《台語荒漠甘泉（全羅版）》

 | | | 轉寄

"Siōng-tè ê uē"

作者 陳清俊 翻譯 2009.01.25

listen

Tsiaⁿ ge̍h jī-gō͘ (It ge̍h jī-tsa̍p-gō͘ ji̍t)

"Lí ê thuî, Lí ê kuáiⁿ, an-uì guá." (Si-phian 23:4)

Tī guán lāu-pē ê tshù, piah-lô͘ piⁿ ê tsi̍t ê tû-á, ū siu-tsông guán tau kuí-nā tāi lâng só͘ īng kè ê kuáiⁿ-á. Muí huê guá tńg-khì kū tshù, lāu-pē kap guá beh tshut-khì sàn-pō͘ ê sî, tsiū khui tsit ê tû-á, kíng tsi̍t ki sik-ha̍p ê kuáiⁿ-á tuà tshut-mn̂g. Guán teh kíng ê sî, guá tsiū siūⁿ tio̍h "Siōng-tè ê uē tsiū-sī guá ê kuáiⁿ."

Tsiàn-tsing tiong, guán king-li̍k tsuē-tsuē ê hue-sim sit-tsì kap guî-hiám, "I m̄-kiaⁿ pháiⁿ siau-sit; I ê sim kian-kò͘, uá-khò Iâ-hô-hua." (Si-phian 112:7) piàn-tsuè guá tō͘-kè o͘-àm sî ê tshiú-kuáiⁿ.

Guán ê kiáⁿ kè-sin ê sî, siong-sim kàu beh tshuì-khì. "Kui-mî sui-jiân ū thî-khàu, tsá-khí sî tsiū ū huaⁿ-hí" (Si-phian 30:5) tsiâⁿ-tsuè tsi-tshî guán ê kuáiⁿ.

Ū tsi̍t pái in-uī phuà-pīⁿ, lī-khui tshù tsi̍t-nî kú, m̄-tsai sī-m̄-sī uē koh tò-tńg-lâi hue-ho̍k kang-tsok, guá kíng "Iâ-lī-bí 29:11" tsuè guá ê kuáiⁿ "Iâ-hô-hua kóng, Guá tsai Guá tuì lín só͘ tsûn ê ì-sù, sī siúⁿ-sù pîng-an ê ì-sù, m̄-sī kàng tsai-ē; beh hō͘ lín bé-kíng ū ǹg-bāng." Tsit ki kuáiⁿ bô hō͘ guá sit-bāng.

Muí-pái tú-tio̍h guî-ki, huâi-gî, iu-lū, lâng ê phuàⁿ-tuān í-king bô lō͘-īng, guá tsiū īng king-bûn tsuè kuáiⁿ, "Lín ê tit-tio̍h kiù tsāi-tī ua̍t-tò-tńg kap an-hioh;" (Í-sài-a 30:15) Tī guî-kip, bô sî-kan khì su-khó, á-sī hîng-tōng ê sî, tsiū kíng "uá-khò I ê lâng tik-khak bô tio̍h-kip." (Í-sài-a 28:16) Tsit ki kuáiⁿ buē bat gō͘-sū. --- Abbott Benjamin Vaugham, tuì "Hiòng tsîng khuàⁿ"

Lō͘-tik Má-ting (Martin Luther) ê bó͘ kóng, "Siōng-tè nā bô hō͘ guá siū khó͘, guá íng-uán buē bîng-pi̍k Si-phian tiong tsuē-tsuē king-bûn ê ì-sù, buē bîng-pi̍k khùn-kíng sī tuì guá ū hó-tshù, iā buē liáu-kái lâng ê sim-lîng án-tsuáⁿ ūn-tsok, iā buē tsai ki-tok-tô͘ ing-kai án-tsuáⁿ sing-ua̍h, án-tsuáⁿ kang-tsok." Siōng-tè ê kuáiⁿ tshin-tshiūⁿ sió-ha̍k lāu-su siōng-khò só͘ īng ê kàu-tik, kí o͘-pang ê jī kà ha̍k-sing ài tsù-ì tha̍k. Siāng-khuán Siōng-tè kí-tshut tsuē-tsuē ū kè-ta̍t ê kong-khò hō͘ lán, nā-bô, lán lóng buē khì o̍h.

Siōng-tè sù lán kuáiⁿ, iā sù lán thuî.
"Lí ê mn̂g-kông sī thih-ê, tâng-ê; Lí ê ji̍t-tsí tsáiⁿ-iūⁿ, lí ê khuì-la̍t iā beh án-ni." (Sin-bīng-kì 33:25)
Lán tsai Siōng-tè nā tshe lán kiâⁿ khi-khu ê lō͘, tsiū-uē hō͘ lán ū tshin-tshiūⁿ tâng, thih hiah ióng ê uê. I uē kā lán tsong-pī tshiong-hun tsiah tshut-huat. --- Alexander Maclaren

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com