《台語荒漠甘泉（全羅版）》

 | | | 轉寄

"Siōng-tè hō͘ i tuā-tsâng"

作者 陳清俊 翻譯 2009.03.29

listen

Saⁿ ge̍h jī-káu (Saⁿ ge̍h jī-tsa̍p-káu ji̍t)

"Tshì-siūⁿ suaⁿ-ni̍h ê pik-ha̍p-hue, tsáiⁿ-iūⁿ tuā tsâng." (Má-thài 6:28)

"Tsin-kú í-tsîng, ū tsi̍t ê siu-tō-sū su-iàu kaⁿ-ná-iû, i tsìng tsi̍t-tsâng kaⁿ-ná tsai. Tsìng liáu-āu, i kî-tó kóng, "Tsú ah, guá ê tshiū su-iàu hō͘, hō͘ i ê kun ū tsuí khip-siu, thang tuā-tsâng, tshiáⁿ lo̍h tsi̍t-tsūn bô tsin tuā ê hō͘." Kó-jiân Tsú ū hō͘ i lo̍h-hō͘ bô tuā iā bô suè, tú-tú hó-hó ê hō͘. Liáu-āu, siu-tō-sū koh kî-tó kóng, "Tsú ah, guá ê tshiū su-iàu ji̍t-kng." Kó-jiân koh ū un-luán ê ji̍t-kng lâi tsiò. "Tsú ah, hiān-tsāi su-iàu kàng sng, hō͘ i uē kiat-si̍t ióng-kiāⁿ." Kó-jiân koh ū sng, lóng tsiàu I só͘ kiû ê. Tsóng-sī tsit tsâng kaⁿ-ná tshiū bô kú tsiū sí-khì.

Siu-tō-sū tī i ê siu-tō-sik kā līng-guā tsi̍t ê siu-tō-sū kóng-khí tsit ê kî-kuài ê king-giām. I thiaⁿ-liáu tsiū kóng, " Guá mā tsìng tsi̍t-tsâng suè-suè ê tshiū, lí khuàⁿ, i hiān-tsāi tuā kah tsiah-nih hó-sè! Guá sī tsiong tshiū uân-tsuân kau-thok hō͘ Siōng-tè. Tshiū sī I tshòng-tsō ê, tshiū su-iàu sím-mi̍h, I pí guá khah tshing-tshó. Guá bô hō͘ Siōng-tè jīm-hô ê hān-tsè á-sī tiâu-kiāⁿ, kan-nā kî-tó kóng, "Tsú ah, kiû Lí kàng i só͘ su-iàu ê, put-kuán sī po̍k-hong, á-sī ji̍t-kng, hong, hō͘, á-sī sng-tàng. I sī Lí tshòng-tsō, Lí siōng tshing-tshó i ê su-iàu."

Sī, pàng hō͘ I tshú-lí, koh khin-sang,
Pik-ha̍p-hue lóng sī án-ni tuā-tsâng.
In kè-sio̍k tuā-tsâng,
Tī lo̍h-hō͘ tiong tuā-tsâng,
Tī ū lō͘-tsuí iā saⁿ-tâng,
Tī àm-mî o͘-àm tiong tuā-tsâng,
Tī kng-bîng ji̍t-tsiò ē, mā saⁿ-tâng,
In it-ti̍t teh tuā-tsâng.

Sī, pàng hō͘ I tsuè,
Lí sī I ê pó-puè,
Lí uē tsai, bián kái-sueh,
Iâⁿ-kè pik-ha̍p-hue,
Á-sī seh-ni̍h ê sím-mi̍h khuán hue,
Só͘ su-iàu ê, kî-tó I tsai-puê,
Hòng-sim hō͘ I khì tsi-phuè,
I tik-khak tsiàu-kò͘ buē sî-thuè,
Lí, lí tsai, "I uē.”


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com