《台語荒漠甘泉（全羅版）》

 | | | 轉寄

"Hi-sing lâi huat kng"

作者 陳清俊 翻譯 2009.04.26

listen



Sì ge̍h jī-la̍k (Sì ge̍h jī-tsa̍p-la̍k ji̍t)

"Guá tsin-tsiàⁿ khuàⁿ bān sū tsuè sún-hāi, in-uī guá lia̍h bat guá ê Tsú Ki-tok Iâ-so͘ tsuè tē it hó." (Hui-li̍p-pí 3:8)

Huat kng lóng su-iàu tāi-kè, Kng ê huat-tshut sī in-uī sán-sing kng ê mi̍h tsuè hi-sing. Tsi̍t ki la̍h-tsik hē-teh buē huat kng, la̍h-tsik ài sing sio, tsiah uē huat kng tsiò tāi-ke. Lán ka-kī nā bô hù tāi-kè, tuì pa̍t lâng tsiū bô sím-mi̍h lō͘-īng. Sio tsiū-sī ài siū-khó͘ hi-sing, tsóng-sī lán lâng lóng ài pī-bián khó͘-thàng.

Tng lán sin-thé ióng-tsòng, ló͘-li̍k tsuè sū, lán ê sim kap tshiú bô îng tī ho̍k-bū sè-kan, lán beh kám-kak tuì sè-kài ū kòng-hiàn. Nā-sī lán thàng-thiàⁿ, siū-khó͘, phuà-pīⁿ, it-tshè ê ua̍h-tāng thîng-tsí, lán beh kám-kak bô lō͘-īng, bô sím-mi̍h sîng-tsiū.

Tān-sī lán nā uē jím-nāi, koh khiam-pi, lán ê siū-khó͘, thàng-thiàⁿ, beh pí lán ka-kī jīm-uî tsuè siōng uí-tāi ê kang koh-khah uē tsō-hok jîn-kûn, koh-khah uē tsō-hok sè-kài. In-uī hit sî, lán teh sio ka-kī, huat hé huat kng, tsin tshàn-lān. --- tuì "àm-mî ê su-sióng"

Bîng-ji̍t ê îng-kng sī tuì kim-ji̍t ê lô-khó͘ lâi ê.

Tsin-tsuē lâng bô ài pē si̍p-jī-kè, khiok ài tit îng-iāu, bô ài king-kè sio ê hé khiok ài tit kng-bîng. Tsóng-sī beh tit îng-iāu ê bián-liû tāi-sing ài pī tìng si̍p-jī-kè.

Lí bat thiaⁿ tio̍h tn̂g-nî-tshiū,
Sing-tióng tī ū ji̍t ê tē-tsiūⁿ,
Tiām-tiām sing-tióng tsiâⁿ pah nî,
Tsiah kàu khui-hue ê sî-kî,
I ê tíng-bīn tshut-hiān tuā hue-thâu,
Khui tsi̍t tshing-luí ê hue-pau.
Hue ông, tuā khui, koh-tsài ōng
Siōng suí, jia̍t-tài tshiū tsi kong,
Tuì tshiū pún-sin sī hi-sing,
In-uī khui liáu tsiū sí-bông.

Lí bat thiaⁿ tio̍h tn̂g-nî-tshiū,
Siⁿ tī thài-iông tshiong-tsiok tē-tài,
Tsi̍t tshing luí hue ê muí tsi̍t luí,
Khui-hue sî-kî lak-lo̍h-lâi,
Tsiâⁿ tsuè sió-sió ê sin-íⁿ,
Tìng-kun tī hit só͘-tsāi,
Tuì beh sí lāu tshiū pun-lī,
Má-siōng sing-tióng tsin khó-ài,
Sí khì, piàn tsi̍t tshing ki,
Tsiâⁿ-tsuè siàu-liân ê tsi̍t tāi.

Lí beh thiaⁿ tuā-tshuì-gô kò͘-sū ê suí,
Siⁿ tī Hui-tsiu hong-iá bô lâng khì;
Ko͘-to̍k sing-ua̍h ê tsiáu-luī,
Thiàⁿ-sioh tsiàu-kò͘ i kiáⁿ-jî;
Tuì hn̄g-hn̄g suaⁿ tuà lâi tsuí,
Tuì hái-ni̍h lia̍h hî lâi tshī,
Ki-hng sî, īng ka-kī ê bah kap huih,
Uī kiáⁿ sing-tsûn, ka-kī sí.

Siōng kám-tōng ê sū, kiám bat thiaⁿ-kìⁿ?
Hit uī sìng-kiat tsin-si̍t ê, hi-sing ka-kī,
I sui-jiân sí, I ê ua̍h-miā ua̍h tī bû-sò͘ lîng-hûn ni̍h,
Tsiong sè-kài tn̂g-tn̂g uāⁿ-sin ū ua̍h-khì.
I ê tsíng-tsí phiàn iā tsuân sè-kài, ta̍k sè-kí,
Ná tshin-tshiūⁿ muá-muá ê thiⁿ-tshiⁿ.
I ê kà-sī, tuì “sìⁿ-miā ê thiàⁿ” lâi hòng-khì,
Sī uī-tio̍h “thiàⁿ ê sìⁿ-miā” tit koh-khí;
I sit, lán tit, I sí lán siⁿ,
Ba̍k-sái piàn huaⁿ-hí, thòng-khó͘ tsiâⁿ hô-khì.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com