《台語荒漠甘泉（全羅版）》

 | | | 轉寄

"Khiā-teh"

作者 陳清俊 翻譯 2009.04.19

listen



Sì ge̍h tsa̍p-káu (Sì ge̍h tsa̍p-káu ji̍t)

"M̄-bián kiaⁿ, tsuè lín khiā-teh, khuàⁿ Iâ-hô-hua kin-á-ji̍t uī-tio̍h lín só͘ beh kiâⁿ ê tsín-kiù." (Tshut-ai-ki̍p-kì 14:13)

Tsit ê king-bûn sī Siōng-tè hō͘ lán tsi̍t ê bīng-līng, tng lán tú-tio̍h tsîng-sè guî-kip, khuân-kíng tsa̍p-hun khùn-lân ê sî thang īng. Tng guá tsìn bô lō͘, thè bô pō͘, tsiàⁿ-pîng tò-pîng iā siū tsó͘-tòng ê sî, guá tio̍h án-tsuáⁿ tsuè? Tsú ê uē kóng, "Khiā tiāⁿ-tiāⁿ," hit-sî, guá siōng-hó ê tshik-lio̍k tsiū-sī thiaⁿ Siōng-tè ê uē. Hit sî, ū lâng uē kā lí kiàn-gī, khó͘-khǹg, sīm-tsì tsua̍t-bāng lâi kóng, "Hòng-khì ah, sí-sim ah!" Tī tsit ê siōng khùn-lân, siōng pháiⁿ ê sî-kî, Siōng-tè ài lán ū ióng-khì, koh uē hí-lo̍k, tsing-sîn koh-tsài tín-tsok khí-lâi, khak-sìn I ê thiàⁿ-thàng kap sìn-si̍t.

Bô táⁿ ê lâng beh kóng, "lí ài thè tńg-khì, huê-thâu kiâⁿ í-tsîng sè-kan lâng só͘ kiâⁿ ê lō͘, m̄-thang kè ki-tok-tô͘ ê sing-ua̍h, tse tuì lí thài lân lah, hòng-khì lí ê guân-tsik ah."Tsóng-sī Sat-tàn bô-lūn án-tsuáⁿ pik guá khì kun-tè i, guá lóng buē khì tè i. In-uī guá sī Tsin-sîn ê kiáⁿ-jî, Tsú sio̍k-thiⁿ ê bīng-līng ài guá hiòng tsîng kiâⁿ, "ná kiâⁿ, khuì-la̍t ná ke-thiⁿ." (Si-phian 84:7) Guá guān thiaⁿ Tsú ê bīng-līng, bô-lūn sī sí-bông, á-sī tē-gi̍k lóng buē-thang hō͘ guá ê hong-hiòng kái-piàn. Nā-sī I kiò guá "tòng-tiāⁿ, khiā-teh," tsi̍t-sî-á kú, tse sī hō͘ guá hue-ho̍k li̍k-liōng ê ki-huē, uē-thang í-āu īng koh-khah tuā-pō͘ hiòng tsîng kiâⁿ.

Kip-sìng, bô nāi-huân ê lâng uē kóng, "khí-lâi tsuè sū! Khiā-teh sī lán-si, pîn-tuāⁿ" Guá uī-sím-mi̍h uē siūⁿ tio̍h ka-kī lâi tsuè, khiok bô gióng-bōng Tsú neh? Kî-si̍t, Tsú teh tsuè tāi-tsì, m̄-nā án-ni, I teh tsuè só͘-ū ê tāi-tsì.

Tsū-ko, siuⁿ tshong-bîng ê lâng beh lâi khua-kháu kóng, "Ká-sú sī hái lâi teh tòng lō͘, lí tsiū put-kuán jû-hô ta̍h ji̍p hái-ni̍h, hi-bōng ū kî-jia̍h huat-sing." Tsóng-sī tsin-tsiàⁿ ū sìn-sim ê lâng, tsua̍t-tuì buē thiaⁿ-thàn tsū-ko, kip-sìng, bô-táⁿ á-sī tsua̍t-bāng. I tsí thiaⁿ Siōng-tè kóng, "Khiā-teh." Jiân-āu ná tshin-tshiūⁿ tsio̍h-thâu tī hia khiā tiâu-tiâu.

"Khiā-teh" pit-su pó-tshî khiā ê tsu-sè, sī tsún-pī suî-sî beh hîng-tōng, teh thìng-hāu sin ê bīng-līng, huaⁿ-hí nāi-sim teh thìng-hāu Tsú ê siaⁿ-im. Bô-kú I beh tuì guá kóng-uē, tshing-tshing tshó-tshó, tshin-tshiūⁿ I huan-hù Mô͘-se kā Í-sik-lia̍t lâng kóng, "tsìn-tsîng khì." (Tshut-ai-ki̍p-kì 14:15) tsi̍t-iūⁿ. --- Tsarles H. Spurgeon

An-tsīng, uī-sím-mi̍h tio̍h-kip beh ka-kī kái-kuat,
Siōng-tè tsai ta̍k hāng, I uē kín uē bān, bô tsáu-thuat,
Siōng hó khò sìn-sim, m̄-sī khò ba̍k-tsiu, ha̍k-suat,
Sìn-khò, koh sìn-khò, lí beh tsai pì-kuat,
Tī ji̍t-kng ē, I ê tshiò-iông tsài tshut-huat.

Tī bô tiāⁿ-tio̍h, tiû-tû ê sî, ài thìng-hāu. Tī huâi-gî ê sî, ài thìng-hāu, m̄-thang kiông-pik ka-kī hîng-tōng. Tng lí ê sim-lîng siū ap-tsè, m̄-thang thiaⁿ-thàn, ài thìng-hāu, kàu ū lō͘ thang kiâⁿ ê sî.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com