《台語荒漠甘泉（全羅版）》

 | | | 轉寄

"Siōng-tè ê sî-kan"

作者 陳清俊 翻譯 2009.03.22

listen

Saⁿ ge̍h jī-jī (Saⁿ ge̍h jī-tsa̍p-jī ji̍t)

"Kè sì-tsa̍p nî, tī Se-nái suaⁿ ê khòng-iá, tshì-phè hé-iām ê tiong-kan, ū thiⁿ-sài tuì i hián-hiān. ... Tsú kā i kóng, lí só͘ khiā ê uī sī sìng-tuē. Guá ê peh-sìⁿ tī Ai-ki̍p, guá si̍t-tsāi khuàⁿ-kìⁿ in ê khùn-khó͘, ia̍h thiaⁿ-kìⁿ in ê thó͘-khuì, tsiū kàng-lîm lâi kiù in; taⁿ lí lâi, guá beh tshe lí khì Ai-ki̍p." (Sù-tô͘ hīng-tuān 7:30,33-34)

Īng sì-tsa̍p nî lâi tsún-pī tsi̍t ê tuā sù-bīng, sī sǹg tsin-tn̂g ê sî-kan. Siōng-tè ê iân-tshiân, pīng m̄ sī bô teh tshái-tshú hîng-tōng. I tsún-pī tsip-hîng jīm-bū ê lâng, iā hō͘ li̍k-liōng sîng-si̍k. Jiân-āu sî-kan tsi̍t ē kàu, lán tsiū ài ióng-kám khiā tshut-lâi, tsip-hîng só͘ kau-thok ê jīm-bū. Liân Ná-sat-li̍k lâng Iâ-so͘ iā ún-ba̍t saⁿ-tsa̍p nî, hō͘ I ū kàu-gia̍h ê tì-huī tsiah khai-sí I ê sū-kang. – John Henry Jowett

Thiⁿ-pē bô kuáⁿ-kín tsuè. I īng tsin-tsuē nî ê sî-kan tsún-pī hiah ê I beh tuā-tuā sú-iōng ê lâng. M̄ bat siūⁿ kóng tsún-pī ê sî-kan siuⁿ tn̂g, siuⁿ bô-liâu.

Siū-khó͘ tiong siōng khùn-lân ê tsiū-sī sî-kan ê būn-tê. Té-té ê thòng-khó͘ iông-ī jím-siū, iông-ī jím-nāi tsiū kè-khì. Tsóng-sī pi-siong nā-sī tsi̍t nî koh tsi̍t nî thua lo̍h-khì, tîm-tāng ê thòng-khó͘ tsi̍t kang kè tsi̍t kang bô-bāng kè-sio̍k lo̍h-khì, sim-lîng beh sit-khì li̍k-liōng. Nā bô Siōng-tè ê un-tián, it-tīng beh tîm lo̍h tī tsua̍t-bāng thòng-khó͘ tiong.

Iok-sik king-kè kú-tn̂g ê khó-giām, Thiⁿ-pē iā beh tsiong tsit tsióng ê kà-sī tn̂g-tn̂g tshim-tshim ìn tī lán ê sim-lāi. "I beh tsē-teh, tshin-tshiūⁿ thuàn-liān gûn hō͘ i tshing-khì-ê." (Má-la̍h-ki 3:3) I tsai tshing-khì thuàn-liān só͘ su-iàu ê sî-kan juā kú. Thiⁿ-pē tshin-tshiūⁿ tsi̍t ê kim-tshiūⁿ, tī jia̍t-jia̍t hé lāi ê kim iûⁿ kàu khuàⁿ tio̍h ka-kī ê hîng-siōng, tsiah beh tsiong hé thîng-tsí.

Kin-á-ji̍t, lán khó-lîng bô khuàⁿ-tio̍h Thiⁿ-pē tsiong lán "khǹg tī I ê tshiú ê tì-ìm ē" (Í-sài-a 49:2), só͘ bí-hó ê kè-uē ê tsuè-āu kiat-kó. Khó-lîng beh am-khàm tsin-kú, sī beh hō͘ lán ê sìn-sim kiàn-li̍p tī Thiⁿ-pē pó-tsō ê pó-tsìng ē. In-uī I ê pó-tsìng, lán thang an-jiân thìng-hāu hit ji̍t ê lâi-lîm, ū thiⁿ ê huaⁿ-hí kóng, "Bān hāng sū saⁿ-kap lâi hō͘ thiàⁿ Siōng-tè ê lâng tit-tio̍h lī-ik." (Lô-má 8:28)

Tshin-tshiūⁿ Iok-sik, lán ing-kai koh-khah kín-sīn khuàⁿ-tiōng tī tse khó͘-lān ha̍k-hāu só͘ o̍h ê kong-khò, m̄-sī tsù-ba̍k tī tit-kiù ê sî-kan tíng. Muí ê kong-khò lóng ū guân-in, lán nā tsún-pī hó, tsín-kiù tsiū beh kàu lah. Tsóng-sī lán ài liáu-kái, lán nā bô tāi-sing o̍h tsiah ê khó͘-lān ê kong-khò, tsiū put-phuè tam-jīm khah kuâiⁿ ê tsit-bū. Thiⁿ-pē sī uī-tio̍h lán tsiong-lâi ê sū-hōng, kap khah-tsuē ê tsiok-hok lâi teh kàu-io̍k lán. Nā-sī lán í-king ū tsu-keh tsē tī pó-tsō, sî-kan tsi̍t ē kàu, jīm-hô ê sū-bu̍t lóng tsó͘-tsí buê tiâu.

M̄ thang tuì Siōng-tè tshiúⁿ sî-kan, tshiúⁿ bîn-á-tsài, hō͘ I ū sî-kan tuì lí kóng-uē, tuì lí hián-bîng I ê tsí-ì. I buē iân-tshiân, lí ài ha̍k-si̍p thìng-hāu.

I buē siuⁿ bān, sím-mi̍h sî siōng hó, I tin-sioh,
Bô tit kiaⁿ, tán I lâi, tsīng-sim an-hioh.

Íng-uán m̄ thang tio̍h-kip, tsáu tī Siōng-tè ê thâu-tsîng. Ha̍k-si̍p tán-thāi I só͘ tīng ê sî-kan, bió-tsiam, hun-tsiam, sî-tsiam lóng beh tsí-hiòng tsiah ê hîng-tōng ê khak-si̍t sî-tsūn.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com