《台語荒漠甘泉（全羅版）》

 | | | 轉寄

"An-uì"

作者 陳清俊 翻譯 2009.01.11

listen

Tsiaⁿ ge̍h tsa̍p-it (It ge̍h tsa̍p-it ji̍t)

"Lín ê Siōng-tè kóng, Lín tio̍h an-uì, an-uì Guá ê peh-sìⁿ." (Í-sài-a 40:1)

An-uì lâng sī sian-ti Í-sài-a ê tsit-hūn. Sè-kan ta̍k só͘-tsāi lóng ū siong-sim, sim-lîng phuà-tshuì ê lâng. Tng lí ài khì an-uì lâng ê sî, lí ài tāi-sing siū hùn-liān. Tsit tsióng ê hùn-liān sī ài tsin tuā ê tāi-kè, tsiū-sī lí pún-sin ài king-li̍k tio̍h tshin-tshiūⁿ hiah ê siong-sim, lâu ba̍k-sái, lâu-huih ê tsîng-hîng. Tuì án-ni, lí ê sìⁿ-miā tsiah uē tsiâⁿ-tsuè pīⁿ-īⁿ, thang tsiap-siū an-uì lâng, ū sîn-sìng kang-hu ê hùn-liān. Lí ê siū-siong, Thiⁿ-pē, uí-tāi ê i-sing, jû-hô i-tī lí, ia̍h lí tuì I só͘ o̍h ê, thang lâi i-tī hiah ê siū-siong ê lâng. Lí kiám tsai lí uī-sím-mi̍h ài siū tio̍h tsuē-tsuē ê iu-siong, thòng-hué ê sū mah? Tī koh lâi ê tsa̍p-nî, lí beh tú-tio̍h tsuē-tsuē lâng kap lí siāng-khuán siū tio̍h tsit hō ê kan-lân, lí thang hun-hióng lí ê king-li̍k, lí ê siū i-tī, siū an-uì. Thiⁿ-pē án-ni tuì-thāi lí, iā beh án-ni tuì-thāi in, lí ê tsin-sîng ê sim-sîn hō͘ in tit an-uì, sit-bōng ê im-iáⁿ piàn-tsuè hi-bōng ê kng-liōng. Hit-sî lí beh liáu-kái Siōng-tè ê hùn-liān, tī lí ê sing-ua̍h tiong ū tsiah-ni̍h pó-kuì ê king-li̍k kap pang-tsān.

Siōng-tè ê an-uì m̄-nā-sī lán tit-tio̍h an-uì, iā sī piàn-tsuè tsi̍t ê thang an-uì lâng ê lâng. --- John Henry Jowett


Muî-kuì hio̍h ài buâ, tuî tshuì-tshuì,
Phang-bī tsiah uē huat-tshut suàⁿ-khui.

Siū kuaiⁿ hûn-tshiok sim phuà-tshuì,
Kua-siaⁿ tsiah uē tshiùⁿ tshut tshuì.

Iú-tsîng ba̍k-sái, Ài-tsîng lâu-huih,
Sim tsiah tshim-tshim kám-tshiok ko-kuì.

Kiám kuì-tiōng mi̍h lóng ài án-ni huí?
Kiám ài siū-siong, tn̄g-si̍t tsiah lī-khui?

Khak-si̍t, buâ-tshuì ê ji̍t, siū kuaiⁿ ê mî,
Siong-hûn luí-luí iā kā tsi̍h,
Kiâⁿ tsio̍h-thâu lō͘ phòng-pha ê sî,
Lóng sī hok-khì!


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com