《台語荒漠甘泉（全羅版）》

 | | | 轉寄

"Siau-ki̍k kap tsik-ki̍k"

作者 陳清俊 翻譯 2009.02.22

listen

Jī ge̍h jī-jī (Jī ge̍h jī-tsa̍p-jī ji̍t)

"Tsáiⁿ-iūⁿ kóng, lí nā uē ah? ū sìn ê lâng, ta̍k hāng lóng uē." (Má-khó 9:23)

Tsi̍t ê tshing-liân lâng tī tsi̍t pái ê tsū-huē tiong thê tshut tsit ê būn-tê, “Guá tsuáⁿ-iūⁿ tsiah uē tuì Tsú hia tit-tio̍h guá só͘ su-iàu ê pang-tsān?” Tsi̍t ê khó-ài ê lāu o͘-lâng tsí-bē, huê-tap kah tsiok hó.

Tsit-uī tsí-bē īng i só͘ ti̍k-iú ê tsu-sè īng tshiú kí i kóng, “Lí ài siong-sìn I í-king pang-tsān lí, pang-tsān tsū-jiân tsiū lâi lah.” Tuā pō͘-hūn ê lâng sī kiû, khiok bô siong-sìn só͘ kiû ê, uē uân-sîng, huán-tńg khì siūⁿ kî-thaⁿ ê pān-huat lâi pang-tsān Siōng-tè. Iā kiò pa̍t-lâng khì pang-tsān I, jiân-āu tio̍h-kip teh khuàⁿ Siōng-tè án-tsuáⁿ iáu m̄ tsuè.

“Sìn” sī tuì Siōng-tè kóng “ē sái” kap “à-men” tsiū kàu-gia̍h. Kî-thaⁿ ê lóng hòng-sim hō͘ Siōng-tè khì uân-sîng I ê kang. Sìn-sim sī “Tio̍h tsiong lí ê tāi-tsì kau-tài Iâ-hô-hua; koh uá-khò I, I beh hō͘ i tsiâⁿ.” (Si-phian 37:5) --- tuì “Tī tē ná tī thiⁿ”

Kán-tan sìn I ê uē,
Kám-siā kî-tó tit tio̍h huê,
Tsú ìn-tap guá só͘ thê,
Guá sìn I ê thê-hê.

Tsik-ki̍k ê sìn-sim sī tuì tsi̍t ê sīm-tsì iáu buē si̍t-hiān ê ìng-ún tsûn kám-siā, siong-sìn Siōng-tè ê ìng-ún ná tshin-tshiūⁿ tshiú the̍h tiâu hiān-kim hiah khó-khò ê khuán. --- Matthew Henry

Siau-ki̍k ê sìn sī tsiap-siū Siōng-tè ê uē, bô hîng-tōng.
Tsik-ki̍k ê sìn khai-sí khì tsuè, lâi ìn-tsìng lóng-tsóng.

Siau-ki̍k ê sìn-sim kóng, “Guá sìn, Siōng-tè ê uē lóng sī tsin, guá tsai I buē kóng I só͘ buē, á-sī m̄-guān, tsuè ê kang. I kiò guá hiòng tsîng kiâⁿ, tsóng-sī guá khuàⁿ tio̍h thâu-tsîng sī bô lō͘. Hô-tsuí nā pun-khui, guá beh kín-kín ji̍p Ka-lâm tē. Tsú tuì guá kóng, “khí-lâi, the̍h lí ê pho͘-á tńg-khì.” iā thiaⁿ tio̍h “tshun tshut lí ko-ta ê tshiú!” Tng guá thé-la̍t khah tsuē ê sî, guá tsai guá it-tīng uē khiā khí-lâi. Tng guá ū guân-khì ê sî, guá uē khin-sang lâi īng guá ê tshiú. Tio̍h, guá tsai “Siōng-tè sī tsuân-lîng,” tsin guān-ì sîng-tsiū tse it-tshè. Guá siong-sìn I ê muí tsi̍t ê ìng-ún beh tī guá ê sin-tsiūⁿ si̍t-hiān.”

Tsik-ki̍k ê sìn-sim kóng, “Guá siong-sìn, guá beh lia̍h-tiâu tse ìng-ún, guá tshim-sìn Siōng-tè ê muí tsi̍t ê ìng-ún beh si̍t-hiān. Guá káⁿ tuā pō͘ ta̍h ji̍p hô tiong, uē huat-hiān hô-tsuí uī guá lâi pun-khui. Hó-táⁿ hiòng-tsîng khì tit hit ê tē, bô ū sím-mi̍h uē tsó͘-tòng guá ê tsìn-tián. Tio̍h, guá thiaⁿ I ê bīng-līng, guá khiā khí-lâi, it-ti̍t hiòng tsîng, muá-sim huaⁿ-hí. Guá ko͘-ta ê tshiú tsi̍t ē tshun tshut, tsiū uē uân-tsuân. I siú ìng-ún, guá iáu ū sím-mi̍h guān-bōng kap su-kiû? Bô kiû khuàⁿ tio̍h sîn-jiah, iā bô piān-lūn, in-uī guá tsai “Siōng-tè lóng uē” tsin guān-ì sîng-tsiū tse it-tshè. Guá siong-sìn muí ê ìng-ún tsit sî lóng beh si̍t-hiān.”

Siau-ki̍k ê sìn sī tī tshut-ji̍t ū kng ê sî o-ló. Tsik-ki̍k ê sìn tī o͘-àm-mî iā o-ló sìn-khò. Lí ê sìn sī tó tsi̍t hō?


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com