《台語荒漠甘泉（全羅版）》

 | | | 轉寄

"M̄-thang hue-sim"

作者 陳清俊 翻譯 2009.05.10

listen


Gō͘ ge̍h tshue-tsa̍p (Gō͘ ge̍h tsa̍p ji̍t)

"Guá nā m̄-sìn tī ua̍h-lâng ê tuē tit-tio̍h khuàⁿ-kìⁿ Iâ-hô-hua ê un-huī, tsiū tik-khak tsua̍t-bāng. Tio̍h thìng-hāu Iâ-hô-hua, tio̍h ióng-tsòng, lí ê sim tio̍h kian-kò͘." (Si-phian 27:13,14)

M̄-thang hue-sim!
Ah! Ū sî hue-sim tsua̍t-bāng ê iú-hi̍k sī juā-tsiâⁿ tuā! Tng lán ê sing-ua̍h siū-tio̍h giâm-giâm ê tshì-liān, khó-giām, ti̍k-pia̍t sī ū sí-bông ai-siong, kap siū thòng-khó͘ ê sî, lán ê tsing-sîn sit-khì ua̍h-la̍t, sim tîm-tāng, sìn-sim iô-tāng. Lán khó-lîng kiâⁿ kàu tsit ê tē-pō͘, beh kóng, "Guá jím-siū buē tiâu lah. Tī Siōng-tè só͘ ún-tsún hā, guá í-king tsiap-kūn tsua̍t-bāng. I kiò guá m̄-thang hue-sim, tsua̍t-bāng, tsóng-sī kàu tsit ê tē-pō͘, guá m̄-tsai beh án-tsuáⁿ tsuè ah?"

Í-tsîng lí ê sin-thé luán-jio̍k ê sî, lí ū tsuè sím-mi̍h? Lí buē thang tsuè sím-mi̍h, tsí-sī thîng-tsí tsuè jīm-hô ê sū. Tī luán-jio̍k tiong, lí phīng tī lí só͘ thiàⁿ koh ióng-tsòng hit ê king-kah tíng, uân-tsuân khò tī līng-guā tsi̍t ê lâng ê sin-tsiūⁿ lâi hioh-khùn, lâi tsīng-ióng, uân-tsuân sìn-khò līng-guā tsi̍t ê lâng ê li̍k-liōng.

Tī tsing-sîn siū khó͘, luán-jio̍k ê sî, iā sī án-ni. Tng lí it-tàn tsiap-kūn tsua̍t-bāng ê sî, Siōng-tè ê sìn-sit m̄-sī kóng "Lí tio̍h ióng-kám tsòng-táⁿ" (Iok-su-a 1:6). In-uī I tsāi lí ê li̍k-liōng kap ióng-khì í-king kàu tsīn-pōng lah, huán-tńg sī, I un-jiû kóng, "Lín tio̍h tiāⁿ-tiāⁿ, tio̍h tsai Guá sī Siōng-tè." (Si-phian 46:10)

Kàu Tiong-kok ê tshut-miâ thuân-kàu-su Tè-tik-sing (Hudson Taylor) tī i lîm-tsiong ê tsuè-āu kuí kò-ge̍h, i tuì pîng-iú kóng, "Guá luán-jio̍k kàu buē siá-jī, buē tha̍k king, sīm-tsì buē uē kî-tó. Guá tshin-tshiūⁿ tsi̍t ê gín-ná hioh tī Siōng-tè ê hing tsîng, siong-sìn I." Tsit ê lîng-sìng uí-tāi Siōng-tè ê lô͘-po̍k kàu sin-thé sue-lám, jio̍k-thé siū khó͘ ê sî, só͘ thang tsuè ê tsí-sī hioh-khùn kap sìn-jīm.

Siōng-tè tuì I ê kiáⁿ-jî ê iau-kiû iā sī án-ni. Lí siū lia̍t-hé ê khó͘-thàng, lâng luán-jio̍k ê sî, I bô kiû "ióng-kám tsòng-táⁿ", tsí-sī "hioh-khùn, tiāⁿ-tiāⁿ, ài-tsai, I ê Siōng-tè." Iā tsai I uē tsi-tshî lí tō͘-kè hé ê tshì-liān.

Siōng-tè pó-liû siōng hó ê i-io̍h hō͘ lán tī siōng tsua̍t-bāng ê sî iōng.
Tio̍h tsòng-táⁿ, kian-kò͘ lí ê sim. --- Si-phian 27:14

Kian-kiông,
Kè-khì I bô hō͘ lí sit-bōng,
Hiān-tsāi kiám uē lī-khui lí,
Khuàⁿ lí tîm-lo̍h-khì.
Buē,
I kóng, beh tsiong lí hē tī I ê si̍t ē,
Kàu tī an-tsuân ê tē,
Lí beh gîm-si tshiùⁿ-kua kun-tè.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com