《台語荒漠甘泉（全羅版）》

 | | | 轉寄

"Tshut tī Siōng-tè"

作者 陳清俊 翻譯 2009.02.01

listen

Jī ge̍h tshue-it (Jī ge̍h it ji̍t)

"Iâ-hô-hua án-ni kóng, in-uī tsit ê tāi-tsì tshut tī Guá." (I Lia̍t-ông-kì 12:24)

Jîn-sing tsin tsuē sū put-jû-ì, sī Siōng-tè ê thiàⁿ àm-tiong lâi an-pâi. --- C.A. Fox

Guá ê kiáⁿ ah, kin-á-ji̍t ū tsi̍t ê sìn-sit hō͘ lí. Tī lí ê hīⁿ-khang piⁿ suè-suè siaⁿ tuì lí kóng. Po̍k-hong ê hûn iā uē huat-tshut kng-liōng, lí só͘ kiâⁿ khi-khu ê lō͘ iā uē piàn pîⁿ-tháⁿ. Tshiáⁿ lí kì tī sim-lāi, ià-siān tó lo̍h-khì khùn ê sî khǹg tī tsím-thâu ē, tsiū-sī tsiah ê sū lóng "tshut tī Guá".

Lí kiám tsai lí só͘ kuan-sim ê, iā sī guá teh kuan-sim, "huān-tio̍h lín ê, sī huān-tio̍h Guá ba̍k-tsiu-tiong ê tông-tsú." (Sat-ka-lī-a 2:8) "Guá khuàⁿ lí tsuè pó-puè, tsuè tsun-kuì," (Í-sài-a 43:4) Só͘-í guá ki̍k-tuā huaⁿ-hí ài kà lí.

Guá ài lí tsai, tng lí siū tshì-thàm ê sî, tuì-ti̍k "tshin-tshiūⁿ kín-lâu ê hô-tsuí," lâi, Tsit ê sū sī ‘tshut-tī guá.’ Lí ê luán-jio̍k su-iàu guá ê li̍k-liōng, lí ê an-tsuân sī tsāi-tī guá uī lí lâi tsing-tsiàn, té-khòng.

Lí ê tshù-kíng tsin khùn-lân mah? Lí ê piⁿ-á lóng sī buē thé-liōng lí ê lâng, in iā bô mn̄g lí ê ì-sù, tsiū kā lí sak tī tsi̍t pîng, m̄ tshap lí. Tse iā sī "tshut-tī guá." Guá sī tsiáng-kuán khuân-kíng ê Siōng-tè. Lí tú-tio̍h tsit-khuán tē-pō͘, m̄-sī ngó͘-jiân ê, sī guá hō͘ lí án-ni.

Lí kiám ū tuì guá kiû khiam-pi mah? Lí hiān-sî ê tshù-kíng tsiū-sī ha̍k-si̍p khiam-pi siōng-hó ê sî. Lí ê khuân-kíng kap lí tsiu-uî ê lâng sī īng lâi uân-sîng guá ê tsí-ì.

Lí ū kim-tsîⁿ būn-tê mah? Tse iā sī "tshut-tī guá." Lí ê tsîⁿ-tsâi la̍k tī guá ê tshiú, ài ha̍k-si̍p uá-khò guá, guá tsiah ū bô-thîng ê kiòng-ìng, hō͘ lí só͘ su-iàu ê it-tshè tshiong-tsiok. (Hui-li̍p-pí 4:19) Guá beh īng lí lâi tsìng-bîng, bô lâng uē kóng, "lín tī tsit ê sū m̄-sìn Iâ-hô-hua lín ê Siōng-tè;" (Sin-bīng-kì 1:32)

Lí ū iu-siong, huân-ló mah? Tse sī "tshut tī guá." Guá pún-sin "siū tsuē-tsuē khó͘-thàng, siông-siông tú-tio̍h iu-būn;" (Í-sài-a 53:3) Hō͘ lí buē thang tit-tio̍h sè-kan ê an-uì, hō͘ lí uē tsuán-hiòng guá, thang tit-tio̍h "íng-uán ê an-uì kap hó ê ǹg-bāng." (Ṳ Thiap-sat-lô-nî-ka 2:16) Lí hi-bāng uē uī guá tsuè tuā sū, khiok in-uī phuà-pīⁿ tó tī tshn̂g ni̍h. Tse sī "tshut-tī guá", in-uī lí bô îng, bô sî-kan lâi gióng-bōng guá, guá siūⁿ beh tsiong tshim-ò ê tsin-lí kà-sī lí. "Hiah ê kan-taⁿ khiā teh tán, iā sī tsi̍t tsióng sū-hōng." Guá ū tsin-tsuē uí-tāi ê kang-lâng, in ê sin-thé buē-thang sū-hōng, khiok in tsai īng siōng-kiông ê bú-khì, li̍k-liōng, tsiū-sī "kî-tó" lâi sū-hōng.

Kin-á-ji̍t guá tsiong tsi̍t-pue sìng-iû kau hō͘ lí, tshut-tsāi lí beh īng juā-tsuē. Guá ê kiáⁿ ah, tsiong sìng-iû buah tī muí tsi̍t ê sin khuân-kíng tíng, buah tī muí tsi̍t-kù siong lí ê uē-gú tíng, buah tī lí ê bô nāi-huân tíng, buah tī lí ê luán-jio̍k ê só͘-tsāi. Lí nā tsai huân-sū "tshut-tī guá", thòng-khó͘ tsiū bô khì lah. --- Laura A. Barter Snow

Kiù-tsú kóng, "Tse sī tshut-tī guá"
I uan sin lâi tsim guá, kiâⁿ uá,
Tshuā lí ê sī thiàⁿ lí, kā lí sioh,
Thang nāi-sim tī guá tsia an-hioh.
Thiⁿ-pē tsai lí ê su-iàu,
Khó-lîng hiān-tsāi m̄-tsai, buē-hiáu.
Bo̍h-tit uī sit-khì ê mi̍h iu-siong,
Guá beh sù lí siōng-hó ê hūn-liōng.

Guá īng ba̍k-sái lâi khún-kiû,
Tsú ah, sià-bián guá, guá teh bo̍k-bo̍k-siû,
Guá kiâⁿ ê lō͘ bô kan-lân, oh-siū,
Sī tè Lí ê kha-pō͘ kiâⁿ, khan guá tshiú.
Muí tsi̍t hāng sū lóng sī hó,
I ê un-huī kàu guá kiû-thó,
Guá beh tuā-siaⁿ kóng-kò
"Siōng-tè ê lō͘ íng-uán sī siōng hó."


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com