͘-ū kò-jîn ê khó-lū, put-kuán sī tuì pún-sin sī juā tiōng-iàu, juā pó-kuì lóng khǹg tī tshù-iàu ê. --- Dr. Francis

"I ê kok iā bô kiông-tsīn," (Lō͘-ka 1:33) á-sī kū ê huan-i̍k pún kóng, "I ê kok bô pian-kài."

Tī kàu-huē ê sū-kang “tuì guā suan-kàu”, m̄-sī ū iā hó, bô iā hó, ê tāi-tsì, in-uī tsit ê sī Tsú Iâ-so͘ siōng iu-sing khó-lū ê. --- Henry Jackson Van Dyke

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com