《台語荒漠甘泉（全羅版）》

 | | | 轉寄

"Kian-sìn put gî"

作者 陳清俊 翻譯 2009.01.04

listen


Tsiaⁿ ge̍h tshue sì. (It ge̍h sì ji̍t)

“Iâ-so͘ kā i kóng, Khì ah, lí ê kiáⁿ ua̍h lah. Hit lâng sìn Iâ-so͘ kā i kóng ê uē, tsiū khì.” (Iok-hān 4:50)

“Kìⁿ-nā lín só͘ kî-tó lâi kiû ê, tio̍h sìn sī í-king tit-tio̍h, tsiū beh kā lín tsiâⁿ.” (Má-khó 11:24)

Ká-sú ū tsi̍t-tsân sū su-iàu tsuan-sim ê kî-tó, tsiū ài kî-tó kàu lí uē sìn Siōng-tè, lí uē huat-tshut bô ké ê o-ló lâi kám-siā Siōng-tè ê tap-ìng. Jû-kó Siōng-tè ê tap-ìng tsi̍t-sî iáu tī tiong-tô͘, iáu buē sîng-tsiū, tshiat-tshiat bô tit tîng-sin kiû Siōng-tè tap-ìng lí ê kî-kiû, in-uī tse piáu-sī lí bô kàu-gia̍h sìn Siōng-tè. Tsit-tsióng bô-sìn ê kî-tó m̄-nā buē pang-tsān lí, huán-tńg sī kiám-tsió á-sī siau-bia̍t lí ê sìn-sim. Tsit-tsióng ê kî-tó tiāⁿ-tio̍h sī tshut-tī giâu-gî á-sī ka-kī ê buē an-sim. “Ū sìn-gióng ê lâng, lāi-sim sī ū tsin-tsiàⁿ ê pîng-an.” (Hi-pik-lâi 4:3)

Uī-sím-mi̍h lâng uē ū sit-khì sìn-sim ê kî-tó nih? In-uī tsiong tsù-ì-tiám hē m̄-tio̍h, hē tī khùn-lân ê só͘-tsāi, suah buē-kì-tit Siōng-tè ê ìng-ún lah. “A-peh-la̍h-hán siūⁿ-tio̍h ka-kī ê sing-khu tshin-tshiūⁿ í-king sí, koh Sat-la̍h ê thai-īn í-king tsua̍t, i ê sìn bô nńg-tsiáⁿ; i khuàⁿ Siōng-tè ê ìng-ún, iā bô tuì m̄-sìn lâi giâu-gî; sìn tsiū ná ióng-kiāⁿ, lâi kui îng-kng Siōng-tè.” (Lô-má 4:19-21) Tse sī hō͘ lán ha̍k-si̍p ê bô͘-huān, tsù-sîn tī Siōng-tè ê ìng-ún, bô khuàⁿ khuân-kíng ê put-lī. “Tio̍h kíng-síng, tio̍h kî-tó, bián-tit ji̍p tī bê-hi̍k.” (Má-thài 26:41) Hi-bōng lán ê kî-tó buē kiám-tsió lán ê sìn-sim, buē ji̍p tī bê-hi̍k, buē hām-lo̍h tī tshì-thàm ê khuan-thò. ---- C.H.P.

Sìn-gióng, sìn-sim, m̄-sī īng kám-kak, īng ba̍k-tsiu, īng lūn-lí ê, tsí put-kò siong-sìn Siōng-tè ê uē. ---- Tsristmas Evans

Tng sim-lāi huân-ló, put-an, tsiū sit-khì sìn-sim; tng ū tsin-tsiàⁿ sìn-sim ê sî, huân-ló, put-an tsū-jiân bô khì. ---- George Mueller

Sìn-sim buē tàng tī sūn-kíng ê sî lâi siōng-tsìn. Siōng-tè só͘ ìng-ún ê, ū-sî ū tshì-thàm-ê lâi tshì-giām. Tsi̍t-ê tsuí-siú king-kè liáu tuā hong-hō͘, i tsiū ū sìn-sim tuā siaⁿ kóng, “Tāi-ke ah, lín tio̍h an-sim; in-uī guá sìn Siōng-tè, tāi-tsì tsiàu I só͘ kā guá kóng ê.” (Sù-tô͘ Hîng-tuān 27:25)
Uân-tsuân sìn-khò I,
Put-kuán, ji̍t-á-mî,
Lîng, hûn, thé, á-sī siⁿ-á-sí,
I īng tì-huī, tsû-ài kuàn-kò͘ lí.
Tsuân-jiân o͘-àm tiong huat-hiān tsi̍t-tiám-tiám-á kng ê tshiⁿ
Iā sī I ê sìng tsí-ì.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com