《台語荒漠甘泉（全羅版）》

 | | | 轉寄

"Tsiàu Lí ê ìng-ún tsuè"

作者 陳清俊 翻譯 2009.03.08

listen

Saⁿ ge̍h tshue-pueh (Saⁿ ge̍h pueh ji̍t)

"tsiàu Lí só͘ kóng lâi kiâⁿ. Guān Lí ê miâ íng-uán kian-kò͘," (I Lia̍t-tāi-tsì-lio̍k 17:23,24)

Tsin-sîng ê kî-tó sī tsi̍t ê siōng siū hok-khì ê. Lán siông-siông kî-tó iau-kiû ê sū bô sím-mi̍h kū-thé ìng-ún, só͘-í lán buē thang khíng-tīng só͘ kiû ê sī-m̄-sī ha̍p tī Tsú ê tsí-ì, ti̍t-kàu kian-tshî tsi̍t-tsām ê kî-tó tsiah uē bîng-pi̍k. Kàu tsi̍t ê sî-tsūn, lán uân-tsuân liáu-kái só͘ kiû ê, ha̍h tī Siōng-tè ê tsí-ì. Thiⁿ-pē siông-siông ín-tshuā lán tī sìng-king tiong khì suán-ti̍k, khì kiû tsi̍t ê ìng-ún, tsin kín lán beh tshing-tshing tshó-tshó huat-hiān tī sìng-king lāi ū tsi̍t ê sìn-sit sī hō͘ lán ê. Tsit-sî, lán thang muá-muá tsū-sìn kóng, "Tsiàu Lí só͘ kóng ê khì tsuè."

Tng lí tsiong lí ê tshiú àn-huāⁿ tī sìng-king tiong Thiⁿ-pē ê tsi̍t ê ìng-ún ni̍h, jiân-āu tshíng-kiû I khì si̍t-hiān; sè-kan bô ū pí tse khah suí, khah ū-la̍t, khah khó-khò. Án-ni tsuè, bô tú-tio̍h khó͘-thàng, tsing-tsha, tsí sī thê tshut tsi̍t tiuⁿ tsi-phiò, iau-kiû tuī-hiān. Kán-kán tan-tan kun-kù só͘ ìng-ún iau-kiû si̍t-hiān, tuì só͘ kiû ê, bô huâi-gî, iā bô hâm-hô͘. Nā-sī só͘ kiû ê lóng sī tsiah-ni̍h bîng-khak, lâng beh tuì kî-tó tsiū tuā-tuā ū tshù-bī lah. Thê tshut tsi̍t nn̄g ê kū-thé ê iau-kiû, pí tsuè jī-saⁿ-tsa̍p ê hâm-hâm hô͘-hô͘ ê tshíng-kiû ke tsin hó. --- F.B. Meyer

Sìng-king tiong muí tsi̍t ê ìng-ún tsiū sī Siōng-tè ê muí tsi̍t tiuⁿ phue, kà-sī lán thang ǹg I thê-tshut tse ha̍p-lí ê tshíng-kiû, "Tsiàu Lí ê só͘ kóng khì tsuè". Tsō-bu̍t-tsú buē khi-phiàn lán tsiah-ê siong-sìn I ê sìn-si̍t ê siū-tsō-bu̍t. Uāⁿ-uē kóng, Lán ê Thiⁿ-pē íng buē tuì I ê kiáⁿ-jî si̍t-giân, bô tsiàu só͘ kóng ê uē khì tsuè.

"Kiû Lí kì-tit tuì Lí ê lô͘-po̍k só͘ ìng-ún ê uē, in-uī Lí bat hō͘ guá ū ǹg-bāng." (Si-phian 119:49) Tse sī tsi̍t ê tsin phó͘-thong ê tshíng-kiû, ū nn̄g ê lí-iû, in-uī he sī "Lí ê uē." Lí kiám uē si̍t-giân? Ká-sú Lí bô beh si̍t-tsiān, á-bô Lí tong-tsho͘ uī-hô beh kóng neh? Lí kiò guá ǹg-bāng, Lí kiám uē hō͘ guá sim-lāi ê ǹg-bāng sit-khì mah? --- Tsarles H. Spurgeon

"Sìn tsiū ná ióng-kiāⁿ, lâi kui îng-kng Siōng-tè;" (Lô-má 4:21)

Siōng-tè íng-íng buē-piàn ê sìn-si̍t hō͘ sìng-king ê ìng-ún "ū pó-puè kap ki̍k tuā." (Ṳ Pí-tik 1:4) Sè-kan lâng ê ìng-ún siông-siông tshin-tshiūⁿ tsi̍t tiuⁿ tsuá jî-í, siông-siông buē thang tuī-hiān, hō͘ lâng siong-sìn. Tān-sī Siōng-tè tsū tshòng-tsō sè-kài í-lâi, I m̄ bat tuì it-sim khò I ê kiáⁿ-jî "kóng-uē bô sǹg-siàu."

Ah! Tsi̍t ê khó-lîn ê ki-tok-tô͘ tī thòng-khó͘ ê àm-mî, khiā tī ìng-ún ê mn̂g tsîng, khiok m̄-káⁿ khì tsūn hit ê mn̂g-pìⁿ-thâu lâi khui mn̂g, bô tshin-tshiūⁿ kiáⁿ-jî hòng-sim tsìn-ji̍p i pē ê tshù lâi hioh-khùn, sī juā-tsiâⁿ siong-pi ê sū. --- Gurnal

Thiⁿ-pē ê muí tsi̍t ê ìng-ún lóng sī kiàn-li̍p tī sì ki thiāu-á. Tsîng nn̄g ki thiāu tsiū-sī I ê kong-gī kap sìng-kiat. Tse íng-uán bô iông-ún I khi-phiàn lán. Tē saⁿ ki thiāu sī I ê un-tián á-sī jîn-tsû, sī hō͘ I bô buē-kì-tit. Tē sì ki thiāu sī I ê tsin-si̍t, hō͘ I buē piàn-king. Só͘-í I beh tsiâⁿ I muí tsi̍t ê só͘ ìng-ún.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com